Ezekiel 11

Amharic Gofa GFBEVF (ጌሻ ማፃፋ)

← Chapter 10 Jump to: Chapter 12 →

1ፆሳ አያናይ ታና ደንድ፥ ፆሳ ኬስ ዶሎሀ ባጋ ፐንግያኮ ኤፍስ። ፐንግያ ማታን ላታማነ እቻሹ አደት ደኦሶና፤ ኤንታ ግዶን አሳ ካለያ አዙራ ናኣ ያእዛና ባናያ ናኣ ፓላፃ በአስ።

2ጎዳይ ታኮ፥ “ነኖ አሳ ናአዉ፥ ሀ አሳይ ካታማ ቦላ ኢታ ቆፋ ቆፖሶና፤ ኢታ ዞረ ዞረቶሶና።

3ኤንቲ፥ ‘ኑኒ ኬ ዛሪድ ኬፃና ዎደይ ማታትስ። ሀ ካታማይ አሾ ፃሮ፤ ኑኒ ቃስ አሾ’ ያጎሶና።

4ሄሳ ግሾ፥ ትንብተ ኦዳ፤ አሳ ናአዉ፥ ኤንታ ቦላ ትንብተ ኦዳ” ያግስ።

5ጎዳ አያናይ ታ ቦላ ዎድ፥ ታኮ ሀይሳዳ ያግስ፦ “እስራኤለ አሳዉ፥ ህንተ ሄሳዳ ጌታ፤ ሽን ታ ህንተ አይ ቆፕያኮ ኤራይስ።

6ሀ ካታማን ህንተ ዳሮ አሳ ዎድ፥ ኦገ ኡባን አሀ ኩንደታ” ያጌስ።

7ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ ዎድ የግዳ አሀይ አሾ፤ ሀ ካታማይ አሾ ፃሮ፤ ሽን ታ ህንተና ሀ ካታማፐ የደዳ ከሳና።

8ህንተ ኦላስ ያይደታ፤ ሽን ታ ህንተ ያይዳ ኦላ ህንተ ቦላ ኤሀና።

9ታ ህንተና ሀ ካታማፐ ከሳዳ፥ አላጋታ ኩሸን አዳ እማና፤ ታ ህንተና ህንቴ ዛዋን ፕርዳና።

10ህንተ ኦላን ዉራና፤ ታ ህንተና ህንተ ቢታን ፕርዳና። ሄ ዎደ ህንተ ታ ጎዳ ግደይሳ ኤራና።

11ሀ ካታማይ ህንተዉ አሾ ፃሮ ግደና፤ ህንተካ እያ ግዶን አሾ ግደከታ። ታ ህንተ ቦላ እስራኤለ ዛዋን ፕርዳና።

12ህንተ ታ ህግያነ ታ ዎጋ ሻርድ ህንተ ዩሹዋን ደእያ ካዎተታ ዎጋ መላ ደእዳ ግሾ ህንተ ቦላ ፕርደይ ጎዳ ግደይሳ ህንተ ኤራና” ያጌስ ኡባ ሃርያ ጎዳይ።

13ታ ትንብተ ኦድያ ዎደ ባናያ ናኣ ፓላፅ ሀይቅን፥ ታኒ ጉፋናዳ፥ ታ ቃላ ቁ ኦዳ፥ “አቤት ኡባ ሃርያ ጎዳዉ፥ እስራኤለፐ አትዳይሳታ ኩመ ዉርሳና ሀናዬ?” ያጋዳ ዋሳስ።

14ጎዳ ቃላይ ታኮ ሀይሳዳ ያግድ ይስ፤

15“ነኖ አሳ ናአዉ፥ የሩሳላመን ደእያ እስራኤለ አሳይ ነባነ ድኦን ደእያ ነ ዳቦታባ፥ ‘ኤንቲ ጎዳፐ ሃክዶሶና፤ ሀ ቢታይ ኑስ ላታ ግድድ እመትስ’ ” ያግድ ሃሳዮሶና።

16ኡባ ሃርያ ጎዳይ ሀይሳዳ ያጌስ፦ “ታ ኤንታ ሃሆን ደእያ ካዎተታ ግዶ የድኮካ፥ ቢታ ኡባን ላልኮካ፥ ኤንቲ ብዳ ቢታታን ጉ ዎደስ ኤንታራ ግዳና” ያጌስ።

17ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታ ህንተና ካዎተታፐነ ህንተ ላለትዳ ቢታታፐ ሺሻና፤ እስራኤለ ቢታ ዛራዳ ህንተዉ እማና።

18ኤንቲ ጉየ ስሚድ ያ ዎደ ቱና ምስለታነ ኤቃታ ቢታፈ ይሳና።

19ታኒ ኤንታዉ እስ ዎዛና እማና፤ ኦራ አያና ኤንታ ግዶን ዎና። ኤንታፈ ሹቻ ዎዛና ድጋዳ፥ አሾ ዎዛና ኤንታዉ እማና።

20ሄ ዎደ ኤንቲ ታ ህግያ ካላና፤ ታ ኪታ ናጋና። ኤንቲ ታ አሰ ግዳና፤ ታኒ ኤንታ ፆሳ ግዳና።

21ግዶሽን፥ እፀትዳ ምስልያነ ቱና ኤቃ ጎይናናዉ ዶሰይሳታ ታኒ ኤንታ ኦሱዋዳ ኦና” ያጌስ ኡባ ሃርያ ጎዳይ።

22ሄ ዎደ ክሩበት ባንታ ቀፍያ ምጭዶሶና፤ ኤንታ ምየን ገርቶት ደኦሶና። እስራኤለ ፆሳ ቦንቾይ ኤንታፈ ቦላራ ደኤስ።

23ጎዳ ቦንቾይ ካታማ ግዶፈ ደንድድ፥ ዶሎሀ ባጋን ደእያ ዙማ ቦላ ኤቅስ።

24ፆሳ አያናይ ታዉ እምዳ ቆንጨን አያናይ ታና ቢታፈ ደንድ፥ ካልዳወታ ቢታን ደእያ ድኤትዳይሳታኮ ኤፍስ። ሄሳፈ ጉየ፥ ቆንጨይ ታፐ ሻከትስ።

25ጎዳይ ታና በስዳባ ኡባ ድኦን ደኤይሳታስ ኦዳስ።

← Chapter 10 Jump to: Chapter 12 →