Ezekiel 6

Amharic Gofa GFBEVF (ጌሻ ማፃፋ)

← Chapter 5 Jump to: Chapter 7 →

1ጎዳ ቃላይ ታኮ ሀይሳዳ ያግሸ ይስ።

2“ነኖ፥ አሳ ናአዉ፥ እስራኤለ ዙማታ ደሬቃ ፄላሸ፥ ኤንታ ቦላ ትንብተ ኦዳ።

3ህንተኖ፥ እስራኤለ ደረቶ፥ ኡባ ሃርያ ጎዳ ቃላ ስእተ። ኡባ ሃርያ ጎዳይ እስራኤለ ዙማታኮ፥ ዞዘታኮ፥ ዛንጋራታኮነ ካካታኮ ሀይሳዳ ያጌስ፦ ‘አሳይ ኤቃ ጎይንያ በሳታ ታኒ ይሳናዉ ማሻ የዳና።

4ህንተ ያርሾ ፃርጴዛቲ ላለታና፤ ህንተ እፃነ ጩይስያ ሚሸት መቃና፤ ሀይቅዳ ህንተ አሳይ ህንተ ኤቃታ ስንን የገታና።

5ታኒ እስራኤለ አሳ አሀ ኤንታ ኤቃታ ስንን ዝንእሳና፤ ህንተ መቀታ ህንተ ያርሾ ፃርጴዛታ ዩሾን ላላና።

6ህንተ ደእያ በሳ ኡባን፥ ህንተ ካታማትነ ህንተ ጎይኖ በሳት ላለታና። ሄሳዳካ፥ ህንተ ያርሾ በሳይ ቱናናነ ላለታና፤ ህንተ ኤቃት መቃና፤ ህንተ እፃነ ጩይስያ ሚሸት መቃና፤ ህንተ ኦዳባ ኡባይ ፕተትድ ያና።

7ሀይቅዳ አሳይ ህንተ ግዶን ኩንዳና። ታኒ ጎዳ ግደይሳ ህንተ ሄሳን ኤራና።

8ታኒ ህንተ ግዶን ማሻፈ አትዳ ጉታ ፓፃ አሻና፤ ህንተ ቢታታንነ ካዎተታ ግዶን ላለታና።

9ማሻፈ አትዳ ኤንቲ፥ ድኤትድ ብዳ ካዎተታ ግዶን ደእሸ ታና ሀሳያና። ኤንቲ ባንታ ላይማ ዎዛናንነ አሞትያ አይፍያን ኤቃ ጎይናናዉ ስሚድ ታ ዎዛና መንዳይሳ ኤንቲ አኬካና። ኤንቲ ባንታ ኢታ ኦሱንነ እፀትዳ ኤቃ ጎይኖ ጋሶን ባንታና ሻተታና።

10ታኒ ጎዳ ግደይሳ ኤንቲ ኤራና። ታኒ ኤንታ ቦላ ኢታባ ኤሀና ግዳይ ጮ ባብሶ ግዶናይሳ ኤንቲ አኬካና’ ” ያጌስ።

11ኡባ ሃርያ ጎዳይ ታኮ ሀይሳዳ ያጌስ፦ “እስራኤለ አሳይ እፀትዳ ኤቃ ጎይንዳ ግሾ፥ ነ ሀንቁዋ ብራ ማላዳ በሳ፤ ነ ይሉዋ ቢታ ቃካዳ ቆንጭሳ። ኤንታና አየ! ኤንቲ ኦላን፥ ኮሻንነ ጋዶን ዉራና።

12ሃሆን ደኤይ ጋዶን ያና፤ ማታን ደኤይ ኦላን ሀይቃና፤ ፓፃ አትዳይ፥ ኮሻን ዉራና። ሄሳዳ ኦዳ፥ ታ ሀንቁዋ ኤንታ ቦላ ፖላና።

13ኤንታ አሀይ ኤንታ ኤቃታ ግዶ ኡባን፥ ኤንታ ያርሾ በሳ ዩሾ ኡባን፥ ዙማታ ቦላ ኡባን፥ ደረ ቦላ ኡባን፥ ጭልኦ ም ጋርሳ ኡባን፥ ዳሻ ም ጋርሳ ኡባን፥ ባንታ ኤቃታስ ሳውያ ያርሾ ያርሽዳ በሳ ኡባን ኩንድዳ ዎደ ታኒ ጎዳ ግደይሳ ኤራና።

14ታኒ ታ ኩሽያ የዳዳ፥ ኤንቲ ደእያ ቢታ ኡባ፥ ዱገሀ መላ ቢታፈ ብድ ፑደሀን ደእያ ደብላታ ጋካናዉ ባይሳ ኦና። ታኒ ጎዳ ግደይሳ ኤንቲ ሄሳን ኤራና” ያጌስ።

← Chapter 5 Jump to: Chapter 7 →