Ezekiel 44

Amharic Gofa GFBEVF (ጌሻ ማፃፋ)

← Chapter 43 Jump to: Chapter 45 →

1ሄሳፈ ጉየ፥ ሄ ኡራይ ታና ጉየ ዛሪድ፥ ፆሳ ኬስ ዶሎሀ ባጋራ ደእያ ካረ ባጋ ድርሳ ፐንግያኮ ኤህያ ዎደ ድርሳ ፐንገይ ጎርደትድ ኡትስ።

2ጎዳይ ታኮ፥ “ሀ ፐንገይ ጎርዳን ዳናፐ አትሽን፥ ናምአን ዶየተና። ጎዳይ እስራኤለ ፆሳይ ያራ ገልዳ ግሾ ኦንካ ያራ ገለና። ሄሳ ግሾ፥ ሄ ፐንገይ ጎርዳን ዳና።

3ግዶሽን፥ እስራኤለ ሀላቃይ፥ ጎዳ ስንን ኡይ ማናዉ ያን ኡታናዉ ዳንዳኤስ። ፐንግያ ባራንዳራ እ ገላናዉነ ከያናዉ ዳንዳኤስ” ያግስ።

4ሄ ኡራይ ታና ፑደሀ ፐንግያኮ ኤፍያ ኦግያራ ኤፍድ፥ ፆሳ ኬስ ስን ባጋ ጋስ። ያን ግዳዳ ታ በእያ ዎደ፥ ሄኮ፥ ጎዳ ቦንቾይ ፆሳ ኬ ኩምድ ኡትዳይሳ በአዳ ሶምኦራ ሳአን ጉፋናስ።

5ጎዳይ ታኮ፥ “አሳ ናአዉ፥ ፆሳ ኬ ዎጋታነ እያ ህገታ ኡባ ነ በኤይሳነ ስኤይሳ ሎይዳ ናጋ። ፆሳ ኬ ገላናዉነ ከያናዉ በሲያ አሳትነ በሶና አሳት ኦናንተኮ ሎይዳ አኬካ።

6ማካላንቾ እስራኤለ አሳስ፥ ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ህንተኖ፥ እስራኤለ አሳዉ፥ ህንተ ኦያ ቱና ኦሶታ አግተ።

7ህንተ ታዉ ታ ካ፥ ሞዋነ ሱ ያርሾ ኦድ ሺሽያ ዎደ ዎዛናይነ አሾይ ቃፃረትቦና አላጋ አሳታ ፆሳ ኬ ገልስድ ታ ኬ ቱንስደታ፤ ታ ጫቁዋ መንደታ።

8ታ ጌሻ ሚሸታ ቦላ አዋቶና እፅድ፥ ታ ኬን አላጋታ አዋይደታ’ ” ያጌስ።

9ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “እስራኤለ አሳ ግዶን ደእያ አላጋ አስ፥ ባ ዎዛናንነ ባ አሹዋ ቃፃረትቦና፥ ኦንካ ታ ኬ ገሎፖ።”

10“ታና አግድ፥ እስራኤለ አሳራ ኤቃ ጎይንዳ ሌወታ ታ ሴራና።

11ኤንቲ ታ ኬን ኦሳንቾ ግዶ፤ ታ ኬ ድርሳ ፐንገታ ናጎ፤ ፆሳ ኬ ኦሱዋካ ኦ። ኤንቲ ፁሳ ያርሾነ አሳይ ኤህያ ሀራ ያርሾ ሹኮ፤ ቃስ አሳስ ኦናዉ አሳኮ ሺቆ።

12ሽን ኤንቲ ካሰ እስራኤለ አሳ ኤቃ ጎይንስዳ ግሾነ አሳ ናጋራኮ ካለዳ ግሾ፥ ኤንቲ ባንታ ናጋራ ሴራ ኤካና መላ ታ ኩሸ ደንዳ ጫቃስ” ያጌስ ኡባ ሃርያ ጎዳይ።

13ኤንቲ ካህነ ግድድ ኦናዉ ታኮ ሺቆፖ፤ ዎይኮ ታዉ ዱማትዳ ጌሻባኮነ ኡባፈ ጌሻ በሳኮ ሺቆፖ። ኤንቲ ባንታ ኦዳ ቱና ኦሱዋ ግሾ፥ ኦይሸታና።

14ሄሳ ግሾ ኤንቲ ፆሳ ኬን አዋታናዳነ እያ ግዶን ኦናዉ ደእያ ኦሶ ኡባ ኦና መላ ታ ኤንታ ሹማና።

15“ሽን እስራኤለ አሳይ ታና አግድ፥ ታ ስንፈ ሃክዳ ዎደ ፆሳ ኬ ዎጋ አማነትድ ፖልዳ፥ ሌወ ኮቸ ግድዳ ካህነት፥ ሳዶቃ ያራት፥ ታዉ ኦናዉ ታኮ ሺቆ። ሞዋነ ሱ ሺሽድ ኤንቲ ታ ስንን ኦ” ያጌስ ኡባ ሃርያ ጎዳይ።

16ፆሳ ኬ ኤንቲ ገሎ፤ ታዉ ኦናዉ ታ ያርሾ በሳ ኤንቲ ሺቆ፤ አዋተ ኤንቲ ኦይኮ።

17ኤንቲ ፆሳ ኬስ ግዶ ዳባባ ገልያ ዎደ፥ ሊኖፐ ዳደትዳ ማኦ ማኦ፤ ግዶ ዳባባ ፐንገን ዎይኮ ፆሳ ኬ ግዶን ኦያ ዎደ ሱፈ ማኦ ማኦፋ።

18ኤንቲ ባንታ ሁጰን ሊኖ ጎፅድ፤ ባንታ ፄሳን ሊኖ ቃን ሱረ ዳንጮ፤ ጫዋያ ማኦ ማኦፎ።

19አሳይ ደእያ ካረ ዳባባ ኤንቲ ከያናፐ ስን ፆሳ ኬን ኦሸ ማእዳ ማኡዋ ቃርድ፥ ጌሻ ክፍለታን ዎ። ሄስካ፥ አሳይ ኤንታ ጌሻ ማኡዋ ቦችድ ቆሄቶና መላሳ።

20“ካህነት ባንታ ሁጵያ ሜደቶፎ ዎይኮ አዱስድ ድቾፎ፤ ባንታ ሁጵያ ማራን ቃንፀቶ።

21አይ ካህነት ግዶ ዳባባ ገልያ ዎደ ዎይነ ኡሽ ኡዮፖ።

22ኤንቲ አዝን ሀይቅዳ፥ ዎይኮ ሳዮ ማጫስ ኤኮፎ። እስራኤለ አሳፐ ጌላኦ ኤኮ፤ ዎይኮ አዝናይ ካህነ ግድድ ደእሸ ሀይቅዳ ማጫስ ኤኮ።

23“ካህነት ጎዳስ ዱማትዳባነ ዱማቶናባ ግዶን ደእያ ዱማተ ታ አሳ ታማርሶ፤ ጌሽነ ቱና ግዶን ደእያ ዱማተ ኤንታ በሶ።

24አይ ሞቶይ ደንድኮካ፥ ካህነት ህገይ ኦደይሳዳ ፕርዶ። ታ ህገይነ ታ ዎጋይ ገይሳዳ ታ ባለታ ቦንቾ፤ ታ ሳምባታ ዱማይድ ቦንቾ።

25“ካህነይ ሀይቅዳ አሀኮ ሺቅድ፥ ባና ቱንሶፖ። ግዶሽን፥ ሀይቅዳይ አዋ ዎይኮ አዮ ዎይኮ እያ አደ ናአ ዎይኮ ማጫ ናአ ዎይኮ እሻ ዎይኮ አዝና ገላቦና ምቾ ግድኮ ባና ቱንሶ።

26ቱንዳፐ ጉየ፥ ላፑን ጋላስ ጋምኦ፤ ሄሳፈ ጉየ፥ እ ጌሽ ግዳና።

27ጌሻ በሳን ሀጋዛናዉ ግዶ ዳባባ ገልያ ዎደ ባ ናጋራ ግሾ ያርሾ ሺሾ” ያጌስ ኡባ ሃርያ ጎዳይ።

28ካህነታስ ላት ባዋ፤ ታ ኤንታዉ ላታ። እስራኤለ ቢታን ኤንታዉ አይ ላታካ እሞፕተ፤ ኤንታ ላታይ ታና።

29ኤንቲ ካ ያርሾ፥ ናጋራ ያርሾነ ናቆ ያርሾ ሞ። እስራኤለ ቢታን ጎዳስ ዱማይዳባ ኡባይ ኤንታሳ።

30ኮይሮ ጋክያ ዱማ ዱማ ካ ፄራ አይፈይነ ህንተ ጎዳስ እምያ እሞታ ኡባይ ካህነታሳ። ህንተ ኬይ አንጀታና መላ ህንተ ልያፈ ኮይሮ ኩሽያ ኤንታዉ እምተ።

31ካህነት ባዉታ ዎይኮ ዶእ ዎዳ ካፎ አሾ ዎይኮ መሄ አሾ ሞፖ።

← Chapter 43 Jump to: Chapter 45 →