Judges 12

Zande

← Chapter 11 Jump to: Chapter 13 →

1Aboro Efuraima adungura tiyo sa vura, ki si ku mbiti yo ku Safona yo, ki ya fu Yepeta, “Tipagine mo asi ti ni ka so vura kuti aAmono, ka mo ayamba nga rani ani ndu na mo ya? Ani azó ga bambu ku ri ro ni we.”

2Yepeta ki ya fu yo, “AAmono azuna re na gimi aboro gbe; ho mi ayambu roni ni tigaoni, oni abatasa nga re be yo te.

3Ho mi abi he ni, ya oni abatasa nga re te, mi ki zadi ngbadure kina bere, ki si kuti aAmono, Yekova ki fu yo ku be re. Tipagine ye oni ti ni kuti re ni gi uru re, ka so vura na mi?”

4Yepeta ki dungura aboro Girada dunduko, ki so vura na aEfuraima. Aboro Girada ki di be aboro Efuraima, bambiko i aya, “Oni tigaoni nga aGirado, oni nga ga aEfuraima merẽmerẽ aboro, dagba aEfuraima yo na ku dagba aManase yo a.”

5AGirado adi gu basigo Yaradene nambedi na aEfuraima. Si ki ye ka du wa gere, ho merẽmerẽ boro Efuraima aya ni, “Oni ídi he fere mi si,” aboro Girada aya fu ni, “Boro Efuraima nga mo?” Ho ni aya ni, “Oó,”

6i ki ya fu ni, “Mo pe Siyiboreta awere.” Ni ki ya, “Siboreta”; bambiko ni arengba nga na pe he nzunzu te. I ki zi ni, ki imi ni basigo Yaradene yo. Agu yo nakpiki nangia aboro Efuraima ni gu rago re, i adu wa aboro 42,000 nga aboro Efuraima.

7Yepeta azogo aYisaraere tipa garã sita. Yepeta ki kpi nangia boro Girada, i ki kpisidi ko rogo kina gako bakporo Girada yo.

8Fuo ko Ibasana nangia boro Betereme ki zogo aYisaraere.

9Awiriko adu 30 nangia akumba, ko ki fu agu awiriko 30 re nangia ade fu akumba ku rogo kura ringara. Ko ki ye na kura ade 30 rogo kura ringara tipa agu awiriko nangia akumba. Ko azogo aYisaraere tipa garã saba.

10Ibasana ki kpi, i ki kpisidi ko Betereme yo.

11Fuo ko Erone ni ngbatunga Zeburuna ki zogo aYisaraere. Ko azogo aYisaraere tipa garã bawe.

12Erone ki kpi nangia ngbatunga Zeburuna, i ki kpisidi ko Ayarona yo rogo ringara Zeburuna.

13Fuo ko Abidona nangia wiri Irera ni ngbatunga Piratona ki zogo aYisaraere.

14Awiriko adu 40 nangia akumba, atitako adu 30 nangia akumba a. I andu ri awiri adongi 70. Ko azogo aYisaraere tipa garã muambi.

15Abidona ki kpi, nangia wiri Irera nangia ngbatunga Piratona. I ki kpisidi ko Piratona yo rogo ringara Efuraima, rogo gu ringara abaagangara nga ga aAmareko.

← Chapter 11 Jump to: Chapter 13 →