Romans 12

Belarusian Bible Maley (© 1931, 1948; у 1985, 1991 Унесены Праўкі)

← Chapter 11 Jump to: Chapter 13 →

1Вось-жа вельмі прашу вас, браты, праз міласэрдзе Божае, аддайце целы вашыя на ахвяру жывую, сьвятую, угодную Богу, на разумнае служэньне вашае,

2і не датарноўвайцеся да веку гэтага, але пераабражайцеся абнаўленьнем розуму вашага, каб вам пазнаваць, што ёсьць Воля Божая, добрая, угодная і дасканалая.

3Бо кажу праз дадзеную мне ласку кожнаму сярод вас: ня думайце аб сабе больш, чым трэба думаць, але думайце мудра, як Бог кожнага мерай веры надзяліў.

4Бо, як у адным целе ў нас многа членаў, але ня ўсе члены маюць тую-ж работу,

5гэтак мы многія складаем адно цела ў Хрысьце, а паасобку адзін для аднаго члены.

6Калі-ж па данай нам ласцы маем розныя здольнасьці, дык, калі прароцтва, прароч па меры веры;

7калі служэньне, служы; калі навучаеш, вучы;

8калі напамінаеш, напамінай; калі раздаеш, дык у прастаце; калі пастаўлены над другімі, старшынствуй у шчырасьці; калі міласэрны, дык у радасьці.

9Любоў няхай будзе ў вас некрывадушная; брыдзьцеся зла, прыляпляйцеся да дабра.

10Братняй любоўю адзін да аднаго пяшчотныя, у пашане адзін аднаго апераджайце;

11у рупнасьці не слабейце; духам палайце; Госпаду служыце.

12Пацяшайцеся надзеяй; у горы будзьце цярплівымі, у малітве сталымі;

13у патрэбах сьвятых бярыце ўдзел; рупліва прымайце падарожных;

14багаслаўце тых, каторыя вас перасьледуюць; багаслаўце, а не кляніце.

15Радуйцеся з тымі, хто радуецца, і плачце з тымі, хто плача.

16Будзьце аднадумныя між сабою; ня думайце зашмат аб сабе, але да пакорных прыхіляйцеся. Ня будзьце мудрымі самі праз сябе.

17Нікому не адплачвайце злом за зло, але старайцеся аб добрае перад усімі людзьмі.

18Калі магчыма з вашага боку, будзьце ў згодзе з усімі людзьмі.

19Ня мсьціце за сябе, умілаваныя, але дайце месца (Божаму) гневу. Бо напісана: Мне помста, Я аддам! кажа Госпад. (Другазак 32:35)

20Дык, калі вораг твой галодны, накармі Яго; калі піць хоча, напаі яго: бо, робячы гэтае, зьбярэш яму на галаву вугальле гарачае. Ня будзь пераможаны злом, але перамагай зло дабром. (Прып 25:21-22)

← Chapter 11 Jump to: Chapter 13 →