Ezekiel 6

Dagbani Bible (Naawuni Kundi Kasi)

← Chapter 5 Jump to: Chapter 7 →

1Ka Yawɛ daa yɛli ma,

2“Daadam, zaŋm’ a nini kpa Izraɛl zoya polo n-tɔɣisi anabitali yɛtɔɣa jɛndi li

3yɛli, ‘Yinim’ Izraɛl zoya, wummiya Yawɛ ŋun nyɛ yi Duuma ŋɔ yɛligu! Yawɛ ŋun nyɛ yi Duuma ŋɔ ni yɛli zoya mini daboya ni yilima ni vinvama shɛm m-bɔŋɔ: Mani, man’ maŋmaŋa ni zaŋ takɔbi lu yi zuɣu n-saɣim yi buɣa jɛmbu shee la.

4N ni ti daai yi maligu bimbina la luhi, ka wurim yi ni tuɣindi tulaale zim bimbin’ shɛŋa zuɣu la. Ka n ni ti zaŋ bɛ ni ku yi ninvuɣ’ shɛba bahi yi buɣa maa tooni.

5N ni ti zaŋ bɛ ni ku Izraɛl ninvuɣ’ shɛb’ sɔŋ bɛ buɣa tooni, ka zaŋ yi kɔba yɛrigi gili yi maligu bimbina gbini.

6Yi ni be luɣ’ shɛlikam zaa, yi fɔntinsi ni bahi yoli, ka yi ni jɛmdi buɣa luɣ’ shɛŋa zaa bahi yoli, ka yi maligu bimbina wurim bahi yoli, ka yi buɣa la wurim saɣim, ka yi ni tuɣindi tulaale zim bimbin’ shɛŋa zuɣu la wurim ka yi tuma kpihim.

7Bɛ ni ku ninvuɣ’ shɛb’ ni ti do yi sunsuuni, ka yi baŋ ni mani n-nyɛ Yawɛ.’

8“Amaa n ni tiligi yi shɛba, ka yi ni shɛba zo n-tiligi takɔbi kum ni zuliya shɛb’ sani, ka wurim kpe tiŋgbɔŋ shɛŋa ni.

9Ka yi ni bɛn zo n-tiligi ni ti teei n yɛla bɛ ni gbahi ba chaŋ zuliya shɛb’ sani ti leei daba maa. Bɛ ni ti teei di ni daa muɣisi ma shɛm saha shɛli bɛ ni daa ŋmaligi bɛ suhu yoya ka chɛ ma la mini bɛ nimbihi yoya din ŋmaligi kpa bɛ buɣa polo la zuɣu. Di saha bɛ nini ti ku lan tiɣi bɛmaŋa, bɛ ni tum tuumbiɛ’ shɛŋa mini bɛ ni tum din chihiri shɛŋa la zaa zuɣu.

10Ka bɛ ti baŋ ni mani n-nyɛ Yawɛ, ka n ni daa yɛli ni n ni niŋ ba zaɣ’ biɛ’ shɛl’ la, n daa bi diɛmdimi maa.”

11Yawɛ ŋun nyɛ yi Duuma ŋɔ ni yɛli shɛm m-bɔŋɔ: “Kpahimiya yi nuhi, ka zaŋ yi naba tɔri tiŋa, ka yɛra: Mbaye! Izraɛlnim’ ni tum zaɣ’ biɛ’ shɛli din chihiri la zuɣu. Dama bɛ ni zaŋ takɔbi ku bɛ shɛba, ka kum ti ku bɛ shɛba, ka alɔbo mi ti di bɛ shɛba.

12Bɛn ti be katiŋa, alɔbo ni di ba, bɛn be yoma, bɛ ni zaŋ takɔbi ku ba, bɛn mi ti kpalim, kum ni ku ba. Lala ka n ni ti yiɣisi n suhu pam bahi bɛ zuɣu.

13Bɛ yi ti ku bɛ niriba sɔŋ gili bɛ buɣa mini bɛ maligu bimbina ni bɛ daboya din du pam zuɣu ni zoya zuɣu ni ti’ mahili kam gbini ni oki tia din mali vari gbini, luɣ’ shɛŋa bɛ ni tuɣindi tulaale zim din nyom viɛla tiri bɛ buɣa la. Ka yi ti baŋ ni mani n-nyɛ Yawɛ.

14Ka n teei n nuu jɛndi ba n-saɣim tiŋgbani ka di bahi yoli, bɛ ni be luɣ’ shɛlikam zaa, zaŋ tiŋgban’ nɛli ni hal ti paai Ribila. Di saha ka bɛ ti baŋ ni mani n-nyɛ Yawɛ.”

← Chapter 5 Jump to: Chapter 7 →