Judges 21

Zande

← Chapter 20 Jump to:

1Were akumba aYisaraere azunga he Misipa yo, ki ya, “A nga boro dagba rani sa ka fu wirini nga de fu boro Benyamino ni diani te.”

2Aboro ki ye ku Betere yo, ki sungu yo ki da ku nyemu ku bara bangiri Mbori, ki nipoi ku ari ni fugoyo, ki nikpari ni aume gbe.

3I ki ya, “Ako Yekova, ga aYisaraere Mbori, tipagine si aye ka du ti ni wa gere ku Yisaraere no, ya ngbatunga aYisaraere kpa areme sa?”

4Si ki ye ka du wa gere wiso, ya aboro aguari ngbatutu, ki dua bamotumo yo, ki nifu zozo amotumo na amotumo zereda.

5Awiri aYisaraere ki ya, “Da dagba angbatunga aYisaraere yo dunduko aye nga tipa ga Yekova dungurati ya?” Bambiko i azunga he ni bakere he tipa gu ni ka aye nga koyo du Yekova ni ku Misipa yo ya, niya, “I aímo ni aimo ni rengo.”

6Awiri aYisaraere adu na nunga tipa ngbatunga aBenyamino nangia awirinayo, ki ya, “Gi uru re ngbatunga sa du ni kparakpara ha ku sa yo ti aYisaraere.

7Ani amánga waĩ ka bi ade tipa agu yo nanye, bambiko wa ani tigaani azunga he ni rimo Yekova ya ani afú nga awirani nga ade fu yo ni adiayo te?”

8I ki ya, “Gini ngbatunga dagba angbatunga aYisaraere yo aye nga koyo du Yekova ni, ku Misipa yo ya?” Oni ngére, a nga boro sa aye ku bataya yo Yebesagirada yo tipa dungurati te.

9Bambiko ho i agedi aboro ni, oni ngére, a nga boro sa adu yo naraka Yebesa-girada yo te.

10Rimbasa aboro ki kedi aboro koyo wa 12,000 nangia ngangarã aboro ki susi, ki rugu yo niya, “Oni ndú ki mangi araki Yebesagirada yo ni basape, na ade gbia kuti rukutu agude a.

11Gere nga gu pai oni ka manga ha; oni abá tunga akumba dunduko na agu ade dunduko naina pa akumba.”

121 abi paranga ngasu ade 400 dagba araki Yebesa-girada yo, nangia agu yo aina nga pa akumba ya. I ki ye na yo ku bataya yo ku Siro yo, naadu ringara Kanana yo.

13Rimbasa aboro dunduko ki kedi pai ki ya fu agu aBenyamino naadu pati mbia Rimona, ki taki pande pa zereda fu yo.

14Aboro Benyamina ki karaga tiyo ti kina gu rago re; i ki fu agu ade fu yo nangia agu yo i abatasi yo ni ungayo dagba agu ade Yebesa-girada yo; ono i arengba nga na yo dunduko te.

15Aboro ki du na nunga tipa aBenyamino bambiko Yekova amoi kparaka dagba angbatunga aYisaraere.

16Ga rimbasa abaakumba ki ya, “Ani amánga waĩ tipa ade tipa agu yo nye, wa i aba tunga ade Benyamina yo?”

17I ki ya, “Ade ka du tipa agu yo nabati nga ngbatunga Benyamina, ka i gbárasi nga gu ngbatunga Yisaraere yo ya.

18Ono ka ani tigaani fú nga awirani nga ade fu yo ni adiayo ya.” Bambiko awiri aYisaraere azunga he, niya, “I tíwa gu ni ka fu de fu ngbatunga Benyamina.”

19Si du i ki ya, “Oni ngére, ga Yekova pumbo nidu Siro yo na garã na agarã pati Betere ku nodiyo, ku pangba gu basisi gene du ku uroyo ndu Betere yo ku Sekeme yo, na pati Reoona ku sudiyo.”

20I ki rugu aBenyamino, niya, “Oni ndú ki pidi rago pati abakakue yo,

21ki ngere; si ngia awiri aboro Siro nga ade akúra ka do gbere, oni ki kuru aati bakakue yo, gu ni ki zi wiri aboro Siro nga de ni ba sa sa ni diani, ki ga ku ringara Benyamina yo.

22Ho abayo ka paa ni na ani, watadu akawiriyo, ani ayá fu yo, ‘Oni ídi payo aida fu rani zezeredi, bambiko wa ani aroga nga ade tipa akumba kperekese rago vura ya, oni afu nga yo fu yo a te. Ka pai dũ ku ri roni awere.’”

23ABenyamino ki mangi wo, ki rogo adiayo, rengbe na gedigedi yo, dagba agu yo nado gbere, nangia agu yo i aga na yo ku kpuyo yo. I ki ndu, ki karaga tiyo ku rogo gayo ringara yo, ki dua abaakporo, ki nye rogo ho.

24Awiri aYisaraere ki guari yo ti gu rago re, gu ni kina koyo du ngbatungani ni, koyo du gani rika ni. I ki guari yo ki ndu ni oa sa sa ku rogo gayo ringara yo.

25Ni gu rago re bakindo adu nga Yisaraere yo te. Ono aboro anamanga kina gu pai naaru bangiriyo ni ba sa sa.

← Chapter 20 Jump to: