Judges 20

Zande

← Chapter 19 Jump to: Chapter 21 →

1Awiri aYisaraere ki kuru dunduko, rimbasa aboro ki dungura tiyo wa boro sa koyo du Yekova ni ku Misipa yo, i aye Dana yo ki da ku Bera-saba yo, na ringara Girada a.

2Ga aboro abaakumba nga ga kina angbatunga aYisaraere yo dunduko, ki yugu tiyo rogo gu badungurati nga ga ga Mbori aboro, nga agu aborosovura naandu ni nduyo naamo basape wa aboro 400,000

3Were, aBenyamino ki gi he ya awiri aYisaraere andu ku Misipa yo. Awiri aYisaraere ki ya, “Oni gúmba pa ha fu rani, waĩ ye gi gbigbitapai re ka du?”

4Gu boro Revi nangia k umba ku gu de i aimi re, ki karaga pai ki ya, “Mi aye ku Giba yo nangia ga aBenyamino bakporo, mi na badiare, ki ra yo.

5Aboro Giba ki mo kuti re, ki moi rago kuti re pati bambu yuru. I ki berẽ pa imo re a, i ki wasi badiare, ri ki kpi.

6Mi ki di badiare, ki yepe rogo ri ki kedi he ku rogo gu ringara nga ga aYisaraere; bambiko i amangi wasiro na mumungo pai Yisaraere no.

7Oni ngére, oni nga awiri aYisaraere, oni dunduko, oni gúmba fugoroni kuti ni na sangbaroni.”

8Aboro ki guari ku ari dunduko wa boro sa, ki ya, “Gu ni sa dagba rani andú nga ku rogo gani bamburoko yo te, gu ni sa dagba rani akáraga nga tint ku kpuni yo a te.

9Ono gere nga gu pai ani akamanga kuti Giba: ani andu kuti ni be ba ani ake,

10ani aaia akumba bawe dagba agu yo du 100 dunduko, dagba angbatunga aYisaraere, na 100 dagba agu yo du 1,000, na 1,000 dagba agu yo du 10,000, i ye na ũngba fu aboro. Ho i ka da ni ku Giba yo nga ga aBenyamino bakporo, i ki rengbe na manga pai kuti gu mumungo pai i amangi he Yisaraere no re.”

11Si du aYisaraere dunduko adungura tiyo ti ni kuti bakporo, ni kpamiakpamia yo wa sa.

12Angbatunga aYisaraere ki kedi akumba ku rogo ringara ngbatunga aBenyamino dunduko, ki ya, “Gini gbigbitapai nga gere ye da ku dagba roni?

13Awere oni kúsi agu akumba re nangia gbegberẽ sino aboro nadu Giba yo, ani ími yo, ki di gu gbigbitapai re ku sa yo Yisaraere no.” Ono ngbatunga aBenyamino aida nga ka gia sangba awirinayo nangia awiri aYisaraere te.

14ABenyamino ki dungura tiyo rogo abaakporo dunduko ku Giba yo, ka ndu ka so vura kuti awiri aYisaraere.

15I ki gedi aBenyamino ni gu uru re naye rogo abaakporo wa aboro 26,000 naamo basape, gbia kuti agu yo nanaraka Giba yo, naadu ni gedigedi yo ni siasia yo 700.

16Dagba gi siasia aboro dunduko re, aboro adu 700 ni aborogare. I dunduko arengbekababarioko ni ru be kuti gu mangeri boro sa, ka i agusa nga ha ya.

17Agu aYisaraere angia nga ga Benyamina yo ya, ki du ni gedigedi yo wa aboro 400,000 naamo basape; agi yo re dunduko adu ni aborosovura.

18Awiri aYisaraere ki mo ku ari, ki ndu ku Betere yo, ki sana he tipa sangba Mbori. I ki ya, “Da nikandu mbata dagba rani na vura kuti aBenyamino?” Yekova ki ya. “Yuda nikandu mbata.”

19Awiri aYisaraere ki mo ku ari wiso, ki zi bataya pati Giba.

20Akumba aYisaraere ki kuru ka so vura kuti aBenyamino. Akumba aYisaraere ki tangara tiyo sa vura kuti agu yo naadu Giba yo.

21ABenyamino ki kuru Giba yo, ki imi aYisaraere ku sande ni gu uru re wa aboro 22,000.

22Ono akumba aYisaraere ki ngárãsi tiyo, ki tangara tiyo sa vura berewe rogo gu ba i atangara tiyo ku rogo ho ti bambata uru.

23Awiri aYisaraere ki dakpa ki nikpari ku bara bangiri Yekova ki da ku nyemu; i ki sana Yekova, ki ya, “Ani mbédi berewe na vura kuti aBenyamino nga awirinarani?” Yekova ki ya. “Oni ndú sa yo.”

24Awiri aYisaraere ki mbedi kuti aBenyamino ni ue uru.

25ABenyamino ki kuru Giba yo kuti yo ti ue uru, ki imi awiri aYisaraere ku sande wa aboro 18,000; nga agu yo dunduko naamo basape.

26Awiri aYisaraere dunduko na aborosovura dunduko ki ndu ki da ku Betere yo, ki nikpari; i ki sungu yo bara bangiri Yekova, ki nigina riahe ni gu uru re ki da ku nyemu. I ki fu zozo amotumo na amotumo zereda ku bara bangiri Yekova.

27Ga Mbori sanduki mokido adu yo ni gu rago re, Finasa nangia wiri Erazara nanaru barangba ha ti agu arago re, Erazara nangia wiri Arona. Awiri aYisaraere ki sana Yekova ki ya, “Ani kúru berewe na vura kuti aBenyamino, nga awirinarani, watadu ani mbú he?” Yekova ki ya, “Oni ndú, bambiko mi nikafu yo ku be roni gba.”

29AYisaraere ki moi abamoirago ku pati Giba kirikiri.

30Awiri aYisaraere ki ndu kuti aBenyamino ti biata uru, ki tangara tiyo kuti Giba, a wa si adu mbata.

31ABenyamino ki kuru kuti aboro, ki turũ ti bakporo na vura; i ki tona ka manga aboro na ka imo agu yo wa aboro aYisaraere 30, a wa si adu mbata, bangiri basikisiki agene, gu sa nanandu ku Betere yo, gu kura ha ki nindu ku Giba yo, na gu ku haurago yo a.

32ABenyamino ki ya, “I du ni mangimangi yo ku barangba rani, a wa si adu ti bambata ha.” Ono akumba aYisaraere ki ya, “Ani óro aora, ki gbe yo bakporo yo ku bangiri basikisiki agene.”

33AYisaraere ki guari dunduko ba yo, ki tangara tiyo Bara-tamara yo; ga aYisaraere abamoirago ki gbadi ba yo yo Geba yo ku dioyo.

34Aboro ki kuru kuti Giba Yisaraere yo dunduko wa siasia aboro 10,000, vura ki du ni kere he; ono aBenyamino aina nga ya gbigbitapai nambeda na yo te.

35Yekova ki mangi aBenyamino ku barangba aYisaraere; akumba aYisaraere ki imi aBenyamino wa aboro 25,000 ni gu uru re. Agi yo re dunduko naamo basape.

36Si du aBenyamino ki bi he ya i ima dia be yo. Akumba aYisaraere ki gbisi ku mbata yo be aBenyamino, bambiko i akida kuti agu abamoirago i amoi yo kuti Gma.

37Abamoirago ki ipisi tiyo, ki zuba Giba; abamoirago ki gbe tiyo, ki imi bakporo dunduko na basape.

38Were gu yuguyugupai i aringbisi he dagba aYisaraere nga akumba nga abamoirago nangia gere, ho i ka zokoda rago ni, ngimihe ki nigundu ni babakere he kuya ku ari bakporo yo,

39akumba aYisaraere ki sa tiyo sa vura berewe. Were aBenyamino atona ka manga yo na ka imo aboro aYisaraere wa aboro 30; i ki ya, “Ni rengo, i tigayo du ni mangimangi yo barangba rani, a wa si adu ti bambata vura.”

40Ono ho ngimihe atona ka gundo ni kuya ku ari bakporo ya wa bakamikami dubo, aBenyamino ki ngere ku giiyo yo, bakporo dunduko agundo na ngimihe kuya ku ari ku ngbangbaturũ yo.

41Akumba aYisaraere ki sa tiyo, si ki iriwo ti aBenyamino, bambiko i abi he ya gbigbitapai ye ku ri yo.

42Si du i ki sa gii yo fu aboro aYisaraere ki merẽ ngba gene ku ngbakungba yo; ono vura apeke fuo yo gbegberẽ, agu yo nakuru abaakporo yo i ki gbarasi yo dagba yo.

43I ki kisi rago pati aBenyamino kirikiri, ki do yo, ki nisimbi yo baongoda yo, ki da ku Giba ku uroyo.

44ABenyamino ki kpi wa aboro 18,000 nangia kangarã aboro dunduko.

45I ki sa tiyo ki nioro ku ngbakungba yo sa mbia Rimona. I ki zi agu yo ngba basikisiki agene wa aboro 5,000, ki nipe fuo yo ni ome ki da ku Gidoma yo, ki imi agu yo wa aboro 2,000.

46Aguyonakpikiniguuru re nangia aBenyamino i adu wa aboro 25,000 naamo basape, i dunduko adu ni kangarã aboro.

47Ono aboro 600 ki sa tiyo ku ngbakungba yo sa mbia Rimona, ki nye pati mbia Rimona tipa diwi biama.

48Akumba aYisaraere ki sa tiyo berewe kuti aBenyamino, ki imi yo na basape, nga aboro na zogozogo anya na agu ahe dunduko i abi. Agu abaakporo dunduko i abi he, i azokodi he a.

← Chapter 19 Jump to: Chapter 21 →