Ezekiel 29

Amharic Gofa GFBEVF (ጌሻ ማፃፋ)

← Chapter 28 Jump to: Chapter 30 →

1ኑኒ ድኤትዳ ታማን ላይን፥ ታማን አጌናን፥ ታማነ ናምአን ጋላስ፥ ጎዳ ቃላይ ሀይሳዳ ያግሸ ታኮ ይስ።

2“አሳ ናአዉ፥ ነ ሶምኡዋ ግብፀ ካዋኮ ዛራዳ፥ እያ ቦላነ ግብፀ ቢታ ኡባ ቦላ ትንብተ ኦዳ።

3ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ነኖ፥ ናይለ ሻፋ ግዶን ዝንእዳ፥ ግታነ ያሽያ ዶአ ዳነይሶ። ናይለ ሻፋይ ታባ፤ እያ መዳይ ታና’ ግያ ግብፀ ካዋዉ፥ ታ ነዉ ሞርከ ግዳና።

4ታ ነ ሲን ዳፎ አና፤ ነ ሻፋን ደእያ ሞሎታ ቀፈይ ነ ጋልባራ ኦይከታና መላ ኦና፤ ሞሎት ነ ጎጋራ ኦይከትድ ኡትዳሽን፥ ታ ነና ሃፈ ጎቻዳ ጋፃ ከሳና።

5ታ ነናነ ነ ሻፋን ደእያ ሞሎታ ኡባ መላ ቢታ ሆላና፤ ነ አሀይ ደንባን የገትድ አታና፤ ነ አሀ ሺሽድ ሞግያ አስ ያና። ታ ነና ሳሎ ካፎታስነ ሳኣ ዶአታስ ካ ኦና።

6ግብፀን ደእያ አሳ ኡባይ ታኒ ጎዳ ግደይሳ ሄ ዎደ ኤራና። “ኔኒ እስራኤለ አሳስ ማቃ ፃምአ ግዳዳሳ፤

7ኤንቲ ነና ኦይክዳ ዎደ መቃዳ ኤንታ ሾጰን ጫዳዳሳ፤ ኤንቲ ነናን ዘምፕዳ ዎደ መቃዳ ኤንታ ዞኩዋ ዱዳሳ።

8ሄሳ ግሾ፥ ታኒ ኡባ ሃርያ ጎዳይ፥ ነ ቦላ ማሸ ደንይሳታ ኤሀና፤ ኤንቲ ነ አሳነ ነ መህያ ኡባ ዉርሳና።

9ግብፀ ላለትድ ባይሳ ቢታ ግዳና። ታኒ ጎዳ ግደይሳ ኤንቲ ሄ ዎደ ኤራና። ኔኒ፥ ‘ናይለ ሻፋይ ታባ፤ እያ መዳይ ታና’ ያግዳ ግሾ፥

10ታኒ ነ ቦላነ ነ ሻፋ ቦላ ደንዳስ። ፑደሀ ባጋራ ምግዶላፐ ዶማዳ፥ ዱገሀ ባጋራ አስዋና ጋካናዉ፥ ያራ ካንድ ቶጰ ዛዋ ጋካናዉ ግብፀ ኡባ አስ ባይና ባይሳ በሰ ከሳና።

11አሰ ግድን መሄ ግድን ያራ ካንና፤ ኦይታሙ ላይ ዉራና ጋካናዉ፥ አይብካ ያን ዴና።

12ታኒ ግብፀ ቢታ ኡባፈ አዳ ባይሳ ቢታ ኦና፤ እያ ካታማት ኦይታሙ ላይ ዉራና ጋካናዉ፥ ሀራ ላለትዳ ካታማ ኡባፈ አድ ላለትዳ ካታማ ግዳና። ግብፀ አሳ ታኒ ካዎተታ ግዶንነ ሀራ አሳ ግዶን ላላና” ያጌስ።

13ኡባ ሃርያ ጎዳይ ሀይሳዳ ያጌስ፦ “ኦይታሙ ላይፈ ጉየ፥ ታኒ ግብፀይ ላለትዳ ካዎተታ ግዶፈ ሺሻና።

14ታኒ ነና ዛራዳ ጋሽትሳና ኤንታ የለትዳ ዱገሀ ግብፀን ደእያ ጳትሮሳ ቢታ ዛራና፤ ያን ኤንቲ ላፋ ካዎተ ግድድ ዳና።

15ግብፀይ ሀራ ካዎተታ ኡባፈ ላፋ ካዎተ ግዳና። ዛሪድ ሀራ ካዎተታ ቦላ ባና ቁ ቁ ኦና፤ እ ሀራ ካዎተ ሃሮናዳ ታኒ እያ ጉና።

16እስራኤለይ ዛሪድ ማዶ ደማናዉ ግብፀን አማነተና፤ ግብፀን አማነትዳ አማነተይ አይ መላ ቆሆኮ እስራኤለይ አኬካና። ታኒ ኡባ ሃርያ ጎዳ ግደይሳ ኤንቲ ሄ ዎደ ኤራና” ያጌስ።

17ኑኒ ድኤትዳ ላታማነ ላፑን ላይን፥ ኮይሮ አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ።

18“አሳ ናአዉ፥ ባብሎነ ካዎይ ናቡካዳናፆር ፅሮሳ ቦላ ኦላ ደንናዉ ጊግስ። ኤንታ ሁጰይ ቆለታና ጋካናዉነ ኤንታ ሀሸይ ሾለታና ጋካናዉ ኦላንቾት ዴፆ ቶሆ ቶካና መላ ኦዶሶና። ግዶሽን፥ ካዎይነ ኦላንቾት ሀ ዳቡራ ኡባን ፅሮሳፐ ደምዳባይ ባዋ።

19‘ታኒ ግብፀ ቢታ ባብሎነ ካዋ ናቡካዳናፆራስ አዳ እማና፤ እካ ባ ኦላንቾታስ ዳሞዘ ግዳና መላ ድኦንነ ቦንቀን ኦይክዳባ ኡባ ኤክድ ባና።

20እነ እያ ኦላንቾት ታዉ ኦዳ ግሾ፥ ታኒ እያዉ ግብፀ ቢታ ኤንታ ዳቡራስ ዳሞዘ ኦዳ እማና’ ” ያጌስ ኡባ ሃርያ ጎዳይ።

21“ሄ ጋላስ ታኒ እስራኤለ ደርያ ምንና። ህዝቄላ፥ ነካ አሳስ ኦዳና መላ ታ ነና ምንና። ታኒ ጎዳ ግደይሳ ኤንቲ ሄ ዎደ ኤራና” ያግስ።

← Chapter 28 Jump to: Chapter 30 →