Ezekiel 35

Amharic Gofa GFBEVF (ጌሻ ማፃፋ)

← Chapter 34 Jump to: Chapter 36 →

1ጎዳ ቃላይ ሀይሳዳ ያግሸ ታኮ ይስ።

2“አሳ ናአዉ፥ ሳይረ ዙማኮ ነ ሶምኡዋ ዛራዳ ትንብተ ኦዳ፦

3‘ነኖ፥ ሳይረ ዙማዉ፥ ታ ነዉ ሞርከ ግዳና፤ ታኒ ታ ኩሽያ ነ ቦላ ደንዳ፥ ነና ካሎነ ባይሳ ከሳና።

4ታኒ ነ ካታማታ ላላና፤ ነ ባይሳ ግዳና። ታኒ ጎዳ ግደይሳ ነ ሄ ዎደ ኤራና’ ” ያጌስ ኡባ ሃርያ ጎዳይ።

5ነዉ እስራኤለራ ዉሮና ሞርከተ ደእያ ግሾ፥ ኤንታ ኡንኣ ዎደነ ኤንታ ዉርሰ ፕርዳ ዎደ፥ ኤንታ ነ ማሻስ አዳ እማዳሳ።

6ታ ኡባ ሃርያ ጎዳይ ታ ደኡዋን ጫቃይስ፦ ታኒ ነና ሀይቆን ፕርዳና፤ ነ ሀይቆፐ ከሳ ኤካናዉ ዳንዳአካ። ነ አሰ ዎ እፆና ግሾ አሰ ዎይ ነና ካላና።

7ታኒ ሳይረ ዙማ ካሎነ ባይሳ ከሳና፤ ያራ ኦንካ አና መላ ኦና።

8ታኒ ነ ደረታ ኡባ አሀን ኩንና፤ ደረት፥ ሻፋትነ ዛንጋራት ማሻን ሀይቅዳይሳታ አሀን ካመታና።

9ታ ነና መርናዉ ባይሳ ኦና፤ ነ ካታማት ካሎ አታና፤ ታኒ ጎዳ ግደይሳ ህንተ ሄ ዎደ ኤራና።

10“ታኒ ጎዳይ እስራኤለንነ ይሁዳን ደእሽን ህንተ፥ ‘ሀ ናምኡ ካዎተታነ ሀ ናምኡ ቢታታ ኑ ኦይካና፤ ኤንቲ ኑባ ግዳና ግዳ ግሾ፥

11ህንተ ኤንታ ሞርክድ፥ ኤንታ ቦላ ይሎትዳ ግሾነ ቃናትዳ ግሾ ታ ህንተና ሴራና። ታ ህንተና ፕርድያ ዎደ ታኒ ታና ግደይሳ ህንተና ኤርሳና።’

12ህንተ፥ ‘እስራኤለ ደረት ባይሳ አትዶሶና፤ ኑኒ ምድ ይሳና መላ ኑስ እመትዶሶና’ ግድ፥ ጫይዳ ጫሻ ኡባ ታኒ ጎዳይ ስእዳይሳ ህንተ ሄ ዎደ ኤራና።

13ነ ታ ቦላ ኦቶሮን ኦደትዳ ኦዳነ ዛው ባይና ሃሳይዳ ሃሳያ ታኒ ስአስ።

14ቢታ ኡባይ ኡፋይትያ ዎደ ታኒ ህንተና ባይሳ ከሳና።

15እስራኤለ ላታ ቢታይ ባይሳ ግድዳ ዎደ ህንተ ኡፋይትዳ ግሾ፥ ሳይረ ዙማዉ ኤዶመ ቢታ ኡባ ታኒ ባይሳ ኦና። ታኒ ጎዳ ግደይሳ ህንተ ሄ ዎደ ኤራና” ያጌስ ኡባ ሃርያ ጎዳይ።

← Chapter 34 Jump to: Chapter 36 →