Judges 13

Zande

← Chapter 12 Jump to: Chapter 14 →

1Awiri aYisaraere ki nimángi gu pai berewe nadu ni gbigbita ha bangiri Yekova; Yekova ki fu yo ku be aFereseto tipa garã 40.

2Kumba adu yo ni boro Sora, nangia ngbatunga Dana, rimoko angia Manoa. Diako adu ni irazangada, ka ri avunga nga ya.

3Ga Yekova maraika ki yugu tiko fu gi de re, ki ya fu ri, “Mo ngére, awere, irazangada nga mo, mo ata vunga nga te; ono mo adú na mobara, ki batika kumbagude.

4Awere tie, mi nazungadi ro, mo bánda tiro, ka mo mbíri nga imekakue watadu baripiro ki kpi he ya. Ka mo ri nga agu ahe i nagina ha wa nyakorokpa a ya,

5bambiko mo adú na mobara, ki oatika kumbagude. I akpé nga mangeriko ni kperi te, bambiko gi gude re adú ni boro Nazara fu Mbori tona kina rukumbu yo; ko atóna batasa aYisaraere be aFereseto.”

6Gu de re ki ye ki gumba pa ha fu kumbari, ki ya, “Ga Mbori kumba niye kono du mi ni, kpakpuko nidu wa kpakpu ga Mbori maraika ni iiriwo ho gbe; mi nasana nga ko wari ko aye ni te, ko nayamba nga rimoko fere a te.

7Ono ko niya fere, ‘Mo ngére, mo adú na mobara, ki batika kumbagude. Ka mo mbíri nga imekakue watadu baripiro ki kpi he ya, ka mo ri nga agu ahe i nagina ha wa nyakorokpa a ya, bambiko gu gude re adú ni boro Nazara fu Mbori tona kina rukumbu yo dati gu rago ko ka kpi.’ ”

8Manoa ki zungadi Yekova, ki ya, “Ako Yekova, mi zungadi ro, mo ídi he gu ga Mbori kumba mo akedi ko mbata, ko yé kono du ani ni berewe, ko yugu gu pai fu rani ani ka manga tipa gu gude i ka batika ko.”

9Mbori ki gi fugo Manoa, ga Mbori maraika ki ye berewe koyo du gu de ni re wa ri asungu ati yo; ono Manoa nangia kumbari, ko adu nga na ri yo te.

10De ki ipisi tiri, ki oro, ki gumba ha fu kumbari, ki ya fu ko, “Mo ngére, kumba ye kono du mini, nga gu ko naye ni gu rago.”

11Manoa ki guari, ki ndu fuo diako, ki ye koyo du gu kumba ni re, ki ya fu ko, “Mo nga gu kumba nafura na gi de re?” Ko ki ya, “Mi nga ko.”

12Manoa ki ya, “Ho sangbaro ka da ni ti rengo, gu kumbagude re ko adú ni gini ngbatunga gude, ani amánga waĩ tipa ko?”

13Ga Yekova maraika ki ya fu Manoa, “Kina agu apai mi agumba ha fu de, ri bánda kina pa ha.

14Ka ri rí nga gu he nakura ti bakakue ya, ka ri mbíri nga imekakue na baripiro ki kpi he ya, ki ri agu ahe i nagina ha wa nyakorokpa a ya. Agu apai mi arugu ri kuti ni, ri mángi kina ha.”

15Manoa ki ya fu ga Yekova maraika, “Mi zungadi ro, ani káraga ro mbata, ani mbákadi wiri meme tipa ro.”

16Ga Yekova maraika ki ya fu Manoa, “Ka oni vura karaga re, mi arí nga gaoni riahe te, ono ka oni mbákadi zozo motumo, oni ki fu he fu kina Yekova.” Manoa aina nga ha ya ko nga ga Yekova maraika te.

17Manoa ki ya fu ga Yekova maraika, “Rimoro nga da, ho i ka digisa gamo apai ni, ani ki rengbe na irisa ro?”

18Ga Yekova maraika ki ya fu ko, “Tipagine mo asana he ti ni tipa rimore, wa du he ni iiriwo ho?”

19Manoa ki di wiri meme na motumo riahe, ki tumo na ni ri mbia fu Yekova, maraika ki mangi pai ni iiriwo ho, aManoa ki bi he na diako.

20Bambiko ho mirãwe andu ni ku ngbangbaturũ yo ri bamotumo yo, ga Yekova maraika ki ga rogo mirãwe bamotumo yo, aManoa ki bi he na diako. I ki tiwi ki vagadi ku sande ni kpakpuyo.

21Ono ga Yekova maraika ayugo nga tiko fu Manoa berewe te, fu diako a te. Si du Manoa aini he ti ni ya, ga Yekova maraika nangia ko.

22Manoa ki ya fu diako, “Ani akpí ni rengo, bambiko ani bi Mbori.”

23Ono diako aya fu ko, “Ka si angba ti Yekova ka imo rani, ka ko adi nga zozo motumo be rani te, na motumo riahe a te, ka ko ayugu nga agi apai re dunduko fu rani a te, ka ko agumba nga agi apai fu rani re ni gi rago re a ya.”

24Gu de re ki batika kumbagude, ki yambu rimoko nga Samusona; gude ki nisono, Yekova ki nifu maku fu ko.

25Ga Yekova Toro ki tona wo ti ko Mane-dana yo, du dagba Sora na Esetaora.

← Chapter 12 Jump to: Chapter 14 →