Ezekiel 41

Amharic Gofa GFBEVF (ጌሻ ማፃፋ)

← Chapter 40 Jump to: Chapter 42 →

1ሄሳፈ ጉየ፥ ሄ ኡራይ ታና ፆሳ ኬን ደእያ ጌሻ በሳ ገልስስ። ሄ ጌሻ በሳ ግዶራ አያ ኦግያ ልክን ኡሱፑን ዋ ግድስ።

2ጎምፓይ ታሙ ዋ ግድስ። ሀድርሳራነ ኡሻቻራ ደእያ ጎዳታ ጎምፓይ እቻሹ ዋ። እ ጌሻ በሳ ዋን አዱሳተይ ኦይታሙ ዋ፥ ጎምፓይ ላታሙ ዋ ግድስ።

3ሄሳፈ ጉየ፥ ቆልአ ገልስ። ቆልአ ገልያ ኦግያ ዋን፥ ናምኡ ዋ ግድስ፤ ጎምፓይ ኡሱፑን ዋ ግድስ፤ ሀድርሳራነ ኡሻቻራ ደእያ ጎዳታ ጎምፓይ ላፑን ዋ ግድስ።

4እ ቆልአ ዋን፥ አዱሳተይ ላታሙ ዋ፥ ዳልጋተይ ላታሙ ዋ ግድስ። ሄሳፈ ጉየ፥ “ሀይስ ኡባፈ ጌሻ በሳ” ያግስ።

5ሄ ኡራይ ፆሳ ኬ ጎዳ ዋን፥ ኦርደተይ ኡሱፑን ዋ ግድስ። ሄ ጎዳራ ኦይከትድ፥ ፆሳ ኬ ግዶ ባጋ ዩሹዋን ኬፀትዳ ኦይዱ ኦይዱ ዋ ዳልግያ ዳሮ ክፍለት ደኦሶና።

6ሄ ክፍለት እሶይ እሱዋ ቦላ ኬፀትዳ ሄ ፖቀ ግድን፥ እስ እስ ፖቅያ ቦላ ሀስታሙ ክፍለት ደኦሶና። ግምብያ ዩሾን ደእያ ክፍለታ ቶክያ ቱቀት ደኦሶና። ሽን ሄ ቱቀት ግምብያ ግዶ ኩመ ገልቦኮና።

7ፆሳ ኬ ዩሾን ደእያ ክፍለታ ዳልጋተይ ፖቀይ ጉጅያ ዎደ ጉጄስ። ፆሳ ኬ ዩሾን ደእያ ኬ ኦሶይ ጋርሳፈ ፑደ ዳልግሸ ብያ ግሾ ኬይ ፑደ ጉዠትዳ ዎደ ኡባን ክፍለታ ዳልጋተይ ጉጅሸ ቤስ። ግዶ ፖቅያራ ካንድ፥ ቆሞ ዉርሰ ፖቅያ ጋካናዉ ኤፍያ ደት ደኦሶና።

8ፆሳ ኬ ዩሾን ቁ ግዳ ባሶይ ደኤይሳ በአስ። እያ ዩሹዋን ደእያ ክፍለት ሄ ባሱዋ ቦላ ኬፀትዶሶና፤ ሄ ባሶይ ግዶ ዳባባፐ ኡሱፑን ዋ ቄስ።

9ሄ ክፍለታ ካረ ባጋ ጎዳ ኦርደተይ እቻሹ ዋ። ካይሳ በሳይ ፆሳ ኬፈነ፥

10ካህነታ ክፍልያፐ ግዶን ደኤስ፤ እያ ኦርደተይ ላታሙ ዋ።

11ካይሳ በሳፈ ኡሻቻንነ ሀድርሳ ባጋን ደእያ ክፍለታ ገልስያ ፐንገት ደኦሶና። ሄ ፐንገት እሶይ ቆሞ ባጋራ፥ እሶይ ቃስ ጋርሳ ባጋራ ደኤስ። ካይሳ በሳ ዩሹዋ ጋሰያ ባሱዋ ዳልጋተይ እቻሹ ዋ።

12ፆሳ ኬፈ ዉሎሀ ባጋራ ደእያ ካይሳ በሳፈ ስን ባጋራ እስ ኬ ደኤስ። ሄ ኬ አዱሳተይ ኡዱፉን ታሙ ዋ፤ ጎምፓይ ላፑን ታሙ ዋ። ሄ ኬ ጎዳ ኦርደተይ እቻሹ ዋ።

13ሄ ኡራይ ፆሳ ኬ ካረ ባጋ ዋን፥ አዱሳተይ ፄቱ ዋ። ፆሳ ኬፈ ጉየ ባጋራ ደእያ ካይሳ በሳ ካንድ ዉሎሀ ባጋ ኬ ጋካናዉ ደእያ በሳ ዋን ፄቱ ዋ ግድስ።

14ዶሎሀ ባጋራ ደእያ ፆሳ ኬ ጎምፓይ ናምኡ ካይሳ በሳታ ጉጅድ ዋን ፄቱ ዋ ግድስ።

15ናምኡ ባጋራ ደእያ አያ በሳታ ጉጅድ፥ ዉሎሀ ባጋራ ደእያ ኬ አዱሳተ ዋን፥ ፄቱ ዋ ግድስ። ፆሳ ኬ ጌሻ በሳይ፥ እያ ቆልአይነ እያ ባራንዳይ

16ዉይገፐ ብድ፥ ማስኮተታ ጋካናዉ ደእያ በሳይ ምን ልጨትድ ኡትስ፤ ማስኮተትካ ምን ልጨትድ ኡትዶሶና።

17ፆሳ ኬ ሶ ባጋ ክፍለታ ጎዳይ፥ ፐንገታፐ ቦላ አና ጋካናዉ አሌቀትድ ኡትስ።

18ክፍለታ ዩሾን፥ ዛምባ ምንነ ክሩበታ ምስለይ አሌቀትስ። ሄ ዛምባ ም ምስለት አሌቀትዳይ ናምኡ ክሩበታፐ ግዶና። ክሩበታስ ናምኡ ናምኡ ሶምኦይ ደኤስ።

19እስ ባጋራ አሳ ሶምኦ ዳንያ ሶምኦይ ዛምባ ምስልያ ፄሌስ፤ ሀንኮ ባጋራ ጋሞ ሶምኦ ዳንያ ሶምኦይ ዛምባ ምስልያ ፄሌስ።

20ጌሻ በሲ ዉይገፐ ብድ፥ ፐንገታፐ ቦላ ባጋን ደእያ በሳ ጋካናዉ፥ ጎዳ ዩሾ ኡባይ ሄሳዳ አሌቀትስ።

21ፆሳ ኬ ፐንገ ፃንገት ኡባይ ኦይዱ ማዛነይ ደእያ ኡባይ እስ ልከ። ኡባፈ ጌሻ በሳ ገልያ በሳ ስንን

22ምፈ ኦሰትዳ ያርሾ በሲ ዳንያ በሲ በንቴስ። እካ ኦይዱ ማዛነይ ግድድ፥ ዳልጋተይነ አዱሳተይ እስ ግና፤ እሶይ እሶይ ናምኡ ዋ፤ አዱሳተይ ሄ ዋ። ማዛነታ ቱሳት፥ ባሶትነ ምየ ባጋን ደእያ ሳንቃት ኡባይ ምፈ ኦሰትዶሶና። ሄ ኡራይ ታኮ፥ “ሀይስ ጎዳ ስንን ደእያ ፃርጴዛ” ያግስ።

23ጌሻ በሳ ገልስያ እስ ፐንገይ ደኤስ፤ ኡባፈ ጌሻ በሳ ገልስያ እስ ፐንገይ ደኤስ።

24እስ እስ ፐንግያስ ግዶን ዳኮትድ ዶየትያ ናምኡ ሳንቃት ደኦሶና።

25ጎዳታ ቦላ መትዳይሳዳ ጌሻ በሳ ፐንገታ ሳንቃታ ቦላ ክሩበታነ ዛምባታ ምስለይ መትድ ኡትስ። ጋ ገልያ ክፍልያ ስንን፥ ካረ ባጋራ ምፈ ኦሰትዳ ካም ደኤስ።

26ሄ ክፍልያ ገልያ ጎዳታ ምየን ማስኮተት ደኦሶና። ጎዳት ዛምባ ምስለን አሌቀትዶሶና። ሄ ክፍልያ ገልያ ኡሻቻንነ ሀድርሳን ደእያ ክፍለታ ደ ባጋራ ካምያ ካር ደኤስ።

← Chapter 40 Jump to: Chapter 42 →