Acts 28

Zande

← Chapter 27 Jump to:

1Ho ani abati ni, ani ki ini ya gu kisanga re, rimoho nga Merita.

2Aboro gu kisanga re ki nimangi pa rani bakere gbe, bambiko i aginda we, ki di rani ku gume, bambiko mai ana, na zere.

3Ho Pauro adungura asakiri ni ki moi he ku we yo, kere wo ki kuru mbiko faa we, ki ka kuti beko.

4Ho aboro abi gu gbiro ni re naasi ti beko, i ki ya dagba yo, “Gi kumba re nga baimiboro ni rengo, ko vura bata be baime vurũ, rurupai aida nga fu ko ko nye ni ungako te.”

5Ono ko azanzia gu gbiro re ku we yo, ka pai amanga nga ko ya.

6Ono i aberẽ ya watadu ko ahi ahi, na ko ati ni kpio ni ipo. Ono ho i asungudi he ni gbe, ka i abi nga pai namanga ko ya, i ki sa gayo berã ki ya, “Mbori nga ko!”

7Were rogo gu ringara re mbembedi aati adu nangia ga bazogo kisanga, rimoko angia Puberiu; ko adi rani ku gume, ki nimangi pa rani rame ki du biata wenengaĩ.

8Were ba Puberiu api auru ba be kazari na ngana. Pauro ki rimi koyo du ko ni, ki kpari, ki moi beko auru ko ki husi ko.

9Ho gi amangi ni re, kura aboro kaza nadu kisanga yo ki ye a, ko ki husi yo.

10I ki irisi rani ni dungu apai a. Ho ani aye ka ndu kurungba yo ni, i ki moi agu ahe zingoho amanga rani ku rogo kurungba.

11Fuo diwi biata ani ki ndu rogo bakurungba Aresanduria nanye kisanga yo ti rago zere; kpia rihe nangia Abi.

12Ani ki da ku Sarakusa yo, ki sungu yo rame biata.

13Ani ki ndu yo kirikiri ki da ku Regio yo: rame ki du sa yuge ki ye pavururago yo, gu ue rame ani ki da ku Puteori yo:

14yo ani abi awirina ni, i ki zungadi rani ani sungu na yo rame saba. Were ani ki da ku Roma yo.

15Ho awirina agi parani ni, i ki ye daku ga Apio Bangbeahe yo na ku Asinziri Biata yo ka ngbisa rani yo; ho Pauro abi yo ni, ko ki tambua Mbori ki ngarã.

16Ho ani arimi ni ku Roma yo, i ki idi fu Pauro ya ko sungu ni sako na kina gu banzengere naabanda ko.

17Were fuo rame biata ko ki yambu bakumba aYudo i tiria tiyo. Ho i adungura tiyo ni, ko ki ya fu yo, “Awirinami, mi amanga nga pai kuti aboro na sino abarani wa sa te, ono i afu re Yerusarema yo ku be aRomo.

18I, ho i awisigi re ni i ki nikpi nyemu kusa re, bambiko i abi nga gu pai kuti re rengbe na kpi mi te.

19Ono ho aYudo agumba pai ni kuti ni, mi ki mo ka kpara fu Kaisara ― ono si tipa kita ngbanga ngbatungare te.

20Si du mi azungadi roni ti ni oni ye ka bi re ki fura na mi; bambiko mi du ni vovo re ni agi azogbo re mbiko gu maabangirise nga ga aYisaraere.”

21I ki ya fu ko, “Waraga pa ro aye nga Yuda yo fu rani te, agu awirina naye yo i agumba nga pangbangaro ki gumba gbegberẽpai kuti ro a te.

22Ono ani nakpi nyemu gia gu pai mo aberã ha: bambiko gi rika pai re, ani ini ya i nagumba pai kuti ni rogo zegino dũ.”

23I ki ye ku rogo gako bambu yo ni dungu yo, ni gu rago i aringbisi he fu ko: ko ki ringbisi pai fu yo nigumba pa ga Mbori ngbi, nizungadi yo tipa Yesu, rogo ga Mose rugute na pa anebi a, wiso kina kuti nyemu.

24Agu yo ki idi agu apai i agumba, agu yo ki basa ha.

25Ho i adarĩ kangu ni dagba yo, i aguari fuo pe Pauro gi pai sa re, ya, “Ziazia Toro agumba pai ni rengo ku ngba gu nebi nga Yesaya fu abaron:

26ya, ‘Mo ndú koyo du agi aboro ni re, ki ya, Oni agía pai agia, ono oni arúga nga tironi na ni wa sa te; oni angéra angera ono oni abí nga he wa sa te.

27Bambiko kpoto gi rika aboro yo re asa tihe ni dokoyo ho, tuyo ni ngbangbangba ha, i kisi bangiriyo; i ka bi he ni bangiriyo, ki gi pai ni tuyo, ki rugu tiyo na ni kpotoyo yo, ki sa tiyo berewe, mi ki husi yo.’

28Were oni ini gere aina, ya, gi bata nga ga Mbori re i nakeda ha fu aGendiria; i agía ha agia a.” [

29Ho ko agumba agi apai ni re, aYudo ki guari, ki nisaki pai dagba yo bakere.]

30Ko ki sungu ti gu bambu ko anafu marã tipa ha kuti garã ue, ki di agu yo dunduko nandu koyo du ko ni ku gume,

31nitungusi pa ga Mbori ngbi, niyugu pai tipa Gbia Yesu Kristo zukazuka, a nga boro sa naza ko ti ni te.

← Chapter 27 Jump to: