Judges 4

Zande

← Chapter 3 Jump to: Chapter 5 →

1Fuo kpio Euda, awiri aYisaraere ki nimangi gu pai nadu ni gbigbita ha bangiri Yekova berewe.

2Yekova ki fu yo ku be Yabina nangia bakindo Kanana, nazogo rago Asora yo. Gako barutiri rimbasa aborovura nangia Sisera, nanaraka Arosete-a-goima yo.

3Awiri aYisaraere ki kpari fu Yekova tipa undahe bambiko angbagida marã nga ga vura adu be ko 900. Ko arungosi awiri aYisaraere gbe garã ki du 20.

4Debora nangia denebi, nangia dia Rapidota, ri naasapa ngbanga aYisaraere ti gu rago re.

5Ri asunga tii gu mbiro nangia ga Debora bangbanda Rama na Betere rogo ringara abaagangara Efuraima; awiri aYisaraere ki niye koyo du ri ni tipa sarangbanga.

6Ri ki kedi sunge ni ndú ka yamba Baraka nangia wiri Abinoama Kedese du Nafatari yo. Ri ki ya fu ko, “A nga Yekova nga ga aYisaraere Mbori naruga ro, niya, ‘Mo ndú ki dungura aboro ku bagangara Tabora yo, ki rogo akumba 10,000 fuo ro dagba ngbatunga Nafatari, na dagba ngbatunga Zeburuna yo, te?

7Mi agbé Sisera, nga ga Yabina barutiri rimbasa aborovura, koyo du mo ni, ku pati gu di nga Kisona, na gako angbagida vura na gako rimbasa aboro a; mi afú ko ku be ro.’ ”

8Baraka ki ya fu ri, “Ka ani ndú na mo tigu, mi ndu andu tie; ono ka ani andú nga na mo ya, mi andú nga a te.”

9Ri ki ya, “Ani andú andu na mo tigu; ono gu nduge mo ka ndu si adú nga ni irisa foro te, bambiko Yekova afú Sisera kina ku be de.” Debora ki guari, i ki ndu na Baraka ku Kedese yo.

10Baraka ki yambu aZeburuna na Nafatari ku Kedese yo. Akumba ki ndu fuo ko wa 10,000. Debora ki ndu na ko a.

11Ebere boro Kene akpara tiko na aKeno, nangia atita Obaba nangia gbio Mose. Ko adua gako bamburoko tuturu pati gu gero naadu Sananaima yo, naadu mbembedi na Kedese.

12I ki gumba ha fu Sisera ya Baraka ndu ku Bagangara Tabora yo nangia wiri Abinoama.

13Sisera ki dungura gako angbagida yura dunduko, nga kinaku angba gida marã 900, na agu aboro dunduko naadu fuo ko, tona ti Arosete-a-goima yo, ki da ti gu di nga Kisona.

14Debora ki ya fu Baraka, “Mo gúari! Bambiko gi uru du areme re, si nga gu uru fu Yekova Sisera rogo ku be ro. A nga Yekova nangbe ku mbata yo foro, te?” Si du Baraka ki zorõ ri Bagangara Tabora yo, na aboro wa 10,000 naapeka fuo ko.

15Yekova ki mangi Sisera, na gako angbagida vura dunduko, na gako rimbasa aborovura, ni basape ku bara bangiri Baraka. Sisera ki zorõ rogo ngbagida vura yo ku sande, ki oro ni nduko.

16Ono Baraka ki nido fuo angbagida vura, ti fuo rimbasa aborovura a, ku Arosete-a-goima yo, rimbasa aborovura dunduko nangia ga Sisera yo, ki kpiki be basape; ka boro anye nga wa sa ya.

17Ono Sisera aoro tigako ni nduko koyo du gu bamburoko ni nangia ga Yaere dia Ebere nangia boro Kene; mbiko zereda adu dagba Yabina bakindo Asora na ngbatunga Ebere boro Kene.

18Yaere ki kuru ku zegi yo ka gbia Sisera, ki ya fu ko, “Mo rími ku dimo no, gbia, mo rími fuo re; ka mo gúnde nga ya.” Ko ki rimi fuo ri ku tii bamburoko yo, ri ki dadi ko na roko.

19Ko ki ya fu ri, “Mi nakpara foro, mo fú ime fere toni mi mbíri he; bambiko gomoro ime namanga re.” Ri ki za mangu kpoto mamunya adu rogo ho, ki fu he fu ko ko mbiri he, ri ki dadi ko na roko.

20Ko ki ya fu ri, “Mo rú ngbadimo bamburoko yo, ka boro ye ki sana ro, ki ya, ‘Boro erẽ?’ mo ki ya, Oó.”

21Ono Yaere dia Ebere ki di ngua bamburoko, ki di bande ku be ri, ri ki pita yee koyo du ko ni, ki banga gu ngua re ku pavuru riko, daho si akuru ni ki rũ sende, bambiko ko adu na ndundundu rame be mbugo. Si du ko ki kpi.

22Oni ngére, wa Baraka ado fuo Sisera, Yaere ki kuru ku zegi yo ki gbia ko, ki ya fu ko, “Mo yé mi yúgu gu boro foro mo agbata ni.” Ko ki rimi fuo ri ku bamburoko yo; kangba Sisera ki pi sande, ngua bamburoko ki du pavuru riko.

23Si du Mbori adi be Yabina ti ni ni gu uru re, nangia bakindo Kanana barangba awiri aYisaraere.

24Awiri aYisaraere ki nyakasi tiyo kuti Yabina nangia bakindo Kanana kindi, ki da ho i anyasi Yabina ni nangia bakindo Kanana.

← Chapter 3 Jump to: Chapter 5 →