Judges 19

Zande

← Chapter 18 Jump to: Chapter 20 →

1Si adu wa gere, ho bakindo adu nga ni Yisaraere yo ya, gu boro Revi sa nasungu gii ringara abaagangara Efuraima yo, ko nadi debadia Betereme du Yuda yo.

2Badiako ki mangi bari na kura kumba, ki guari pati ko ki ndu ku bari yo Betereme du Yuda yo, ki ra koyo tipa diwi biama.

3Kumbari ki guari, ki ndu fuo ri, ka fura na ri zezeredi, ka yega na ri berewe. Ko adu na gako moyambu na adongi ue. Ko ki ye ku bari yo; ho ba de abi ko ni, rago ki ngba ti ko wa ko abi ko.

4Gbioko nangia ba gu de re, ko afu nga gene fu ko te. Ko ki raki koyo biata. I ki ri riahe ki nimbiri he, ki ra yo.

5Ti Diama uru, i ki guari ngbatutu wiso, ko ki mbakadi tiko ka ga. Ono ba gu de re ki ya fu kumbari, “Mo ngárãsi kpotoro yo na bete riahe, fuo ho oni ki ga.”

6Si du i ki sungu, ki ri he ki nimbiri he, i ue wa sa. Ba gu de re ki ya fu kumba, “Mi zungadi ro, si ngba ti ro mo ra erẽ areme, kpotoro yo ki ngi angi.”

7Ho kumba aguari ni ka ga, gbioko ki darĩ ko, ko ki ra yo berewe.

8Ko ki guari ngbatutu wiso ti bisue uru ka ga. Ba gu de re ki ya, “Mi nazungadi ro, mo ngárãsi kpotoro yo ki sungu daho uru ka ti ni.” Si du i ue ki ri riahe.

9Ho kumba aguari ni ka ga, ko na badiako na gako moyambu, gbioko ki ya fu ko, nangia ba gu de re, “Mo ngére, uru nandu gbe ka ti; mi nazungadi ro, mo rá berewe areme. Mo ngére, uru nandu ka ti, mo rá no, kpotoro yo ki ngi angi. Wiso mo ki ndu ga nduge ngbatutu, mo ki ga ku kpuro yo.”

10Ono kumba aida nga ka sunga yo ni gu yuru re te; ko ki guari ki ga, ki da ku pati Yebusa yo, si sa na Yerusarema. Adongi adu na ko ue, na abasunga ni tapatapa ha ku auru ra, i adu na badiako a.

11Ho i ambedi ni ku pati Yebusa yo, uru ki ima ndu gbe. Moyambu ki ya fu bairako, “Mi zungadi ro, oni yé, ani kpára ku rogo gi ga aYebuso bakporo re, ki ra yo.”

12Bairako ki ya fu ko, “Ani akpára nga ku rogo gu bakporo nga ga kungba aboro te, adu nga ni ga awiri aYisaraere yo ya; ono ani súsi kina ku Giba yo.”

13Ko ki ya fu gako moyambu, “Mo yé, ani mbédi na gu ba sa, ani ki ra Giba yo, watadu Rama yo.”

14I ki susi tie ki ndu gayo nduge; uru ki ti yo mbembedi na Giba, nangia ga aBenyamino bakporo.

15I ki kpara koyo, ka ndu ka ra Giba yo. Ko ki rimi koyo, ki sungu gene bakporo yo; bambiko boro adu nga ho sa nayambu yo ku kpuni yo i ra yo te.

16Mo ngére, gbinza kumba ayega ati yo ti gako sunge, ho rago abiri ni. Ko adu ni boro ringara abaagangara Efuraima, ono ko asungu ku Giba yo. Aboro gu rago re nangia aBenyamino.

17Ko ki tuka bangiriko ki bi gu nungunungu kumba re gene bakporo yo; gu gbinza kumba re ki ya fu ko. “Mo nandu ku wari? Wari ye mo ni?”

18Ko ki ya fu ko. “Ani niguari Betereme du Yuda yo ka susa ku gii ringara abaagangara Efuraima yo, yo mi niye ni. Mi andu ku Betereme du Yuda yo, mi nandu awere ku rogo ga Yekova bambu yo, a ngaborosayamburekukpuniyote.

19Ono kazimoru be re na riahe tipa gaani adongi, kpokuta ho a na imekakue tipa re, tipa ga moyambu nga de a, tipa gu paranga kumba du na gamo amoyambu; zingohe amanga nga rani wa sa te.”

20Gu gbinza kumba re ki ya. “Mo dú na zereda; gu he zingo ho ka manga ro si kina be re, ono ka mo rá nga bangiri gene ya.”

21Si du ko ki rimisi ko ku dimo kpuko yo, ki fu riahe fu adongi. I ki zundu nduyo, ki ri riahe ki nimbiri he.

22Ho i asungu ni ka re pai na mongo ku kpotoyo yo, oni ngére, akumba gu bakporo re nangia gbegberẽ sino aboro, i ki moi rago pati bambu, ningoka ngbadimo gbe. I ki fura na baira bambu nangia gu gbinza kumba re, ki ya, “Mo kúsi gu kumba nirimi ku rogo ga bambu, ani íni ko.”

23Kumba ki kuru fuo yo, nangia baira bambu, ki ya fu yo, “Oó, awirinami, mi zungadi roni, ka oni mángi nga gbigbitapai wo ya; bambiko wa ye gi kumba re ku kpure no. Ka oni mángi nga gi mumungo pai re ya.

24Oni ngére, wire nga ngasu de du re, na badiako a. I mi akúsa yo awere, oni wási yo, ki mangi fu yo a wa si ka ngba ti roni. Ono ka oni mángi nga gu mumungo pai re fu gi kumba re ya.”

25Ono akumba agia nga sangbako te. Si du gu kumba azi badiako ti ni, ki kusi ri fu yo. I ki ini ri, ki niwasi ri yuru sasasa dunduko ki da ku wiso. Ho rago atona ka gira ni, i ki mbu ri ri ga.

26De ki ye ho rago atona ka gira ni, ki ti pa ngbadimo ga gu kumba bambu re, yo bairari adu ni, daho rago agiri ni.

27Bairari aguari ku ari wiso, ki za ngbadimo bambu, ki nikuru ka ndu gako nduge. Oni ngére, gu de nangia badiako re, ati pati ngbadimo bambu, beri ki zi ba rima ti ngbadimo bambu.

28Ko ki ya fu ri, “Mo gúari, ani ndú nga.” Ono ri akaraga nga pai te. Ko ki tumba ri ku auru dongi; ki guari, ki ndu ki da ku kpuko yo.

29Ho ko arimi ni ku bambu yo, ko adi sape, ki di kangba badiako, ki yepe rogo ri, ki kparaka amemeri wa ahe 12, ki kedi he ku rogo bangbanda ringara aYisaraere dunduko.

30Agu yo dunduko nabi he, i ki ya, “I amanga nga pai ki bi pai wa ngbatunga gi mangapai mbata te re, tona ho awiri aYisaraere aguari ni Ezipeta yo ki da ti gi uru re. Oni mákia pa ha, ki saki pai ki gumba pai kuti ni.”

← Chapter 18 Jump to: Chapter 20 →