Acts 20

Zande

← Chapter 19 Jump to: Chapter 21 →

1Fuo nyasa gbarakagbaraka pai, Pauro, ho ko ayambu abawiriki ni ki ngarasi yo, ko ki poi kuti yo, ki guari ka ndu ku Makedonia yo.

2Ho ko asusi ni rogo agu aringara re, ki ningarasi aboro gbe, ko ki ye ku ringara aGiriki yo.

3Ho ko adu yo ni kuti diwi biata, ki ye ka ndu kurungba yo ku Suria yo, aYudo ki ta bura ko, ko ki ya tigako ko akaraga tiko ku ngba gene Makedonia yo.

4ASopaturo naye Beroya yo nangia wiri Puro, i agumba ndu na ko da Asia yo; na agu yo nadu dagba aTesaroniko yo, nangia aArisitaruko na Sekundo; na Gayo naye Derube yo, a Timoteo; na agu yo nangia aboro Asia, nga aTukiko na Turofimo.

5Ono agi yo re i aima ndu mbata ki sungudi rani Turoa yo.

6Ani ki guari Firipoi yo fuo rago gu kpokuta adu nga na agbooro ti ni ya, ani ki ye kurungba yo koyo du yo ni ku Turoa yo, ramehe ki du bisue; ani ki nye yo kuti rame saba.

7Ni gu bambata uru nga ga poso, ho ani adungura tirani ni ka kuadi kpokuta, Pauro ki fura na yo, niberẽ pa guari ho rago ka gira ni; ko ki peke gbanga fugo dati bebere yuru.

8Dungu atara ki du rogo gu vuru bambu du ari, ho ani adungura tirani ku ho ni.

9Paranga kumba ki sungu ti bangiri bambu, rimoko angia Eutuko, ko ki niyukura be rame; wa Pauro ata peka gbanga fugo, rame ki ba ko, ko ki ti ati ti gu bambu nadu ni biata ha ku ari, i ki tumba kangbako.

10Pauro ki zorõ, ki ti ku auru ko, ki ta dungo ko niya, “Ka oni kpári nga ya, ungako ti kina ko.”

11Ho ko abiti ni, ki kuadi kpokuta, ki ri he, ki gumba pai ni gbanga ha da kina kuti girarago, ko ki guari.

12I ki ye na paranga ni ungako i ki ngarã ni rengo.

13Ani ki ndu bakurungba yo tigaani ku Aso yo niberẽ pa dia Pauro ku bakurungba yo yore; bambiko wo ko aringbisi he fu rani, niya ko anindu pia yo.

14Ho ko agbia rani ni Aso yo, ani ki di ko ku bakurungba yo, ki ye ku Miturene yo.

15Ani ki guari yo na bakurungba, rago ya giri ani ki ye ku pati Kio; rago ki ya giri berewe ani ki sungu ngbutuko Samo yo; kura girarago ani ki ye ku Mireto yo.

16Bambiko Pauro aya ko asusa Efesa yo, ka ko aima nga ku Asia yo ya; bambiko ko andu ni ipo, si ngia ka ko da Yerusarema yo tipa rago Pendekote.

17Pauro ki kedi sunge Mireto yo ku Efesa yo, i yambu ga kanisa abaakumba i ye fuo ko.

18Ho i aye ni koyo du ko ni, ko ki ya fu yo, “Oni ini agu apai tigaoni mi anamanga dedede ho mi adu ni na oni, ti gu rago mi ada Asia yo mbata,

19wa mi anamanga pa Gbia ni ndikidi umbasitise ni aume a, na agu apai namangi re mbiko ga aYudo bura,

20wa mi ane nga tungusa agu apai dunduko ka ngba fu roni te, ki niyugu pai fu roni gbayaga, nitangara bambu a,

21nitungusi pa saberã fu Mbori na idapa gaani Gbia Yesu Kristo fu aYudo na aGiriki a.

22Oni ngére, awere torore namanga re mi ndu ku Yerusarema yo, mi aina nga agu apai nikamanga re yo te:

23kina gu Ziazia Toro nayugo ho fere rogo abaakporo dunduko, ya aganziri nasunguda re na rungosi.

24Ono mi akiisa nga ungare te, mi ki rengbe na digisa gu pai mi ninamaa bangire kuti ni, na gu sunge mi adi be Gbia Yesu, mi nitungusi gu wene pangbanga nga ga Mbori undahe.

25Oni ngére, awere mi ini ya, oni dunduko nga agu yo mi ata ndu dagba yo yo nitungusi pa ngbi, oni abí nga kpakpure berewe te.

26Were mi nagumba ha fu roni areme, ya mi adia nga bape kure boro wa sa te.

27Bambiko mi ane nga tungusa ga Mboripaidundukofuronite.

28Onibánda tironi na agu akandoro, Ziazia Toro asa roni ni ababandara, oni rígi ga Mbori kanisa nga gu ko angbe ni kureko.

29Mi ini ya fuo ga mi gbegberẽ awaru aríma ku dagba roni yo, ami ahe nga akandoro te.

30Akumba agúari dagba roni tigaoni a, ki nigumba irairaapai, ka gbefa abawiriki fuo yo.

31Were oni ngére angera, nitingidi he wa mi ahe nga ruga roni ni aume na yuru na uru tipa garã biata ya.

32Awere mi nafu roni ku be Mbori, na ku be pa gako undahe, nga gu rengbe na nyakasa roni ki fu dikumbo fu roni dagba agu yo yo dunduko i asa yo ni ziazia yo.

33Mi adia nga ngbiti ga aboro feda na dahabu na aremu te.

34Oni ini tigaoni ya agi abere re nanamanga pa re, na pa agu yo nanidu na mi.

35Mi aringbisi pai fu roni ni apai dunduko, ya oni ta manga sunge were niunda agu yo anyaka nga ya, ki tingidi pa Gbia Yesu wa ko aya tigako, ‘Fu he ngba ti dia ha.’ ”

36Ho ko agumba ha ni were, ko ki kuku sande ki kpari na yo dunduko.

37I ki nikpari akpara ni aume gbe, i ki moi goyo auru gorõ Pauro, ki dungo ko,

38nirungo arungo bakere gbe mbiko gu pai ko agumba ha, ya i abi nga kpakpuko berewe te. I ki gasi ko ngba gene ku ngbakungba yo.

← Chapter 19 Jump to: Chapter 21 →