Ezekiel 47

Amharic Gofa GFBEVF (ጌሻ ማፃፋ)

← Chapter 46 Jump to: Chapter 48 →

1ሄ ኡራይ ዛሪድ፥ ታና ፆሳ ኬ ገልያ ፐንግያኮ ኤፍስ። ፆሳ ኬ ገልያ ፐንግያፈ ጋርሳራ ሃ ፑልትድ፥ ፆሳ ኬፈ ዶሎሀ ባጋ ጎጌስ። ፆሳ ኬስ ጋርሳ ባጋራ ዱገ ጎግድ፥ ያርሾ በሳፈ ጋርሳ ባጋራ ካንስ።

2እ ታና ቆሞ ፐንግያ ባጋራ ከስድ፥ ዶሎሀ ፐንግያኮ ዩሽስ። ሄ ፐንግያፈ ጋርሳ ባጋራ ሃ ጎጌስ።

3ሄ ኡራይ ዋ ዎዶሮ ባ ኩሸን ኦይክድ፥ ዶሎሀ ባጋ ብድ፥ ጎግያ ሃ ካልድ፥ እስ ሙኩሉ ዋስ። ታና ሃ ግዶራ ካለስ፤ ሃይ ታዉ ሹቁለ ጋክስ።

4ዛሪድ እስ ሙኩሉ ዋድ፥ ሃ ግዶራ ታና ካለስ። ሃይ ታዉ ጉልባታ ጋክስ። ቃስ እስ ሙኩሉ ዋድ፥ ታና ሃ ግዶራ ካለስ። ሄ ዎደ ሃይ ታዉ ፄሰ ጋክስ።

5እ ቃስ እስ ሙኩሉ ዋስ። ሽን ሄ ሃይ ዳሮ ጪሞ ግድያ ግሾ፥ ታ ፕናናዉ ዳንዳአብከ፤ እ አስ ዋና ፕናናዉ ዳንዳኦና ሻፋ ግድስ።

6ሄ ኡራይ ታኮ፥ “አሳ ናአዉ፥ ሀይሳ አኬካዳ በአይ?” ያግስ። ሄሳፈ ጉየ፥ እ ታና ሻፋ ጋፃ ጉየ ዛርስ።

7ታ ያ ጋክያ ዎደ ሻፋ ጋፃን ሀ ባጋራነ ያ ባጋራ ዳሮ ም ደኤይሳ በአስ።

8እ ታኮ፥ “ሀ ሃይ ዶሎሀ ባጋ ጎግድ፥ አራበ ዛንጋራነ ማፅነ አባን ገሌስ። ሃይ ማፅነ አባ ገልያ ዎደ ማፅነ አባይ ኦራፅድ ፅሎ ሃ ግዴስ።

9ሻፋይ ጎግድ ብያ በሳን ዱማ ዱማ መተት ደኦሶና። ሄ ሻፋይ ያራ ጎግያ ግሾነ ሄ ሃ ኦራድ ፅልስያ ግሾ ዳሮ ሞሎት ያን ደኦሶና። ሄሳ ግሾ ሃይ ጎግያ በሳን ደእያ መተት ኡባይ ደኦን ዳና።

10ሞሎ ኦይክያ አሳት አባ ጋፃን ኤቃና፤ ኤንጋዳፐ ብድ ኤን ኤግላይማ ጋካናዉ ደእያ በሳይ ሞሎ ኦይካናዉ ግተ የግያ በሰ ግዳና። መደትራነ አባን ደእያ ሞሎታዳ፥ ያን ዳሮ ዱማ ዱማ ሞሎት ዳና።

11ሽን አባ ጋፃን ደእያ ኤለይነ ጫፋ ሃይ ማፅነ ግድድ አታናፐ አትሽን፥ ኦራፅድ ፅለና።

12ሄ ሻፋ ዶናን ሀ ባጋራነ ያ ባጋራ ሜተትያ አይፈ እምያ፥ ዱማ ዱማ ቆሞ ምት ደኦሶና። ኤንታ ሀይይ ቆቆፈተና፤ አይፈ አጎኮና። ፆሳ ኬፈ ከይያ ሃይ ኤንታኮ ጎግያ ግሾ፥ ኤንቲ አጌናን አጌናን ኦራ አይፈ አይፋና። ኤንቲ አይፍያ አይፈይ ካ ግዳና፤ ኤንታ ሀይይ ለ ግዳና” ያጌስ።

13ኡባ ሃርያ ጎዳይ ሀይሳዳ ያጌስ፦ “ታማነ ናምኡ እስራኤለ ዘረስ ላታ ቢታ ኦዳ፥ ነ ሻካና ዛዋይ ሀይሳ። ዮሰፋ ኮቻስ ናምኡ ሳም እመቶ።

14ታኒ ካሰ ህንተ ማይዛታ ሀ ቢታ ላትሳናዉ ጫቃስ፤ ሀእ ህንተ ኡባይ ሻክድ ላትተ።

15“ፑደሀ ባጋ ቢታ ዛዋይ ሀይሳ፦ መደትራነ አባፈ ደንድድ፥ ሄትሎናነ ሀማታ ካንድ፥ ፀዳዳ ጋኬስ።

16ዳማስቆፈነ ሀማታፐ ግዶን ደእያ በሮታነ ስብራይማ ካታማታ ካንድ፥ ሀዉራና ዛዋን ደእያ ትኮና ካታማ ጋኬስ።

17እስራኤለ ቢታ ፑደሀ ባጋ ዛዋይ ሀማታ ቢታ ፑደሀ ባጋን አግድ፥ መደትራነ አባፈ ዶሎሀ ባጋ ብድ፥ ዳማስቆ ዛዋን ደእያ ሀፃር-ኤናና ካታማ ጋኬስ።

18“ዶሎሀ ባጋ ዛዋይ ሀፃር-ኤናናፐ ደንድድ፥ ዳማስቆፈነ ሀዉራናፐ ግዱዋራ ካንስ። እስራኤለፐነ ጋላዳፐ ግዶን ደእያ ዮርዳኖሰ ሻፋን ዛዋትድ ማፅነ አባ ካንድ ታማረ ካታማ ጋኬስ።

19“ዱገሀ ባጋ ዛዋይ ታማራፐ ደንድድ፥ ማርባ ቃደሳን ደእያ ሃ ጋኬስ። ያፐ ግብፀ ሻፋፐ ብድ መደትራነ አባ ጋኬስ። ሄስ ዱገሀ ዛዋ።

20“ዉሎሀ ባጋ ዛዋይ መደትራነ አባ ግድድ፥ ፑደሀ ባጋራ ሀማታ ስንራ ካንድ ዉሎሀ ባጋ ጋኬስ።

21“ሀ ቢታ እስራኤለ ዛረት ሻክድ ኤክተ።

22ህንተነ ህንተ ግዶን ናአ የልድ ደእያ በተ አሳስ ላታ ቢታ ኦድ ሻክተ። ኤንታ ህንተ፥ ህንተ ቢታን የለትዳ እስራኤለ አሳዳ ፄልተ። ኤንቲ እስራኤለ ኮቻታራ ታይበትድ ቢታ ሳማን ሻከትድ ኤኮ።

23በተ አስ እስራኤለን ኮቻራ አዉንካ ደእኮ፥ ሄ እ ደእያ ኮቻ ግዶን እያዉ ላታ ቢታ እምተ” ያጌስ ኡባ ሃርያ ጎዳይ።

← Chapter 46 Jump to: Chapter 48 →