Ezekiel 13

Amharic Gofa GFBEVF (ጌሻ ማፃፋ)

← Chapter 12 Jump to: Chapter 14 →

1ጎዳ ቃላይ ሀይሳዳ ያግሸ ታኮ ይስ።

2“ነኖ አሳ ናአዉ፥ እስራኤለን ትንብተ ኦድያ ናበታ ቦላ ነ ትንብተ ኦዳ። ባንታዉ መ ከስድ ትንብተ ኦደይሳታ ሀይሳዳ ያጋ፤ ጎዳ ቃላ ስእተ።

3ኡባ ሃርያ ጎዳይ ሀይሳዳ ያጌስ፦ ‘አይባካ በኦና ባንታ ቆፋን ደንድድ ትንብተ ኦድያ ኤያ ናበታ አየ!’

4እስራኤለ አሳዉ፥ ህንተ ናበት ላለትዳ ካታማን ደእያ ዎርካናታ መላ።

5ጎዳ ጋላሳን ኦላን ምንድ ኤቃና መላ እስራኤለ አሳ ድርሳ ግምብያ ምንድ ኤስቤከታ፤ ፑደ ላለትዳ በሳ ከይበከታ።

6ኤንታ ቆንጨይነ ኤንታ ብታይ ዎርዶ። ኤንቲ ጎዳይ ኪቶናሽን፥ ጎዳይ ሀይሳዳ ያጌስ ያጎሶና። ኤንቲ ኦደይሳ ጎዳይ ፖላና ግድ ናጎሶና።

7ታኒ ኦዶናሽን፥ ጎዳይ ሀይሳዳ ያጌስ ያግድ ኦድያነ ዎርዶ ቆንጨ በኤይሳታነ ሙራንቾታ ግደከቲ?” ያጌስ።

8ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ “ህንተ በእዳ ቆንጨነ ህንተ ኦድዳ ትንብተይ ዎርዶ ግድያ ግሾ ታ ህንተዉ ሞርከ ግዳና።

9ዎርዶ ቆንጨ በእያነ ሙራንችያ ናበታ ቦላ ታኒ ታ ኩሽያ ደንና። ኤንቲ ታ አሳ ዞረታን ገሎኮና፤ እስራኤለ አሳ ማዝጋበን ፃፈቶኮና፤ ኤንቲ እስራኤለ ቢታ ገሎኮና። ሄ ዎደ ታ ኡባ ሃርያ ጎዳ ግደይሳ ህንተ ኤራና።

10“ሳሮይ ባይናሽን ሳእ ሳሮ ያግድ ታ አሳ ባለሶና። አሳይ ሹቹ ኬልድ ዶርን፥ ኤንቲ ቦቅንተ ትዮሶና።

11ሀ ቦቅንተ ትየይሳታስ፤ ሀ ህንተ ትይዳ ግምበይ ኩንዳና፤ ዎልቃማ እር ቡካና። ታኒ ግታ ሻች የጋና፤ ዎልቃማ ጎተይ ደንዳና።

12ሄ ግምበይ ኩንድያ ዎደ አሳይ ህንተ ትይዳ ኖራይ አኔ? ያግድ ኦይቾና አጋነ” ያጌስ።

13ኡባ ሃርያ ጎዳይ ሀይሳዳ ያጌስ፦ “ታኒ ግምብያ ላላናዉ፤ ታ ሀንቁዋን ዎልቃማ ጎተ የዳና፤ ታ ይሉዋን ግታ ሻቻ ኪታና፥ ታ ሸንያን ዎልቃማ እራ ቡክሳና።

14ህንተ ቦቅንተ ትይዳ ግምብያ ታ መንረና፤ ባሶይ በንታና ጋካናዉ ላላና። እ ኩንድያ ዎደ ህንተ እያ ግዶን ሀይቃና፤ ሄ ዎደ ታኒ ጎዳ ግደይሳ ህንተ ኤራና።

15ታ ሀንቆይ ግምብያ ቦላነ ግምብያ ቦቅንተ ትይዳ አሳታ ቦላ ዎና። ታ ህንተኮ፥ ‘ግምበይ ባዋ፤ ግምብያ ቦቅንተ ትይዳይሳትካ ዶኮና።

16እስራኤለን ደእያ ናበት፥ የሩሳላመባ ትንብተ ኦደይሳት፥ ሳሮይ ባይናሽን ሳሮ ቆንጨ በኤይሳት ዶኮና’ ” ያጌስ ኡባ ሃርያ ጎዳይ።

17“ነኖ አሳ ናአዉ፥ ባንታ ቆፋን ደንድድ፥ ትንብተ ኦድያ ማጫሳ ደሬቃ ፄላዳ ኤንታ ቦላ ትንብተ ኦዳ።

18ኡባ ሃርያ ጎዳይ ሀይሳዳ ያጌስ፦ ‘ሀራ አሳ ቦላ ዎልቅ ዳናዳ፥ ኤንታ ሀሽያ ቦላ ሙሩኖባ ስክያነ አሳስ ኡባስ ቢታ ቃጨ ጊግስያ ማጫሳ አየ! ህንተ ታ አሳ ፅሄን ኦይክድ ህንተ ሸምፑዋ አሻኔ?

19እስ ኮጰ ባንጋ ዎይኮ እስ ባሶ ኡይ ደማናዉ፥ ዬላያባ ኦድ፥ ታ አሳ ስንን ታና ካዉሼታ። ህንተ ሀይቃናዉ በሶናይሳታ ዎድ ዳናዉ በሶናይሳታ አሼታ። ያትድ ታ አሳ ዎርዶ ኦዴታ፤ ኤንትካ ህንተ ዎርዱዋ ስኦሶና’ ” ያጌስ።

20ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ህንተዉ ሀራ አሳ ቦላ ዎልቅ ዳና መላ ህንተ ኩሸን ቃችዳ ሙሩኑዋ ቃጭያ ታ ዳፋ ኤካና። ታ እያ ህንተ ኩሽያፐ ዱ ሆላና፤ ፅሄፐ ከስ ኤክያ ካፎዳ ታ ኤንታ ህንተ ፅህያፐ ከሳ ኤካና።

21ታኒ ህንተ ሻሽያ ቃራ ኤካዳ፥ ታ አሳ መርናዉ ህንተ ኩሸፐ አሻና። ታኒ ጎዳ ህንተ ሄ ዎደ ኤራና።

22ታኒ አዛንቦና ፅሎ አሳ ዎዛና ህንተ ዎርዶን አዛንደታ፤ ናጋራንቾት ባንታ ኢታ ኦሱዋፐ ስሚድ፥ ባንታ ሸምፑዋ አሾና መላ ኤንታ ምንደታ።

23ህዛፐ ህንተ ዎርዶ ቆንጨ በኤከታ፤ ሙሩነከታ። ታኒ ታ አሳ ህንተ ኩሸፐ ከሳ ኤካና። ታኒ ጎዳ ግደይሳ ህንተ ሄ ዎደ ኤራና” ያጌስ።

← Chapter 12 Jump to: Chapter 14 →