Acts 9

Zande

← Chapter 8 Jump to: Chapter 10 →

1Ono Saura ata serekpo ga Gbia abawiriki nigumba pa imo yo, ko ki ndu koyo du gbiamotumo ni,

2ki ya fu ko ko fu awaraga ko ndu ku Damaseke yo ku rogo abambutiria yo, ko ya bi gu boro ka kuti gi gene re, akumba a na ade, ko ye na yo ni vodivodi yo ku Yerusarema yo.

3Wa ko andu nunguro ko ki ta mbeda ku Damaseke yo; rure imahe ki ye ngbangbaturũ yo ki hasi rago ahasa pati ko kirikiri.

4Ko ki ti sande, ki gi fugo naya fu ko, “Saura, Saura, tipagine mo arungosi re ti ni?”

5Ko ki ya, “Da nga mo Gbia?” Ni ki ya, “Mi nga Yesu, nga gu ko mo arungosi ko.

6Mo gúari, ki rimi ku bakporo yo, i agúmba gu pai yo ka mo amanga.”

7Agu akumba nandu nunguro na ko i ki ru aru, ka si adu nga wa ka i gumba pai ya, i ki nigi kina fugo ka i abi nga boro wa sa ya.

8Saura ki guari sande; ho ko aza bangiriko ni ka ko abi nga he ya; i ki ngbe mbata yo fu ko ki zi ko ti beko, ki ye na ko ku Damaseke yo.

9Rame ki du biata ka ko abi nga he ya, ka ko ari nga he ni mbiri he a ya.

10Were bawiriki adu Damaseke yo, rimoko angia Anania, Gbia ki ya fu ko rogo yuguyugupai yo, “Anania.” Ko ki ya, “Mo ngére, mi du re, Gbia.”

11Gbia ki ya fu ko, “Mo gúari ki ndu ku rogo gu gene yo du rimoho nga Ruruhe, ki sana he ti ga Yuda bambu tipa gu boro du rimoni nga Saura, boro Taruseu; bambiko ko nakpara.

12Ko bi kumba du rimoko nga Anania ko nirimi ki moi beko auru ko, ko ngere.”

13Ono Anania ki karaga ha ki ya, “Gbia, mi agi pa gi kumba re ngba dungu aboro wa ko anamanga gamo aboro gbegberẽ gbe Yerusarema yo.

14Ko kina erẽ asia abairamotumo pa voda agu yo dunduko fu ko ninakpara ti rimoro.”

15Ono Gbia ki ya fu ko, “Mo ndú andu; bambiko mi kpara ko, ko ndu na rimore ku barangba aGendiria na abakindo, na awiri aYisaraere;

16bambiko mi ayúgo gu dungu apai ayugo fu ko ko ka hi mbiko rimore.”

17Anania ki ndu ki rimi ku bambu yo; ki ta maa beko auru ko niya, “Wirinami Saura, Gbia Yesu, nga gu ko nayugu tiko foro ti gu gene mo aye ti ni, ko nikedi re ya mo ngere, mo ki hi be Ziazia Toro.”

18He ki tiwi bangiriko yo ni ba sa wa ire, ko ki ngere. Ko ki guari i ki bapatizi ko;

19ko ki ri riahe ki du nyanyaki. Saura ki du na agu abawiriki nadu Damaseke yo sa gu rago re.

20Ko ki nitungusi pa Yesu atungusa ni ba sa rogo abambutiria yo ki ya “Ko nga Wiri Mbori.”

21Si ki iriwo airiwo ti agu yo dũ nagi pako, i ki ya, “A nga gi kumba nagbarasi agu yo nanakpara ti gi rimo re Yerusarema yo te? A wo ko aye ka manga no, ya ko ye na yo ni vodivodi yo ku barangba abairamotumo.”

22Ono Saura ki ninyaki anyaka rogo tungusapai yo gbe, ki nimungosi agu aYudo naaima ku Damaseke yo, niyugu gopai ya Kristo du.

23Fuo rame ni dungu he aYudo ki nigumba rondo imo ko;

24ono Saura ki ini gayo bura aina. I ki nimoi rago ngbadimo a na uru na yuru ya i imi ko.

25Ono gako abawiriki ki di ko yuru, ki zogo ko ri ngapa bakporo rogo buma yo.

26Ho Saura aye ni ku Yerusarema yo, ko ki niasadi kpamia tiko kuti abawiriki; ono i ki nigunde agunde ti ko dunduko, ka i aida nga ya bawiriki nga ko ya.

27Ono Barunaba adi Saura, ki ye na ko koyo du amokedi ni, ki taki pande he fu yo wa Saura abi Gbia gene, wa ko agumba pai fu ko, na wa ko atungusi pai ni rimo Yesu Damaseke yo zukazuka.

28Ko ki du na yo Yerusarema yo ki nimongo ta rima nikuru,

29nitungusi pai ni rimo Gbia zukazuka. Ko ki nigumba ha i ki nisaki he na agu aYudo i abatika yo rogo kura aringara; i ki nike na kina pa imo ko.

30Ho awirina aini he ni, i ki ndu na ko ku Kaisaria yo, ki kedi ko ku Taruseu yo.

31Were agu akanisa nadu Yuda yo na Gariraya yo a Somorona yo ki du adu zezeredi, ki nyaki anyaka; ki ta ta na gunde Gbia na gu wasa nga ga Ziazia Toro, ninge ange.

32Were, ho Petero atangara rago ni rogo gu rago dunduko re, ko ada yo a du ga Mbori aboro ni naima ku Ruda yo.

33Ko ki bi kumba yo rimoko angia Ainea, nanye auru gako barame garã ki du muambi; bambiko ko adu na ngbaramoni.

34Petero ki ya fu ko. “Ainea, Yesu Kristo nahusa ro; mo gúari ki mbakadi ga ba.” Ko ki guari aguari ni ba sa.

35Agu yo dunduko naima ku Ruda yo na Sarona yo i ki bi ko, ki sa tiyo fu Gbia.

36Were bawiriki adu Yapo yo rimori angia Tabita, si wa ka i ya Doruka Gbangbaria. Gi de re ri agberẽ agberã be wene sabe na inapai ni gu úbe ri anamanga.

37Were sa gu rago re, ri akaza akaza ki kpi. Ho i azundu ri ni, i ki pigi ri rogo gu vuru bambu nadu ari.

38Bambiko wa Ruda ambedi ambeda ku Yapo yo, abawiriki ki nigi pa Petero ya ko yo, i ki kedi akumba koyo du ko ni ue, nikpari fu ko ya, “Ka mo he nga ye kono du ani ni ya.”

39Petero ki guari ki ndu na yo. Ho ko ada ni i ki ndu na ko ku rogo gu vuru bambu nadu ku ari. Adekurugbo ki ru aru pati ko dunduko nikpari, niyugu agu abaukadi Doruka amangi na aremu, ho ri adu ni na yo.

40Ono Petero ki kusi yo akusa dunduko, ki kuku, ki kpari, ki ta sa tiko koyo du kangba ni niya, “Tabita, mo gúari.” Ri ki za bangiriri; ho ri abi Petero ni ri ki sungu ku ari.

41Ko ki fu beko fu ri, ki tumba ri ku ari; ki niyambu aidipase na adekurugbo, ki yugu ri fu yo ni ungari.

42I ki ini he aina Yapo yodunduko; dungu aboro ki idi pa Gbia.

43Were, ko ki ima aima ku Yapo yo ti dungu rame ku Simona yo nangia barungburasi kpoto.

← Chapter 8 Jump to: Chapter 10 →