Acts 21

Zande

← Chapter 20 Jump to: Chapter 22 →

1Si ki ta du wa gere ho ani aguari pati yo ni, ki ndu bakurungba yo, ani ki ye ku Kosa yo nzunzu, rago ki ya giri ani ki ye ku Rode, ki ye ku Patara yo:

2ani ki bi gu bakurungba yo nikasi ku Poinike yo, ki zorõ ku rogo ho, ki ndu na ni.

3Ho ani aye ki bi Kupurio ni, ani ki sa ha ku gare, ki ndu ku Suria yo, ki kuru bakurungba yo Tura yo: bambiko i nikaroga ahe bakurungba yo yore.

4Ho ani abi abawiriki ni ani ki raki yo saba; agi abawiriki re i ki ya fu Pauro rogo sangba Ziazia Toro yo, ya ka ko ndu nga ku Yerusarema yo ya.

5Ho ani anyasi rame ni, ani ki guari ki ndu gaani nunguro; i ki gasi rani gene dunduko, na adiayo na awiriyo, i ki kuru bakporo yo na ani; ani ki kuku pangba ime yo, ki kpari,

6ki asia tirani dagba rani yo; ani ki zorõ ku bakurungba yo, ono i ki karaga tiyo.

7Ho ani aguari ni Tura yo ki da ku Petoremai yo, gaani nduge kurungba yo si ki nyasi; ani ki poi kuti awirina, ki ra na yo sa.

8Rago ki ya giri ani ki guari ki ye ku Kaisaria yo. Ani ki rimi ku rogo ga Firipo bambu, ko nangia batungusipai, ko adu dagba agu yo nadu saba re i asia yo Yerusarema yo, ani ki raki na ko.

9Were gi kumba re ko adu na awiriko Diama, nangia ngasu ade, i anagumba pai wa nebi.

10Wa ani anye yo kuti dungu rame, nebi ki ye Yuda yo, rimoko angia Agabo.

11Ko ki ye koyo du ani ni, ki di ga Pauro giri dimose ki vo nduko na beko na ni, ki ya, “Wo gumba Ziazia Toro ya, ‘Agu aYudo du Yerusarema yo i avó gu kumba du gi gire re ni gako were, ki fu ko ku be aGendiria.’ ”

12Ho ani agi agi apai ni re, ani na agu yo du yo, ani ki zungadi ko ya ka ko ndu nga ku Yerusarema yo ya.

13Pauro ki karaga ha ki ya, “Oni namanga wãi nikpari ni aume ki ba rungo ti re? bambiko mi aima so gima ka i vura vo re vurũ, ka mi vura kpi vuru a Yerusarema yo mbiko rimo Gbia Yesu.”

14Ho ko aida nga gaani zungadihe ni ya, ani ki mbu he, niya, “I mángi wa Gbia akpi nyemu he.”

15Fuo agi arame re ani ki rogo gaani tindiro, ki ndu ku Yerusarema yo.

16Agu yo dagba agu abawiriki nadu Kaisaria yo i ki ndu na ani a ki ye na Menasona nangia boro Kupurio ani ka sunga kpuko yo, kuru bawiriki nadu.

17Ho ani aye ni ku Yerusarema yo, awirina ki di rani ku gume ni ngbarago.

18Rago ki ya giri ani ki rimi na Pauro koyo du Yakoba ni; abaakumba ki du yo dunduko.

19Ho ko apoi kuti yo ni, ko ki nipeke agu apai ni ba sa sa Mbori amangi dagba aGendiria ni gako sunge.

20Ho i agi he ni, i ki nitaasi rimo Mbori, i ki ya fu ko. “Wirina, mo bí wa agu aYudo aidi pai ni dungu kutu yo; i nga airanyaka tipa rugute dunduko.

21I agi paro, ya mo nayugo pa mbu Mose fu agu aYudo du dagba aGendiria dunduko, niya fu yo, ka i yére nga awiriyo ya, ka i péke nga asino ya.

22Wãi tie? i nikagia ha ya mo ye.

23Were mo mángi gere ani nagumba ha foro. Akumba biama du erẽ na ani nga aboro zungahe;

24mo rogo yo, ki girisi tiro na yo, ki fu gayo amarã tipa yo i kpe mangeriyo, aboro ki mi aina dunduko ya rengo nga agu apai i agumba ha fu yo tipa ro te; ono mo napeka pai nzunzu tigamo a, nika kuti rugute.

25Ono tipa agu aGendiria naidi pai, ani ake pai, nirugu yo ya i ne agu ahe i atumo na ni fu kpiaahe, na kure, na agu anya i akama gora, na pa meteka.”

26Pauro ki rogo akumba tie, rago ki ya giri ko ki girisi tiko na yo ki rimi ku yekaru yo, ka gumba pa ragoho daho i ka tumo ni ni motumo tipa yo dunduko.

27Ho saba rame aye ka nyasa ni, agu aYudo naye Asia yo, ho i abi Pauro ni yekaru yo i ki zingisi rimbasa azingisa, ki moi beyo ti ko,

28ki poi ku ari ya, “Aboro aYisaraere, oni únda rani! Gi kumba re nga gu ko nayugo pai fu aboro dunduko rogo arago dũ kuti gi rika aboro re, na rugute, na gi ba re. Ko ki ye na aGiriki a ku rogo yekaru, ki birikosi gi ziazia ba re.”

29Bambiko i abi Turofimo nga Efeso bakporo yo na ko mbata, ko i aberẽ ya Pauro aye na ko ku yekaru yo.

30Aboro bakporo ki wo awo dunduko, i ki tiria ni ipo. I ki moi beyo ti Pauro ki gbefe ko yekaru yo. I ki kisi ngbadimo ni ba sa.

31Wa i aasada ka imo ko, pangbanga ki da koyo du bairarivura ni, ya Yerusarema hi be gbarakagbaraka pai dunduko.

32Ko ki rogo abanzengere na abarukuri aborp 100 ni ba sa ki zorõ koyo du yo ni ni ipo. Ho i abi bairarivura ni na abanzengere i ki mbu taka Pauro.

33Bairarivura ki mbedi, ki di ko, ki ya i vo ko ni azogbo ue; ko ki sana he ya da nga ko, gine mangi ko.

34Agu yo rogo rimbasa yo ki pe pai sa, agu yo ki pe gu akia. Ho ko aruga nga tiko na nduhe ni ya mbiko gbarakagbaraka pai, ko ki ya i ye na ko ku gbata yo.

35Ho ko ada ni ku auru paga bambu, abanzengere ki tumba ko bambiko rimbasa azunako;

36bambiko rimbasa aboro apeke ko nipoi ku ari ki ya, “Oni dí ko ku sa yo.”

37Ho i aye ni ka rima na Pauro ku gbata yo, Pauro ki ya fu bairarivura, “Mi gumba pai foro ke.” Ko ki ya, “Mo ini pa Giriki?

38Nga gu Ezipeto nazingisi aboro i sa mungu ki ngbe mbata yo fu agu Aimiaboro nadu biama kutu ku ngbakungba yo nga mo te?”

39Pauro ki ya, “Yudo nga mi, naenge Taruseu yo du Kirikia yo, boro payapaya bakporo nga mi te. Mi nakpara foro, mo idi ya mi gumba pai fu aboro.”

40Ho ko aidi he ni, Pauro ki ru auru paga bambu ki za aboro ni beko; ho i aongo ni kii; ko ki gumba pai fu yo rogo pa Ebere yo, niya,

← Chapter 20 Jump to: Chapter 22 →