Ezekiel 12

Dagbani Bible (Naawuni Kundi Kasi)

← Chapter 11 Jump to: Chapter 13 →

1Ka Yawɛ daa yɛli ma,

2“Daadam, a bela duŋtaariba sunsuuni, bɛn mali nina din ni nya, amaa ka bi nyara, ka mali tiba din ni wum, amaa ka bi wumda, dama bɛ nyɛla duŋtaariba.

3“Dinzuɣu daadam, malimi shili n-kahi a nɛma zo. A ni yi amaŋmaŋ’ biɛhigu shee n-chaŋ luɣ’ shɛli kaman kuŋkɔɣinzɔr’ la bɛ ninni. Di pa shɛli bɛ ni baŋ di gbinni, hal bɛ ni kul nyɛ duŋtaariba maa zaa yoli.

4A ni ti kahi a nɛma yina wuntaŋ’ ni bɛ ninni kaman nira ni yɛn zo kuŋkɔɣim ka kahi o nɛma shɛm la, ka a ti yi bɛ ninni zaawuni kaman kuŋkɔɣinzɔr’ la.

5Chibimi gooni voli bɛ ninni n-kahi a nɛma doli nimaani yi.

6Kpuɣim’ a nɛma maa buɣi a bɔɣusapiŋ zuɣu bɛ ninni, ka zaŋ bini pɔb’ a nina n-ʒi li yi liɣa din ni chɛ ka a nini ku nya tiŋgbani. Dama n zaŋ a leela shihirili Izraɛlnim’ sani.”

7Ka n daa niŋ kaman o ni daa zali ma ni n niŋ shɛm maa. N daa kahi n nɛma yina kaman kuŋkɔɣinzɔr’ la. N daa zaŋ n nuhi chibi gooni voli n-zaŋ n nɛma yina liɣa nti zaŋ li buɣi m bɔɣusapiŋ zuɣu bɛ ninni.

8N-daa yi biɛɣu asiba ka Yawɛ bɔhi ma,

9“Daadam, Izraɛlnim’ bɛn nyɛ duŋtaariba maa bi bɔh’ a ni bɔ ka a leei niŋdi maa?

10Yɛlim’ ba, ‘Yawɛ ŋun nyɛ yi Duuma ŋɔ ni yɛli shɛm m-bɔŋɔ: Anabitali yɛtɔɣa ŋɔ nyɛla Jɛrusalɛm naa mini Izraɛlnim’ bɛn zaa be di ni dini.’

11Yɛlim’ ba, ‘N nyɛla shihirili yi sani, n ni niŋ shɛm maa, lala nti yɛn niŋ ya.’ Bɛ ni ti gbahi ba n-zaŋ ba chaŋ tinzun’ tiŋ’ ti niŋ dabitim ni.

12Ka bɛ naa ŋun be bɛ sani ni ti kah’ o nɛma buɣ’ o bɔɣusapiŋ zuɣu zaawun’ yuŋ yi, ka bɛ ti chibi gooni voli ka o doli dini yi. O ni ti zaŋ bini pil’ o nina din ni chɛ ka o nini ku nya tiŋgbani.

13N ni yirigi n zana pil’ o gbaag’ o n-zaŋ o tahi Babilɔn din nyɛ Kalidianim’ tiŋgbɔŋ la ni; amaa o nini ti ku nya li, ka o ti kpi nimaani.

14Ka n wurim ninvuɣ’ shɛb’ bɛn be o sani zaa kpɛhi luɣilikam, ninvuɣ’ shɛb’ bɛn sɔŋd’ o min’ o tɔbbihi zaa, ka ŋooi takɔbi doli ba.

15“N yi ti wurim ba kpɛhi zuliya shɛb’ ni mini tiŋgbɔn’ shɛŋa ni, bɛ ni baŋ ni mani n-nyɛ Yawɛ.

16Amaa n ni ti chɛ ka bɛ niriba biɛla tiligi takɔbi maa mini fifali ni ni alɔbo ni din ni chɛ ka bɛ yɛli bɛ ni yɛn chaŋ zuliya shɛb’ sani maa, bɛ ni tum din chihiri shɛŋa zaa, di saha ka bɛ baŋ ni mani n-nyɛ Yawɛ.”

17Ka Yawɛ daa yɛli ma,

18“Daadam, dim’ a bindirigu ka a niŋgbuna sɔhira ka nyu kom ni dabiɛm, ka a niŋgbuna sɔhira.

19Ka a yɛli tiŋgbɔŋ maa nima, ‘Yawɛ ŋun nyɛ ti Duuma ŋɔ ni yɛli shɛm zaŋ chaŋ Jɛrusalɛmnim’ bɛn be Izraɛl tiŋgbɔŋ ni la polo m-bɔŋɔ: Bɛ ni ti di bɛ bindirigu ni dabiɛm ka nyu kom ni suhuzɔhibo, dama binshɛli ti ku lan be bɛ tiŋgbɔn maa ni ninvuɣ’ shɛb’ bɛn zaa be di ni tahiri damli na la zuɣu.

20Ka niriba ni be tin’ shɛŋa ni zaa ni ti kpalim tiŋ’ kuma. Ka tiŋgbɔŋ maa zani dabari. Ka yi baŋ ni mani n-nyɛ Yawɛ.’ ”

21Yawɛ daa yɛli ma,

22“Daadam, ŋah’ bɔ ka yi leei ŋahira zaŋ chaŋ Izraɛl tiŋgbɔŋ polo din yɛra, ‘Dabisa maa yuuya, ka ʒii kam kpalim yoli?’

23Dinzuɣu yɛlim’ ba ni Yawɛ ŋun nyɛ yi Duuma ŋɔ yɛliya, ‘N ni kpihim ŋahali maa ka bɛ ku lan ŋahi li Izraɛl tiŋgbɔŋ ni yaha.’ Amaa yɛlim’ ba ni dabisa maa miriya, ka ʒii kam ni niŋ pali.

24“Dama ʒiri ʒiinim’ ti ku lan beni, ka ʒiri anabitali yɛtɔɣa gba ti ku lan be Izraɛl tiŋgbɔŋ ni.

25Amaa man’ Yawɛ nti yɛn zaŋ n yɛtɔɣa tɔɣisi, ka di niŋ pali. Di ti bi lan yɛn yuui yaha. Amaa yinim’ duŋtaariba ŋɔ ʒiɛman’ ŋɔ ni ka n ni tɔɣisi yɛtɔɣa ka chɛ ka di niŋ pali. Yawɛ ŋun nyɛ ti Duuma ŋɔ n-yɛli lala maa.”

26Ka Yawɛ daa lan yɛli ma,

27“Daadam, nyama, bɛn’ Izraɛlnim’ yɛra, ‘O ni nyari ʒii shɛŋa maa yuma na galisiya, ka o daanabitali maa nyɛ saha shɛli din be katiŋ’ yɛtɔɣa.’

28Dinzuɣu yɛlim’ ba, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: N yɛligu bi lan yɛn yuui. Amaa n yi kul tɔɣisi yɛtɔɣ’ shɛli, di ni niŋ pali. Yawɛ ŋun nyɛ ti Duuma ŋɔ n-yɛli lala maa.’ ”

← Chapter 11 Jump to: Chapter 13 →