Acts 3

Zande

← Chapter 2 Jump to: Chapter 4 →

1Were Petero ki nidakpa na Yoane ku yekaru yo rago kpe, saa biata nga ga nyemu nadu.

2Iki aka kumba i avungu ko na gbarã, i ki nizogo ko na uru pati gu ngbadimo yekaru i aniya ti ni Wenehe, ko nio ahe be agu aboro nanarima ku yekaru yo.

3Ko ki ta bi aPetero na Yoane i niye ka rima ku yekaru yo ko ki o he.

4APetero ki ngana ko na Yoane, ki ya, “Mo bí rani.”

5Ko ki gi payo ki ya tigu i nikafu he fu ko.

6Ono Petero ki ya, “Marã be re te; gu he du be re si mi afu foro. Ni rimo Yesu Kristo nga boro Nazareta; mo nitá.”

7Ko ki zi ko ti kumbabeko, ki tumba ko ku ari; nduko ki du na ome ni ba sa na nguku nduko.

8Ko ki guari ku ari, ki ru, ki tona ta; i ki rimi na ko ku yekaru yo, ko ki ta ndu niguku, nitambua Mbori.

9Aboro ki bi ko dunduko ko ki ta ata nitambua Mbori.

10I ki ini ko ya ko du nasungu ka o ahe pati Wene Ngbadimo yekaru. Si ki niiriwo airiwo ti yo i ki nibaki bangiriyo abaka ti gu pai namangi fu ko.

11Wa ko aka kuti be aPetero na Yoane, aboro ki tiria atiria koyo du yo ni dunduko ku rogo gu gbanga ngbadimo i aniya ti ni, Ga Soromo, moaki bangiriyo abaka ni rengo.

12Ho Petero abi yo ni, ko ki ya fu aboro, “Aboro aYisaraere tipagine oni abaka bangironi ti ni ti gi kumba re? Tipagine oni angana rani ti ni, wa ka ani niya ni gaani tandu na wene ringirani ko nita?

13Ga a Abarayama Mbori na ga Yisaka aga Yakoba, nga ga abarani Mbori, ko taasi rimo Wiriko nga Yesu, ko, oni afu ko ki oro rimoko barangba Pirato ho ko aya ni ko nikakusa ko.

14Oni ki oro rimo gu Ziazia Ruru Boro, ki sana he i fu kina baimia boro fu roni,

15ki imi Iraunga; Mbori azingisi ko dagba akangba. Ani nga adezirehe.

16Mbiko ida pa rimo Yesu, gi kumba anyaki ti ni re, gu ko bi oni ko re ki ini ko. Gu ida pa rimo Yesu ko aidi si fu gi wene zereda fu ko re ku bangironi dunduko.

17“Were awirinami, mi ini ya oni amangi he ka oni aruga nga tironi na ni ya, a wa abazogoroni amangi he.

18Ono agu apai Mbori ayugu mbata ku ngba anebi dunduko ya, gako Kristo ahi pai a, si ko adigisi he were.

19Oni zúngadi tironi bambiko gere ki sa tironi berewe, i gbandaka gaoni ingaapai, zereda ye yo du Gbia ni,

20ko kedi Kristo gu ko Mbori amoi ko fu roni nga Yesu.

21Ko ngbangbaturũ nadi ko adia dati rago mbakada arago dũ, si Mbori agumba paha ku ngba gako ziazia anebi nadu ho rago aenge ni daku awere.

22Mose aya tigu, ‘Gbia Mbori Ko asá nebi fu roni dagba awirinaroni wa mi; oni ki nigi agu apai agia dunduko ko nikaagumba paha fu roni.

23Gu boro nikaagia nga pa gu nebi re ya i aímo ni aimo dagba aboro yo.’

24Ii, agu anebi dunduko tona ti Samuere na agu yo du fuo ko, a wa i anagumba pai, i agumba pa gi rago re a.

25Oni nga awiri anebi, nga awiri gu ndika Mbori aru fu abaroni, ki ya fu Abarayama, ‘Rogo wiro yo i ka fu maku ni fu ngbatunga aboro zegino dunduko.’

26Mbori nasa gako moyambu ki kedi ko koyo du oni ni mbata, ko fu maku fu roni nisa roni dunduko ti gaoni ingaapai.”

← Chapter 2 Jump to: Chapter 4 →