Ezekiel 43

Dagbani Bible (Naawuni Kundi Kasi)

← Chapter 42 Jump to: Chapter 44 →

1Dimbɔŋɔ nyaaŋa ka o daa zaŋ ma chaŋ dunɔdali din daa kpa wulimpuhili polo la gbini.

2Nimaani ka Izraɛl Naawuni jilima daa yi wulimpuhili polo kanna, di vuri daa ŋmanila kom din mali yaa vuri, ka o jilima daa neei tiŋgban’ ni.

3N ni daa nya ʒii shɛli maa daa ŋmanila n ni daa pun nya ʒii shɛli saha shɛl’ o ni daa kana ni o ti wurim tiŋ’ maa la, ka lan ŋmani n ni daa nya ʒii shɛli n ni daa be Kɛba Mɔɣili noli la. Ka n daa teei dɔni n-zaŋ n nini kpa tiŋa.

4Yawɛ jilima maa daa dolila wulimpuhili polo dunɔdali kpe Naawuni jɛmbu duu maa puuni.

5Ka Naawuni Shia daa kpuɣi ma zuɣusaa n-zaŋ ma ti kpe dundombil’ ni. Ka Yawɛ jilima daa pali Naawuni jɛmbu duu maa.

6Doo maa ni daa na kul ʒe n sani maa, ka n daa wum ka so tɔɣisiri ma yɛtɔɣa Naawuni jɛmbu duu maa puuni na.

7O daa yɛli ma mi, “Daadam, n nam ʒiishee mini n napɔŋ tambu shee m-bɔŋɔ. Nimaani ka n yɛn be Izraɛlnim’ sani sahakam. Izraɛlnima bee bɛ nanima ku lan jɛm buɣa, bɛ mi ku lan zaŋ na’ shɛb’ bɛn kpi niŋgbuna saɣim n yuli din be kasi ŋɔ bɛ kpibu ni.

8Bɛ ni daa me bɛ yiya dunoya baɣili n dunoli, ka bɛ dunɔpaɣira baɣi n dunɔpaɣira, ka gooni daa be m mini ba sunsuuni saha shɛl’ la ka bɛ daa tum din chihira n-saɣim n yuli din be kasi ŋɔ. Dinzuɣu ka n daa ku ba n suhuyiɣisili puuni maa.

9Pumpɔŋɔ chɛ ka bɛ yihi buɣijɛmbo maa bɛ kɔbili ni, ka zaŋ bɛ na’ kpima chaŋ katiŋa ka chɛ ma, ka n kul be bɛ sani sahakam.

10Nyini daadam, wuhimi Izraɛlnim’ maa Naawuni jɛmbu duu maa biɛhigu ni nyɛ shɛm, ka bɛ buɣisi di biɛhigu maa, ka chɛ ka vi gbahi ba bɛ tuumbiɛri maa zuɣu.

11Vi yi ti gbahi ba bɛ ni niŋ shɛlikam zaa maa zuɣu, nyin’ wuhimi ba Naawuni jɛmbu duu maa biɛhigu ni nyɛ shɛm. Di mɛbu mini niriba ni yɛn doli luɣ’ shɛŋa yira ni bɛ ni yɛn doli luɣ’ shɛŋa kpɛra ni di biɛhigu ni nyɛ shɛm zaa ni di zaligunima ni bɛ ni daa buɣisi li shɛm zaa ni di zalikpana zaa, ka sabi li sɔŋ bɛ ninni din ni chɛ ka bɛ nya, ka doli di buɣisibu maa zaa mini di zaligu shɛŋa din pahi zaa.

12Naawuni jɛmbu duu maa zaligu m-bɔŋɔ: Luɣ’ shɛlikam zaa din gili zoli maa zuɣusaa nyɛla din be kasi zaa. Naawuni jɛmbu duu maa zaligu m-bala.”

13Sara maligu bimbini buɣisibu ni nyɛ shɛm m-bɔŋɔ (yi ni zaŋ bɛ ni mali binshɛli buɣisiri maa): di tambu shee dubu ni ti nyɛla sɛntimita pihinu, ka di yɛliŋ nyɛ sɛntimita pihinu, ka yi me bimbila n-kɔɣili di tariga, ka di dubu nyɛ sɛntimita pisinaanu. Sara maligu bimbini maa dubu ni ti yɛn nyɛ shɛm m-bɔŋɔ:

14Di tambu shee tiŋa zaŋ hal ni di tariga tiŋli ni ti nyɛla mita yini, ka di yɛliŋ ti nyɛ sɛntimita pihinu. Di naŋgbaŋkuɣili kara zaŋ ti paai naŋgbaŋkuɣili bihi ni ti nyɛla mita ayi, ka di yɛliŋ nyɛ sɛntimita pihinu.

15Sara maligu bimbini maa zuɣu daaŋa ni ti nyɛla mita ayi, ka daaŋa maa zuɣu zaŋ du zuɣusaa polo ti nyɛ mita ayi, ka mali binyila anahi.

16Sara maligu bimbini maa ni ti nyɛla zaɣ’ mɔɣumɔɣu ka di wɔɣilim nyɛ mita ayɔbu, ka di yɛliŋ nyɛ mita ayɔbu.

17Di naŋgbaŋkuɣila maa gba ni ti nyɛla zaɣ’ mɔɣumɔɣu, ka di wɔɣilim nyɛ mita ayopɔin, ka di yɛliŋ nyɛ mita ayopɔin, ka baŋ’ din yɛliŋ nyɛ sɛntimita pisinaanu gil’ li tuui. Ka di tambu shee zaŋ gili nyɛ sɛntimita pihinu, ka di dunɔdura kpa wulimpuhili polo.

18Di saha ka o daa yɛli ma, “Daadam, Yawɛ ŋun nyɛ ti Duuma ŋɔ ni yɛli shɛm m-bɔŋɔ: Sara maligu bimbini zaligunim’ m-bɔŋɔ: dahin’ shɛli di yi ti naai, ka yi yɛn mali bɛ ni zaŋdi sara shɛli nyɔri buɣim la di zuɣu, ka zaŋ ʒim vie li,

19yin’ bomiya naɣilaa ti Lɛvinima bɛn nyɛ maligumaaniba ka nyɛ Zadok zuliya ni niriba, ka nyɛ bɛn ti yɛn kani n sanna ti tumdi n tuma la, ka bɛ mali sara alahichi zuɣu. Yawɛ ŋun nyɛ ti Duuma ŋɔ n-yɛli lala maa.

20Ka yi ni ti zaŋ o ʒim shɛli niŋ sara maligu bimbini zuɣu binyila anahi la, ka niŋniŋ di tariga kɔnanim’ anahi la zuɣu, ka niŋniŋ di baŋa din kɔɣili li gil’ la. Lala ka yi ni ti niŋ m-mal’ li ka di niŋ kasi, ka yi zaŋ li ti Naawuni.

21Ka yi ti zaŋ alahichi sanyoo naɣilaa maa ti nyo buɣim luɣ’ shɛli bɛ ni pii Naawuni jɛmbu duu samban’ ni luɣ’ kasi shee la.

22Dabisili shɛli din pahir’ ayi dali, yi ni ti zaŋla bulaa ŋun ka daŋa m-mali alahichi sanyoo sara. Ka sara maligu bimbini maa yi daɣiri ni kaman naɣilaa la ni daa chɛ ka di yi daɣiri ni shɛm la.

23Ka yi yi ti yihi li daɣiri ni naai, yin’ zaŋmiya naɣilaa ŋun ka daŋa mini biŋkɔbbaligu ni piɛlaa ŋun ka daŋa m-mali sara.

24Yi ni ti zaŋ ba zali Yawɛ tooni, ka maligumaana ti niŋ yalim bahi bɛ zuɣu, ka zaŋ ba mali sara shɛli bɛ ni zaŋdi nyɔri buɣim la ti Yawɛ.

25Bomiya bua mini naɣilaa ni biŋkɔbbaligu ni piɛlaa bɛn ka dansi dabisili kam m-maani alahichi sanyoo sara hal ti paai daba ayopɔin.

26Daba ayopɔin ka bɛ ni ti zaŋ mali sara maligu bimbini maa ka di niŋ kasi, ka bɛ zaŋ li ti Naawuni.

27Dabisa ŋɔ yi ti gari, di nyaaŋa daba anii zaŋ chana maligumaaniba ni tooi mali yi sara shɛŋa yi ni zaŋdi nyɔri buɣim la mini yi suhudoo saranim’ di zuɣu, ka n deei ya. Yawɛ ŋun nyɛ ti Duuma ŋɔ n-yɛli lala maa.”

← Chapter 42 Jump to: Chapter 44 →