Judges 1

Zande

Jump to: Chapter 2 →

1Si adu wa gere fuo kpio Yosua, awiri aYisaraere ki sana Yekova, ki ya. “Da nikangbe mbata fu rani kuti aKanano, ka so vura na yo?”

2Yekova ki ya, “Yuda nikandu. Oni ngére, mi fu ringara ku be ko.”

3Yuda ki ya fu Simona nangia wiribako, “Mo yé ani ndú ku rogo gi ringara i afu he fere, ani só vura na aKanano. Ani agúmba ndu na mo ku rogo ga ringara a.” Si du Simona andu ti ni na ko.

4Yuda ki ndu, Yekova ki fu aKanano ku be yo na aPereso, i ki di be agu yo Bezeke yo wa aboro 10,000.

5I ki bi Adoni-bezeke Bezeke yo, ki so vura na ko, ki di be aKanano na aPereso.

6Ono Adoni-bezeke ki oro; i ki do fuo ko, ki zi ko, ki niyepe abawirinzagako na abawirinduko a

7Adoni ― bezeke ki ya, “Abakindo 70, nga agu yo mi ayepe abawirinzagayo na abawirinduyo, i naadungura gayo riahe tii gi mbisa yo. Wa mi amangi he, kina wo mangi Mbori he fere a.” I ki ye na ko ku Yerusarema yo, ko ki kpi yo.

8Aboro Yuda ki so vura kuti Yerusarema, ki di he, ki mangi aboro na basape, ki zo bakporo na we.

9Fuo ho, aboro Yuda ki ndu ka so vura na agu aKanano nanaraka ringara abaagangara yo, na Negebe yo, na tiditidi rago yo a.

10AYudo ki ndu fuo agu aKanano nanaraka Eburone yo na vura, rimo Eburone nangia Kiriyata-aruba mbata. I ki imi aSesai, na Aimana, na Tarumai.

11I ki guari yo ki ndu kuti agu yo nanaraka Debiri yo. Rimo Debiri nangia Kiriyatasefere mbata.

12Kareba ki ya, “Gu ni ka mangi Kiriyata-sefere, ki di he, mi afú Akasa nga wire fu ni ni diani.”

13Oteniere wiri Kenaza, ki di bakporo; Kenaza nangia tame Kareba. Kareba ki fu Akasa nangia wiriko fu Oteniere ni diako.

14Ho ri aga ni koyo du ko ni, ri ki zúngadi ko ko sana bari tipa ati. Ri ki zorõ ri gari dongi yo, Kareba ki ya fu ri, “Gini he mo akpi nyemu he?”

15Ri ki ya fu ko, “Mo fú gamahe fere; bambiko wa mo amoi re rogo gu ringara du ku Negebe yo, mo fú gugaabi ime fere a.” Kareba ki fu agu agugaabi naadu ku ngbi yo fu ri na gu naadu ku pa di yo a.

16Atita Keno, nangia gbio Mose, i akuru bakporo ambira yo na ngbatunga aYudo ki ndu ku ngbakungba Yuda yo, naadu ku Negebe yo mbembedi na Arada. I ki ndu ki sungu na agu aboro du yo.

17Yuda ki ndu na wiribako nangia Simona, i ki di be agu aKanano nanaraka Sefata yo, ki gbarasi he kpakaya. Fuo ho i ki yambu rimo gu bakporo re nga Oruma.

18Yuda ki di Gaza na gaha ringara a, na Asekerona na gaha ringara, na Ekurone na gaha ringara.

19Yekova adu na Yuda, ko ki di ringara abaagangara ni gako, ono ko arengba nga na do agu yo nanaraka ngboongboorago yo te, bambiko angbagida marã adu be yo.

20I ki fu Eburone fu Kareba, a wa Mose agumba ha; ko ki do awiri Anaka yo naadu biata.

21Ono ngbatunga Benyamina ado nga aYebuso ku sa yo nga agu yo nanaraka Yerusarema yo te. Si aYebuso asunga Yerusarema yo ti ni na ngbatunga Benyamina, ki da ku awere.

22Ngbatunga Yosefa andu kuti Betere na vura a, Yekova ki du na yo.

23Ngbatunga Yosefa akedi aboro ka maa rago kuti Betere. Rimo gu bakporo re nangia Ruza mbata.

24Abamoirago abi kumba ko nakuru bakporo yo, i ki ya fu ko, “Ani zungudi ro, mo yúgu ba rima ku bakporo vo in rani, ani amánga pa ro wenengaĩ.”

25Ko ki yugu ba rima ku bakporo yo fu yo, i ki mangi bakporo na basape, ono i ambu gu kumba re na rika ngbatungako dunduko i ga.

26Gu kumba re ki ga ku ringara aEto yo, ki dua bakporo yo ki yambu rimoho nga Ruza; si nga rimoho ki da ku awere.

27Manase ado nga agu aboro ku sa yo nanaraka Bete-sana yo na rogo agu akporo naadu pati he a te, na agu aboro nanaraka Tanaka yo na rogo agu akporo naadu pati he, na agu aboro nanaraka Doro yo na rogo agu akporo naadu pati he, na agu aboro nanaraka Yeberama yo na rogo agu akporo naadu pati he, na agu aboro nanaraka Megido yo na rogo agu akporo naadu pati he a te. Ono aKanano anye rogo gu ringara re kindi.

28Ho aYisaraere anyaki ni, i ki fu aKanano sa sunge kanga, ka i ado nga yo ku sa yo kpakaya ya.

29AEfuraima ado nga agu aKanano ku sa yo nga agu yo nanaraka Gezere yo te; ono aKanano anye dagba yo Gezere yo.

30Zeburuna ado nga agu aboro ku sa yo nanaraka Kitirona yo, na agu aboro nanaraka Narora yo te; ono aKanano anye dagba yo, ki ra fu yo sa sunge kanga.

31Asera ado nga agu aboro ku sa yo nanaraka Ako yo te, na agu yo nanaraka Sidona yo, na agu yo naadu Araba yo, na agu yo naadu Akiziba yo, na agu yo naadu Ereba yo, na agu yo naadu Afike yo, na agu yo naadu Robo yo a te.

32Ono aAsero anaraka dagba aKanano, nga agu yo naadu rogo gu ringara re, bambiko i ado nga yo ku sa yo te.

33Nafatari ado nga agu aboro ku sa yo nanaraka Bete-semese yo na agu aboro naadu Bete-anata yo a te, ono ko anaraka dagba aKanano nga agu yo naadu rogo gu ringara re. Atikawari agu aboro nanye Bete-semese yo i ara fu kina yo sa sunge kanga nga agu yo nanye Bete-anata yo a.

34AAmoro ki do ngbatunga Dana i ndu ku rogo ringara abaagangara, mbiko i aida nga ha fu yo i zorõ ku rogo ngboongboorago te;

35ono aAmoro ki niraki kindi pavuru Bagangara Erese, na ku Ayarona yo, na ku Sarebima yo a. Ono ngbatunga Yosefa amangi yo gbe, i ki ra fu yo sa sunge kanga.

36Ga aAmoro bangbandarago atona ti ba dakpa Akarabima yo, tona Sera yo ki da ku ngbi yo.

Jump to: Chapter 2 →