Ezekiel 8

Amharic Gofa GFBEVF (ጌሻ ማፃፋ)

← Chapter 7 Jump to: Chapter 9 →

1ኑኒ ድኤትዳ ኡሱፑን ላይን፥ ኡሱፑን አጌናን፥ እቻሻን ጋላሳን፥ ታኒ ታ ሶን ኡትዳሽን፥ ይሁዳ ጭማትካ ታ ስንን ኡትዳሽን፥ ኡባ ሃርያ ጎዳ ዎልቃይ ታና ሃርስ።

2ሄኮ፥ ታኒ ቁ ጋዳ ፄልያ ዎደ አሰ ዳነይሳ በአስ። እያዉ ፄሰ ዳነይሳፈ ጋርሳ ባጋይ ታማ ላጮ ዳኔስ፤ ቦላ ባጋይ ጶልያ ናሰ ብራታ ዳኔስ።

3እ ኩሸ ዳንያባ ታኮ የድድ፥ ታ ብናና ኦይክስ። አያናይ ታና ሳአፐነ ሳሎፐ ግዶ ፑደ ደንድ፥ ፆሳ ቆንጨን ታና የሩሳላመ ኤፍስ። ያን ቆሞ ባጋራ ፆሳ ኬ ግዶ ዳባባ ገልያ ፐንግያራ ገልስድ፥ ጎዳ ቃናትያ ደንያ ኤቃይ ኤቅዳ በሳ በስስ።

4ሄኮ፥ ካሰ ታኒ ዛንጋራን በእዳይሳዳ፥ እስራኤለ ፆሳ ቦንቹዋ ያን በአስ።

5ጎዳይ ታኮ፥ “ነኖ አሳ ናአዉ፥ ፑደሀ ባጋ ፄላ” ያግስ። ታኒ ፄልያ ዎደ ቃናተ ደንያ ኤቃይ፥ ድርሳ ፐንግያ ስንን ደእያ ያርሾ በሳ ማታን ደኤይሳ በአስ።

6እ ታኮ፥ “ነኖ፥ አሳ ናአዉ፥ ኤንቲ ኦያባ በአይ? ታና ታ ጌሻ ኬፈ ሃሳናዉ፥ እስራኤለ አሳይ ኦያ እፀትዳ ኤቃ ጎይኑዋ በአይ? ሀይሳፈ አያ እፀትዳ ኤቃ ጎይኖ ኔኒ ቡሮ በአና” ያግስ።

7እ ታና ፆሳ ኬ ዳባባ ፐንገ ኤህን፥ ታኒ ፄልያ ዎደ፥ ሄኮ፥ ጎዳ ቦላ ፆኤ በአስ።

8እ ታኮ፥ “ነኖ፥ አሳ ናአዉ፥ ጎዳ ቦካ” ያግን፥ ታ ቦክያ ዎደ እስ ፐንገ ያን በአስ።

9እ ታኮ፥ “ገላዳ ኤንቲ ያን ኦያ ኢታ ኦሱዋነ እፀትዳ ኤቃ በአ” ያግስ።

10ታ ግዶ ገላዳ ፄልያ ዎደ፥ ሄኮ፥ ሳአራ ጎሸትያ ዱማ ዱማ መተታ ምስለይ፥ ቱና ዶአታ ምስለይነ እስራኤለ አሳ ኤቃታ ኡባ ምስለይ ጎዳ ቦላ ዩይ አድ መት ኡትዳይሳ በአስ።

11ኤንታፈ ስን ባጋራ እስራኤለ አሳፐ ላፑን ታሙ ጭማት ኤቅዶሶና፤ ሳፋና ናኣ ያእዛን ኤንታ ግዶን ኤቅስ። ኡባይ እፃነ ጩይስያባ ባንታ ኩሸን ኦይክዶሶና፤ እፃንያ ጩያይ ቱቁ ጌስ።

12ጎዳይ ታኮ፥ “ነኖ፥ አሳ ናአዉ፥ እስራኤለ አሳ ጭማት ኡባይ ማን ባንታ ኤቃ ምስልያ ኬን ኦያባ በአይ? ኤንቲ፥ ጎዳይ ኑና በኤና፤ ጎዳይ ሀ ቢታ አግስ” ያጎሶና።

13እ ታኮ፥ “ሀይሳፈ አያ እፀትዳ ኤቃ ጎይኖ ኔኒ ቡሮ በአና” ያግስ።

14ሄሳፈ ጉየ፥ ፑደሀ ባጋን ደእያ ፆሳ ኬ ፐንግያኮ ኤፍን፥ ሄኮ፥ ማጫሳይ ያን ኡትድ፥ ታሙዛ ጌተትያ ባንታ ፆሳስ ዬክሽን በአስ።

15እ ታኮ፥ “ነኖ አሳ ናአዉ፥ ሀይሳ በአይ? ሀይሳፈ አያ እፀትዳ ኤቃ ጎይኖ ኔኒ ቡሮ በአና” ያግስ።

16ሄሳፈ ጉየ፥ እ ታና ፆሳ ኬ ግዶ ዳባባ ኤፍስ፤ ያን ፆሳ ኬ ፐንግያ ማታን፥ ባራንዳፈነ ያርሾ በሳፈ ግዶን፥ ላታማነ እቻሹ ግድያ አሳታ በአስ። ኤንቲ ባንታ ዞኩዋ ፆሳ ኬኮ፥ ባንታ ሶምኡዋ ዶሎሀኮ ዛሪድ፥ ዶሎሀራ ከይያ አዋ ጎይኖሶና።

17ጎዳይ ታኮ፥ “ነኖ አሳ ናአዉ፥ ሀይሳ በአዲ? ይሁዳ አሳይ ሀ እፀትዳ ኤቃ ጎይኖይ ሀይሳን ኦይስ ኤንታዉ ላፋባ ግድዴ? ኤንቲ ቢታ ጌላ ኦሶን ኩንድ፥ ዛሪ ዛሪድ ታና ሀንቀናዉ በሲ? ኤንቲ ባንታዉ ዳንዳኤትዳ መላ ታና ኢስድ ጫዮሶና።

18ሄሳ ግሾ፥ ታ ኤንታራ ሀንቆን ጋሄታና፤ ታ ኤንታዉ ቃትከ፤ ኤንታፈ እሱዋካ አሽከ። ኤንቲ ባንታ ቃላ ቃ ኦድ ዋስንካ፥ ታ ኤንታ ስእከ” ያግስ።

← Chapter 7 Jump to: Chapter 9 →