Ezekiel 21

Amharic Gofa GFBEVF (ጌሻ ማፃፋ)

← Chapter 20 Jump to: Chapter 22 →

1ጎዳ ቃላይ ሀይሳዳ ያግሸ ታኮ ይስ።

2“አሳ ናአዉ፥ ነ ሶምኡዋ የሩሳላመኮ ዛራዳ፥ አሳይ ጎይንያ በሳታ ቦላነ እስራኤለ ቢታ ቦላ ትንብተ ኦዳ።

3ሀይሳዳ ያጋ፦ ‘ታኒ ነዉ ሞርከ። ታኒ ታ ማሻ ሾሁዋፐ ሾዳዳ፥ ነ ግዶፐ ፅሎ አሳነ ኢታ አሳ ኡባ ዉርሳና።

4ፅሉዋነ ናጋራንቹዋ ኡባ ይሳናዉ ዱገሀፐ ፑደሀ ጋካናዉ ደእያ አሳ ኡባ ቦላ ታ ማሻ ሾዳና።

5ታኒ ጎዳይ፥ ታ ማሻ ሾሁዋፐ ሾድዳይሳነ ጉየ ዛሮናይሳ አሳ ኡባይ ኤራና’ ” ያጌስ።

6“ሄሳ ግሾ፥ አሳ ናአዉ፥ አሳ ኡባይ ፄልሽን፥ ነ ዎዛናይ መቅን፥ ጫመታዳ ኦላ።

7‘አይስ ኦላይ?’ ያግድ ኤንቲ ነና ኦይችኮ፥ ‘ስንራ ያ ኢታ ዎርያ ግሾ ኦላይስ’ ያጋ። ሄ ዎርያን፥ ‘ዎዛን ኡባይ ያሻን ሴራና፤ ኩሸ ኡባይ አርጋጫና፤ ጎባተ ኡባይ ኤከታና፤ ጉልባት ኡባይ ኮኮራና። ሄ ዎደይ ጋክስ፤ ቱማ ፖለታና’ ” ያጌስ ኡባ ሃርያ ጎዳይ።

8ጎዳ ቃላይ ሀይሳዳ ያግሸ ታኮ ይስ፦

9“አሳ ናአዉ፥ ትንብተ ኦዳ፤ ታኒ ጎዳይ ኦድያባ አሳስ ኦዳ፤ ማሻ፤ ሌፈትዳነ ቁሸትዳ ማሻ።

10“ጎራአናዉ ሌፈትስ፤ ዎልአን መላ ጶላናዉ ቁሸትስ። ታ አሳይ እመትዳ ሴራ እፅዳ ግሾ፥ ህዛፐ ጉየ፥ ኦንካ ኡፋይተና።

11ጎኤታናዉ ማሻይ ቁሸትስ፤ ሌፈትድነ ቁሸትድ፥ ጎራኤይሳስ እመታናሳ።

12አሳ ናአዉ፥ ዬካነ ዘሌላ፤ ሀ ማሻይ ጊገትዳይ ታ አሳ ቦላነ እስራኤለ ሀላቃታ ቦላና። ሀላቃት ታ አሳራ እስፈ ማሻን ሀይቃና፤ ሄሳ ግሾ፥ አዛናዳ ነ ትራ ቆፃ።

13ታኒ ታ አሳ ፓጫና፤ ኤንቲ ናጋራ ፓፆና እፅኮ፥ ሀ መቶይ ኡባይ ኤንታ ቦላ ያና፤ ኡባ ሃርያ ጎዳይ ሀይሳ ኦድስ።

14“ሀእካ አሳ ናአዉ፥ ትንብተ ኦዳ፤ ነ ኩሽያ ባቃ። ሄ ዎደ ማሽ ናምኡ ቶሆ ሄ ቶሆ ዛሪድ ሾጫና፤ ሄስካ ዳጋንያ፥ ዩሹዋ ኡባን ዎያነ ሹክያ ማሽ።

15ሄስ ኤንታ ዎዛናይ ትልአናዳነ ኤንታፈ ዳሮት በታናዳ ኦና። ህንተና አየ! ህንተ ፐንገን ማሽ ዎልአን መላ ዎልአሜስ፤ ሹካናዉ ሾሆፐ ሾደትስ።

16ነኖ፥ ቃራ ማሻዉ፥ ኡሻችነ ሀድርስ ስምዳ ነ ስምዳ ባጋ ኡባ ቡ።

17ህዛ ታኒ ታ ኩሽያ ባቃና፤ ታ ሀንቆይ ዶቻና” ያጌስ ጎዳይ።

18ጎዳ ቃላይ ሀይሳዳ ያግሸ ታኮ ይስ።

19“አሳ ናአዉ፥ ባብሎነ ካዋ ማሻይ ያ ናምኡ ኦገታን ማላ ዎ። ናምኡ ኦገት እስ ቢታፈ ደንዶሶና፤ ኦገይ ካታማኮ ስምያ ኦገን ማላታ ቱሱ ኤሳ።

20እስ ኦግያን ደእያ ማላ ራባ ጌተትያ አሞነ ካታማ ብያ ኦግያ ማሌስ፤ ሀንኮይ ኦገይ ግምበትዳ ይሁዳን ደእያ የሩሳላመ ካታማ ብያ ኦግያ ማሌስ።

21ባብሎነ ካዎይ ኦገት ጋሄትያ ዳጋላን፥ ማላ ቱሳታ ማታን ኤቄስ። እ አዉ ኦግያራ ባነኮ ኤራናዉ፥ ዶንገ ቶራን ሳማ የጋና፤ ባ ኤቃታ ዞረ ኦይቻና፤ ማራጭያ በአና።

22ግምብያ ፐንግያ ላልያ ዱሩማ ኤሀና መላ፥ ዎ ኪታ አና መላ፥ ጬቀታና መላ፥ ድርሳ ፐንግያ ላልያ ዱሩማ ካታማ ፐንገን ኤሳና መላ፥ ቢታ ዶራና መላነ ሚፃ ጊግሳና መላ የሩሳላመ ሳም እያዉ ኡሻቻ ኩሸን ከይስ።

23የሩሳላመ አሳይ ባብሎነ ካዉዋራ ጫቅዳ ግሾ፥ ሄስ ባንታ ቦላ ጋካና ግድ ቆፕቦኮና። ሽን ባብሎነ ካዎይ ኤንታ ድእያ ዎደ ኤንቲ ባንታ ናጋራ ሀሳያና።

24ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ህንተ ናጋራይ ቆንጭስ፤ ህንተ ባላ ግደይሳ አሳ ኡባይ ኤሬስ፤ ህንተ ኦሶይ ህንተ ናጋራንቾ ግደይሳ በሴስ። ሄሳ ግሾ፥ ህንተ ኢታ ኦሶይ ሀሳየታና፤ ህንተ፥ ህንተ ሞርከታስ አድ እመታና።

25“ነኖ፥ ኢታነ ቱና ግድዳ እስራኤለ ሀላቃዉ፥ ነ ፕርዳ ጋላሳይ ጋክስ።

26ኡባ ሃርያ ጎዳይ ሀይሳዳ ያጌስ፦ ነ ሁጵያፐ ካላቻ ደን፤ ነ ሁጰ ፃ ቃራ። ህዛፐ ጉየ ካሰይሳዳ ሀናናባይ ባዋ፤ ዝቃይ ቁ ጋና፤ ቃይ ዝቅ ጋነ።

27ጋዶ! ጋዶ! ታኒ ሀ ካታማ ይሳና። ፕርዳናዉ ማት ደኤይስ ያና ጋካናዉ ሀ ካታማይ ዛሪድ ኬፀተና። እ ያ ዎደ ታ እያዉ አዳ እማና” ያጌስ።

28አሳ ናአዉ፥ ሀይሳዳ ያጋዳ ትንብተ ኦዳ። እስራኤለ ጫይያ አሞነታ ኡባ ሃርያ ጎዳይ ሀይሳዳ ያጌስ ጋዳ ኦዳ። “ይስያ ማሽ ሾሆፐ ሾደትስ፤ ዎናዉ ዎልአሜስ፤ ዉርሳናዉ ቁሸቴስ።

29ህንተ በእያ ቆንጨይ ዎርዶ፤ ህንተ ኦድያ ትንብተይ ዎርዶ። ህንተ ኢታነ ቱና አስ፤ ህንተ ፕርዳ ጋላሳይ ጋክስ ህንተ ቆን ማሽ ዎና ሀኔስ።

30ማሻ ሾሁዋን ዛርተ፤ ህንተ መትዳ በሳን፥ ህንተ የለትዳ ቢታን ታ ህንተ ቦላ ፕርዳና።

31ታኒ ታ ሀንቁዋ ህንተ ቦላ ጉሳና፤ ታ ሀንቆ ታማይ ህንተ ቦላ ኤፃና፤ ይሶ ሜዘትዳ፥ ዎዛና ምኖ አሳስ አዳ እማና።

32ህንተ ታማን ያና፤ ህንተ ሱይ ህንተ ቢታን ጉካና፤ ህንተ ዛሪድ ሀሳየተከታ። ታኒ ጎዳይ ሀይሳ ኦዳስ” ያግስ።

← Chapter 20 Jump to: Chapter 22 →