Ezekiel 14

Amharic Gofa GFBEVF (ጌሻ ማፃፋ)

← Chapter 13 Jump to: Chapter 15 →

1እስራኤለ ጭማታፐ እሶት እሶት ታኮ ይድ፥ ታ ስንን ኡትዶሶና።

2ጎዳ ቃላይ ሀይሳዳ ያግሸ ታኮ ይስ።

3“አሳ ናአዉ፥ ሀ አሳት ባንታ ዎዛናን ኤቃ ኤስዶሶና፤ ኤንታ ናጋራይ ኤንታዉ በ ሹች ግድስ። ያትን፥ ኤንቲ ታና ኦይቻና መላ ኦዬ?”

4ነ ኤንታዉ ኡባ ሃርያ ጎዳይ ሀይሳዳ ያጌስ ጋዳ ኦዳ፤ “እስራኤለ አሳፐ ኦንካ ኤቃ ባ ዎዛናን ዎድ፥ እያ ናጋራይ እያዉ በ ሹቹ ግድን፥ ናበ ኦይቻናዉ ቢኮ፥ ታኒ ታ ሁጰን እያ ኤቃታ ዳሮተዳ እያዉ ዛራና።

5ሄ ኤቃት እስራኤለ አሳ ታፐ ሃስዶሶና፤ ሽን ሀእ ታ ኤንታዉ እምያ ዛሩዋን ኤንታ ዎዛና ታኮ ዛራና” ያጌስ።

6“ሄሳ ግሾ፥ እስራኤለ አሳስ ሀይሳዳ ያጋዳ ኦዳ። ኡባ ሃርያ ጎዳይ ሀይሳዳ ያጌስ፤ ናጋራ ፓፅተ፤ ህንተ ኤቃ አግተ፤ ህንተ ቱና ኦሶ ኡባፈ ስምተ።

7“እስራኤለ አሳ ግድን ዎይኮ እስራኤለ ቢታን ደእያ አላጋ ቢታ አሳ ግድን፥ ታፐ ሃክድ፥ ባ ዎዛናን ኤቃ ዎድ፥ እያ ናጋራይ እያዉ በ ሹቹ ግድን፥ ታና ዞረ ኦይቻናዉ ናበኮ ቢኮ፥ ታኒ ጎዳይ ታ ሁጰን እያዉ ዛሮ እማና።

8ታኒ ሄ ኡራ ሞርካና፤ ታ እያ አሳ ማላስነ ሚቻስ አሻና፤ ታኒ እያ ታ አሳ ግዶፈ ይሳና፤ ታ ጎዳ ግደይሳ ህንተ ሄ ዎደ ኤራና።

9እስ ናበይ ጭመትድ ትንብተ ኦድኮ፥ ሄ ናበይ ኦዳና መላ ጭምዳይ ታና ጎዳ። ታኒ እያ ቦላ ታ ኩሽያ ዎዳ፥ ታ አሳ ግዶፈ እያ ይሳና።

10ኤንቲ ባንታ ናጋራ ሴራ ቶካና፤ ናበይነ ናብያ ኦይቸይስ እስ ግና ሴረታና።

11ህዛፐ ጉየ እስራኤለ አሳይ ኦገ ባለትድ ታፐ ሃከና፤ ባንታ ናጋራን ባንታና ቱንሶኮና። ኤንቲ ታ አሰ ግዳና፤ ታንካ ኤንታ ፆሳ ግዳና” ያጌስ ኡባ ሃርያ ጎዳይ።

12ጎዳ ቃላይ ሀይሳዳ ያግሸ ታኮ ይስ፦

13“አሳ ናአዉ፥ እስ ቢታ አሳይ ናጋራ ኦድ፥ ታዉ አማነቶና እፅኮ፥ ታኒ ታ ኩሽያ ደንዳ፥ ኤንታ ካ ይሳዳ፥ ኮሻ ኤሀና፤ አሳነ መህያ ዎና።

14ሀር አቶሽን ሀ ሄ አሳት ኖሄይ፥ ዳነልነ እዮብ ሄ ቢታን ደእያኮካ፥ ኤንቲ ባንታ ፅሎተን ባንታ ሸምፑዋ ፃላላ አሻና” ያጌስ ኡባ ሃርያ ጎዳይ።

15“ታኒ ኤንታ ቢታ ቦላ ዎራ ዶአታ የዳዳ፥ ሄ ቢታይ አስ ባይናነ ኦንካ ካንና መላ ባይሳ ኦና።

16ታኒ ኡባ ሃርያ ጎዳይ ታ ደኡዋን ጫቃስ። ሀር አቶሽን፥ ሀ ሄ አሳት ሄ ቢታን ደእያኮካ፥ ኤንቲ ባንታ ናይታ አሻናዉ ዳንዳኦኮና። ኤንቲ ባንታዉ አታና፤ ሽን ቢታይ ባይሳ ግዳና” ያጌስ ኡባ ሃርያ ጎዳይ።

17“ታኒ ሄ ቢታ ቦላ ቶራ የዳዳ፥ ያን ደእያ አሳነ መህያ ዎኮ፥

18ታኒ ኡባ ሃርያ ጎዳይ ታ ደኡዋን ጫቃስ። ሀ ሄ አሳት ሄ ቢታን ደእያኮካ፥ ባንታ ናይታ አሻናዉ ዳንዳኦኮና። ኤንቲ ባንታዉ አታና” ያጌስ ጎዳይ።

19“ታኒ ሄ ቢታ ቦላ ኢታ ሀርገ የዳዳ፥ ታ ሀንቁዋን ሱ ጉካና መላ ኦኮ፥ ያን ደእያ አሳነ መህያ ዎኮ፥

20ታኒ ኡባ ሃርያ ጎዳይ ታ ደኡዋን ጫቃስ። ሀር አቶሽን፥ ኖሄይ፥ ዳነልነ እዮብ ሄ ቢታን ደእያኮካ፥ ኤንቲ ባንታ ፅሎተን ባንታ ሸምፑዋ አሻናፐ አትሽን፥ ባንታ ናይታ አሾኮና” ያጌስ ኡባ ሃርያ ጎዳይ።

21ኡባ ሃርያ ጎዳይ ሀይሳዳ ያጌስ፤ “ታኒ አሳነ መህያ ዎናዉ የሩሳላመ ቦላ ኦይዱ ኢታ ፕርዳታ፦ ቶራ፥ ኮሻ፥ ዎራ ዶአታነ ሀርገ የዳና።

22ግዶሽን፥ አትድ ከይዳ ጉ አሳት፤ ማጫ ናይትነ አደ ናይት ያፐ ከያና። ኤንቲ ህንተኮ ያ ዎደ ኤንታ ሀኖታነ ኤንታ ኦሱዋ ህንተ በእድ፥ ታ የሩሳላመ ቦላ ኤህዳ ጋዶይ ልከ ግደይሳ አኬካና።

23ህንተ ኤንታ ሀኖታነ ኤንታ ኦሱዋ በእድ፥ ታ ኤንታ ቦላ ጮ ፕርዶናይሳ ኤራና” ያጌስ ኡባ ሃርያ ጎዳይ።

← Chapter 13 Jump to: Chapter 15 →