Judges 7

Zande

← Chapter 6 Jump to: Chapter 8 →

1Were Yerubara (ko nga Gidona,) ki guari ngbatutu, na agu aboro dunduko naadu na ko, ki zi bataya pati gu gugaabi nga Aroda; ga aMidiano bataya ki du ku nodiyo, pati gangara More, rogo ngboongboorago.

2Yekova ki ya fu Gidona, “Agu aboro nga agu yo du na mo, nge yo ange ki susi, ka mi fú nga aMidiano ku be yo te, aYisaraere ka abia tiyo fere, ki ya, ‘Kina boro berani nabatasi rani.’

3Wa du he were, mo ndú ki taki pande he fu aboro, ki ya, ‘Gu ni gunde agunde gbe nikigi akiga, ni káraga tini awere ki ga ku kpuni yo.’ ” Gidona ki asadi yo, aboro ki karaga tiyo wa 22,000, agu yo ki nye wa aboro 10,000.

4Yekova ki ya fu Gidona, “Aboro ni ngenge yo kindi ki susi, mo ndú na yo ku di yo, mi ásadi yo yo foro. Si adú wa gere, agu yo mi Ka ya foro, ‘I ndú na mo,’ kina yo ki ndu na mo; agu yo mi ka ya, ‘Ka i ndú nga na mo ya,’ ka i andú nga na mo ya.”

5Si du ko andu na aboro ti ni ku di yo. Yekova ki ya fu Gidona, “Agu yo nikasira ime ni mirãyo, wa ange nasira ha, mo ki kpara yo ku bani; agu yo nikakuka sande ngba rukusuyo ka mbira ime, mo kpára yo a wo.”

6Agu yo natu ime ni beyo ku ngbayo, ka sira ha, i adu wa aboro 300. Ono kura aboro akuku dunduko ngba rukusuyo ka mbira ime.

7Yekova ki ya fu Gidona, “Mi abátasa roni ku be agu aboro 300 re siri ime, ki fu aMidiano ku be ro. Mo mbú kura aboro dunduko i káraga tiyo ku kpuyo yo.”

8Were aboro ki di gayo riahe ku be yo, na nambongo. Ko ki karaga agu aYisaraere dunduko ku rogo gayo abamburoko ni ba sa sa, ono ko ki ka kuti agu aboro 300 re. Ga aMidiano bataya ki du zorõzorõ rago ngboongboorago yo.

9Ni kina gu uru re Yekova ki ya fu ko. “Mo gúari, ki zorõ ku bataya yo; bambiko mi fu he ku be ro.

10Ono ka mo agúnde tigamo tipa zorã ni sa ro, mo ki zorõ ku bataya yo na ga moyambu nga Pura.

11Mo agía agu apai i ka gumba ha, fuo ho bero adú nyanyaki ka zorã kuti gayo bataya.” Ko ki zorõ na Pura nangia gako moyambu, ki da ti digida rago nga ga agu aborosovura naadu bataya yo.

12AMidiano na aAmareko na awiri ku Uroyo dunduko, i ki du rogo ngboongboorago wa ayere tipa nge yo. Gayo akameri ange ki susi ba geda ra, wa kina ngume pangba baime.

13Ho Gidona ada ni, oni ngére, kumba adu yo nagumba sangba musumo fu kura ko; ko ki ya. “Mo ngére, mi nirari musumo; were udiudi kpokuta i amangi he rogo ngungo wa ga mapunga niti ku dagba ga aMidiano bataya ki ye sa bamburoko, ki nari he anara, si ki ti, ki vagadi, bamburoko ki pi api sande.”

14Kura ko ki karaga ha ki ya, “A nga kura he nga gi te re, kina ga Gidona wiri Yoasa basape du, nga boro Yisaraere; Mbori fu aMidiano ku be ko, na rimbasa vura dunduko.”

15Ho Gidona agi peka pa gi musumo ni re, na pa sangbaha, ko ki irisi Mbori; ki karaga tiko ku rogo ga aYisaraere bataya yo, ki ya, “Oni guari; bambiko Yekova fu rimbasa aMidiano ku be roni.”

16Ko Ki kparaka gu aboro 300 re ni rikavura biata, ki mamoi anambongo ku beyo ni ba sa sa, na arunge ni ku he, na baro ni tigitigi he vuruhe yo.

17Ko ki ya fu yo, “Oni bí kina re, ki mangi a wa mi ka manga; ho mi ka da ni tigimi u ngba digida bataya, gu pai mi ka manga, oni ki mangi kina ha.

18Ho mi ka vu nambongo ni, ani na agu yo dunduko du na mi, oni ki vudi anambongo tigaoni a ku bani na ku bani pati bataya kirikiri dunduko, ki doí ku ari. ‘Si tipa Yekova na Gidona.’ ”

19Were Gidona na agu aboro naadu 100 na ko, i ki ye tie ku ti ngba digida bataya ti tonatona gu bandarago nga ga bebere yuru; ho i amoi vovo ababandarago ni; i ki nivudi anambongo, ki futuka agu arunge naadu be yo rukutu.

20Arikavura biata ki mongo vudi anambongo a, ki futuka arunge, ki zadi baro ku garebeyo yo. Anambongo ki du ku kumbabeyo yo tipa vuda ha; i ki poi ku ari ki ya, “Gu basape nga ga Yekova na ga Gidona!”

21I ki rundu kina ba yo ni ba sa sa pati bataya kirikiri, rimbasa aborosovura ki oro dunduko; i ki ta wawa ki oro.

22Ho i avudi anambongo 300 ni, Yekova ki nisa ga gu ni basape kina kuti kura ni, kuti rimbasa aborosovura dunduko a. Rimbasa aborosovura ki kiti ki oro ki da ku Bete-sita yo mbembedi na Sereda, ki da ti gu bangbandarago naadu Abere-mora yo, pati Tabata yo.

23Aboro aYisaraere ki kuru ringara Nafatari, na ringara Asera, na ringara Manase yo dunduko, ki dungura tiyo adungura, ki nido fuo aMidiano.

24Gidona ki kedi asunge ku rogo ringara abaagangara Efuraima yo, ki ya, “Oni zórõ fuo aMidiano, ki zi rago pati baime be yo, ki da ti Bete-bara yo, nga kina Yaradene.” Si du aboro Efuraima adungura tiyo ti ni dunduko, ki zi agu aime ki da ti Bete-bara yo, nga kina Yaradene.

25I ki zi abazogo aMidiano ue, nangia Orebe na Zeeba; i ki imi Orebe pati mbia Orebe, ki imi Zeeba pati due pirã bakakue nga ga Zeeba, wa i adanda aMidiano. I ki ye na ri Orebe na ga Zeeba fu Gidona ku mbiti Yaradene yo.

← Chapter 6 Jump to: Chapter 8 →