Ezekiel 3

Amharic Gofa GFBEVF (ጌሻ ማፃፋ)

← Chapter 2 Jump to: Chapter 4 →

1ፆሳይ፥ “አሳ ናአዉ፥ ነ ስንን ደኤይሳ ማ፤ ሀ ፃ ማፃፋ ማ፤ ባዳ፥ እስራኤለ አሳስ ኦዳ” ያግስ።

2ሄሳ ግሾ፥ ታኒ ታ ዶና ዶይን፥ እ ታና ፃፃ ማፃፋ ባርስስ።

3እ ታኮ፥ “አሳ ናአዉ፥ ሀ ታ ነና ባርስያ ፃ ማፃፋ ማ፤ እያራ ነ ኡሉዋ ኩን” ያግስ። ታ ምያ ዎደ ታ ዶናን ኤሳዳ ማልእስ።

4ፆሳይ ታኮ፥ “አሳ ናአዉ፥ ደንዳዳ፥ እስራኤለ አሳኮ ባ፤ ታ ቃላ ኤንታዉ ኦዳ።

5ኔኒ ኪተትዳይ፥ ኤንታ ዶናይ ኤረቶናነ ቃላይ ገሎና አሳኮ ግደና፤ ሽን ኔኒ እስራኤለ አሳኮ ኪተታዳሳ።

6ታኒ ነና ኤንታ ቃላይ ገሎና፥ ኤንታ ዶናይ ኤረቶናነ አኬካናዉ መትያ ዳሮ ደርያኮ ታ ነና ኪታብከ። ታ ነና ኤንታኮ ኪትዳባ ግድያኮ፥ ኤንቲ ነ ኦድያባ ስአናሽን።

7እስራኤለ አሳይ ታ ኦድያባ ስአናዉ ኮዮና ግሾ፥ ነ ኦደይሳ ስኦኮና። እስራኤለ አሳይ ዎዛና ሙመነ ዬል ባይናይሳታ ግድያ ግሾ ነ ኦድያባ ስኦኮና።

8ሽን ታኒ ነና ኤንታዳ ዎዛና ሙመነ ዬል ባይናይሳ ኦና።

9ታኒ ነና ያሽ ባይናነ ዛላፈ አዳ ምኖ ኦና። ኤንቲ ማካላንቾ ግድኮካ፥ ኤንታዉ ያዮፋ፤ ኤንታዉ ዳጋሞፋ” ያግስ።

10ጉጅድ ፆሳይ፥ “አሳ ናአዉ፥ ታ ነዉ ኦድያ ቃላ ኡባ ምንዳ ስአ፤ አኬካ።

11ድኦን ደእያ ነ አሳኮ ባዳ ኤንታዉ ኦዳ። ኤንቲ ስእን፥ ስኦና እፅን፥ ታኒ ኡባ ሃርያ ጎዳይ ኦደይሳ ኤንታዉ ኦዳ” ያግስ።

12ሄሳፈ ጉየ፥ አያናይ ታና ፑደ ደንስ፤ ጎዳ ቦንቾይ ባ በሳፈ ፑደ ደንድያ ዎደ ታፐ ጉየራ ዎልቃማ ጉን ስአስ።

13ሄስካ፥ ደኦን ደእያ መተታ ቀፈይ እሶይ እሱዋራ ቦሸትያ ግርሳይነ ኤንታ ምየን ደእያ ገርቶታ ግርሳራ ጋሄትድ፥ ዎልቃማ ጉን ግርስ ስአስ።

14አያናይ ታና ፑደ ደንስ፤ ታና ኤክድ ሀራ በሲ ኤፍስ፤ ጎዳ ግታ ዎልቃይ ታና ሃርስ፤ ታ አያናን ጫመታሸነ ይሎታሸ ባስ።

15ኮቦራ ሻፋ ማታን፥ ተል-አብባን ደእያ ድኤትዳ አሳኮ ጋካስ። ታኒ ዳጋማዳ ያን ኤንታራ ላፑን ጋላስ ጋምአስ።

16ላፑን ጋላስ ዉርሰን ጎዳ ቃላይ ታኮ ሀይሳዳ ያግሸ ይስ፦

17“አሳ ናአዉ፥ ታ ነና እስራኤለ አሳ ናግያ አስ ኦስ። ታ ዶናፐ ከይያ ቃላ ስእዲ፥ ናጋና መላ ኤንታዉ ኦዳ።

18ታኒ ናጋራንቹዋ፥ ‘ቱማ ኔኒ ሀይቃና’ ግያ ዎደ፥ ነ ባዳ እያዉ ኦዶና እፅኮ፥ እ ባ ኢታ ኦግያፐ ስማና መላነ እያ ሸምፖይ አታና መላ ነ እያ ናግሶና እፅኮ፥ እ ባ ናጋራን ሀይቃና፤ ሽን እያ ሱ ግሾ ታ ነና ኦይቻና።

19ኔኒ ናጋራንቹዋስ ኦድን፥ እ ባ ናጋራፐነ ባ ኢታ ኦግያፐ ስሞና እፅኮ፥ እ ባ ናጋራን ሀይቃና፤ ሽን ኔኒ ነ ሁጵያ አሻና።

20“ፅሎ አስ ባ ፅሎተፈ ጉየ ስሚድ፥ ኢታ ኦያ ዎደ ታ እያ ስንን በ ዎን፥ እ ሀይቃና። እ ስማና መላ ነ እያዉ ኦዶና ግሾ እ ባ ናጋራን ሀይቃና። እ ካሰ ኦዳ ፅሎ ኦሶይ ዛሪድ ቆፈተና፤ ሽን ታኒ እያ ሱ ግሾ ነና ኦይካና።

21ሽን ፅሎ አስ ናጋራ ኦና መላ ነ እያዉ ኦድን፥ እ ነ ኪታ ስእድ፥ ናጋራ ኦና አግኮ፥ ቱማ እ ደኦን ዳና፤ ኔኒ ነና አሻና” ያግስ።

22ሄ በሳን ጎዳ ዎልቃይ ታና ሃርስ፤ እ ታኮ፥ “ደንዳዳ ዛንጋራ ባ፤ ያን ታ ነዉ ኦዳና” ያግስ።

23ታ ደንዳዳ፥ ዛንጋራ ባስ። ሄ በሳን ካሰ ኮቦራ ሻፋ ማታን ታ በእዳይሳዳ፥ ያን ጎዳ ቦንቹዋ በአስ፤ ታኒ ሳአን ሶምኦራ ጉፋናስ።

24ሽን አያናይ ታ ግዶ ገልድ፥ ታና ታ ቶሃን ኤስስ። ጎዳይ ታኮ፥ “ነ ሶ ባዳ፥ ነ ቦላ ፐንግያ ጎርዳዳ ኡታ።

25አሳ ናአዉ፥ ነ ዎዶሮን ቃሸታና፤ አሳኮ ከያናዉ ዳንዳአካ።

26ሀ ማካላንቾ አሳስ ነ ኦዶና መላነ ኤንታ ቦላ ሀንቀቶና መላ ታ ነ ዶና ሙምሳና።

27ሽን ታ ነዉ ኦድያ ዎደነ ነ ዶና ዶይያ ዎደ ኔኒ፥ ‘ኡባ ሃርያ ጎዳይ፥ ኤንቲ ማካላንቾ ግድያ ግሾ፥ ስእያ ኦንካ ስኦ፤ ስኦና እፅያ ኦንካ ስኦፖ’ ያጋዳ” ኦዳና።

← Chapter 2 Jump to: Chapter 4 →