Ezekiel 26

Amharic Gofa GFBEVF (ጌሻ ማፃፋ)

← Chapter 25 Jump to: Chapter 27 →

1ኑኒ ድኤትዳ ታማነ እሳን ላይን፥ አጌና ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ።

2“አሳ ናአዉ፥ ፅሮሳ አሳይ ኡፋይትሸ፥ ‘ሀሹ! የሩሳላመይ ኩንድስ፤ እያ ፐንገይ ዋግ ግድ ዶየትስ። እ ላለትድ ዶየትዳ ግሾ ህዛፐ ጉየ ኑ ዱረታና’ ያጎሶና።

3ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ‘ነኖ፥ ፅሮሳ፥ ታኒ ነዉ ሞርከ። አባ ዙለይ ደንደይሳዳ ታኒ ዳሮ ካዎተታ ነ ቦላ ኤሀና።

4ኤንቲ ነ ድርሳ ግምብያ ላላና፤ ነ ግምበ ሻኮታ መንና። ታ ነና ቢታ ኡባ ቁችድ ኤፍን፥ ካሎ ደእያ ዛላ ኦና።

5ኔኒ አባ ግዶን አሳይ ባንታ ሞሎ ግትያ መልሳናዉ ምጭያ በሲ ግዳና። ሀራ ካዎተት ፅሮሳ ቦንቃና።

6ዋና ቢታን ደእያ ጉታታ ማሻን ዉርሳና። ታኒ ጎዳ ግደይሳ ኤንቲ ሄ ዎደ ኤራና’ ያጌስ ኡባ ሃርያ ጎዳይ።

7“ኡባ ሃርያ ጎዳይ ሀይሳዳ ያጌስ፦ ‘ፅሮሳ ቦላ ኦላ ደንና መላ ካዎታ ካዎ ግድዳ ባብሎነ ካዋ ናቡካዳናፆራ፥ ፓራታራ፥ ፓራ ጋረታራነ ዳሮ ኦላንቾታራ ፑደሀ ባጋፈ ኤሀና።

8ኤንቲ ዋና ቢታን ደእያ ጉታታ ማሻን ዉርሳና። ኤንቲ ነና ተቅድ፥ ነ ድርሳ ግምብያ ጋድ፥ ቢታ ዶራና፤ ባንታ ጎንዳልያ ነ ቦላ ደንና።

9ድርሳ ግምበታ ዶምእድ ላልያ ሚሸን ነ ድርሳ ግምብያ መንረና፤ ባንታ ኦላ ሚሸን ነ አዱሳ ግምበታ ላላና።

10እያ ፓራት ዳሮ ግድያ ግሾ፥ ኤንቲ ደንያ ባናይ ነና ካማና። ፓራትነ ፓራታ ጋረት ላለትዳ ካታማ ድርሳ ፐንግያራ ገልያ ዎደ ኤንቲ ስስያ ጋርማሞይ ነ ድርሳ ግምብያ ቃና።

11ኤንታ ፓራት ኦገታ ኡባ የና። ነ አሳ ማሻን ዉርሳና፤ ነ ዎልቃማ ቱሳት ሳአን ኩንዳና።

12ነ ሻሎይ ድኤታና፤ ነ ዛልእያ ሚሸት ቦንቀታና። ነ ድርሳ ግምበታነ ነ ሎኦ ኬታ ኡባ ይሳና፤ ነ ሹቻታ፥ ነ ሳንቃነ ላለትዳ ኡባ ኤፍድ አባን የጋና።

13ነ ማልኦ የ ታ ተቃና፤ ነ ዲ ግርሳይ ዛር ስኤተና።

14ታ ነና ካሎ ደእያ ዛላ ኦና፤ ኔኒ አሳይ ባንታ ሞሎ ግትያ ምጭያ በሲ ግዳና። ታኒ ጎዳይ ሀይሳ ኦድዳ ግሾ፥ ኔኒ ዛራዳ ኬፀታካ’ ” ያጌስ ኡባ ሃርያ ጎዳይ።

15“ኡባ ሃርያ ጎዳይ ፅሮሳ ካታማኮ ሀይሳዳ ያጌስ፦ ‘ነ ሞርከት ነ ቦላ ደንድያ ዎደ ዩሾይ አባን ተቀትዳ ቢታን ደእያ አሳይ፥ ነ ጎይረትያ ዎደ ዋስያ ዋሱዋ ስእድ፥ ያሻን ኮኮራና።

16አባ ዶናን ደእያ ሃረይሳት ባንታ አራታፐ ዎና። ባንታ ቦንቾ ማኡዋነ አሌቀትድ ኦሰትዳ ማኡዋ ቃርድ ያሻን ኮኮርሸ ቢታን ኡታና። ነ ቦላ ጋክዳ መቱዋ ቆፕድ፥ ኤንቲ ዳሮ ዳጋማና፤ ኤንቲ ኡባ ዎደ ኮኮርሸ ዳና።’

17ኤንቲ ነዉ ሀይሳዳ ያግድ ዘለልስ ከሳና፦ “አባ ዶናን ደእያ ያሽያ ካታማታ፤ ዎልቃማ አሳይ ደእያ ካታመ፥ ኔኒ ዋና ላለታዲ? ኔንነ ነ ግዶን ደእዳ አሳይ አባ ዶናን ደእያ አሳ ኡባ ያሽሳዳሳሽን።

18ኔኒ ኩንድያ ጋላስ ዩሾይ አባን ተቀትዳ ቢታት ኮኮርዶሶና። ሃን ተቀትዳ ቢታት ነ ዩዋን ዳጋምዶሶና” ያግስ።

19ኡባ ሃርያ ጎዳይ ሀይሳዳ ያጌስ፦ “ሀእ ኦንካ ዶና ካታማታዳ ታ ነና ባይሳ ከሳና። ታኒ አባ ሃ ነ ቦላ ኤህን፥ ዳሮ ሃይ ነና ካማና።

20ኔኒ ስኦለ ገላዳ በን ሀይቅዳ አሳራ ዋላከታና መላ ኦና። ኔኒ ቢታፈ ጋርሳን፥ በን ሞገትድ፥ መርናዉ ላለትድ አትዳይሳታራ ዳና መላ ኦና። ኔኒ ዛራዳ አስ ደእያ ካታማ ግዳካ፤ ደኦን ደኤይሳታ ቢታን ዛራዳ በሰ ደማካ።

21ታኒ ነ ዉርሰ ዳጋንያ ዉርሰ ኦና፤ ነዉ ሄስ ዉርሰ ግዳና። አስ ነና ኮያና፤ ሽን ኔኒ ዛራዳ በንታካ” ያጌስ ኡባ ሃርያ ጎዳይ።

← Chapter 25 Jump to: Chapter 27 →