Ezekiel 28

Dagbani Bible (Naawuni Kundi Kasi)

← Chapter 27 Jump to: Chapter 29 →

1Ka Yawɛ daa yɛli ma,

2“Daadam, yɛlim’ Taai naa, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: A ni mali karimbaani a suhu ni zuɣu ka a yɛli, ‘N nyɛla wuni, ka ʒi wuni nam ʒiishee teeku bulli ni maa.’ Amaa a kul nyɛla ninsala, ka pa wuni; hal a ni zaŋ a tɛha ŋmahindi wuni tɛha la zaa yoli.

3A tɛhiya ni a mali yɛm gari Daniɛl, ka ashili shɛli kani ka a bi mi li.

4A yɛm min’ a baŋsim maa ka a zaŋ bo buni ti amaŋa, ka laɣisi salima min’ anzinfa niŋ a daazichi duri ni.

5A ni mali yɛm pam zaŋ chaŋ daabiligu polo maa zuɣu ka a chɛ ka a buni nabi pahi, ka a mali karimbaani a buni maa zuɣu.

6Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: A ni tɛhi ni a mali yɛm kaman wuni maa zuɣu,

7nyama, n ni chɛ ka tinzunnim’ kana ti lir’ a. Bɛ nyɛla ninvuɣ’ biɛri gari zuliya kam. Bɛ ni ti ŋɔhi bɛ takɔbiri lu a yɛm din viɛl’ ŋɔ zuɣu, ka saɣim’ a jilima la.

8Bɛ ni ti daag’ a niŋ gballi ni, ka a kpi gadama niŋbu kum teeku bulli maa ni.

9A ni ti tooi yɛli ni a nyɛla wuni ninvuɣ’ shɛb’ bɛn ku a maa tooni? Dama ninvuɣ’ shɛb’ bɛn ti a daŋ’ maa sani, a nyɛla ninsala, ka pa wuni.

10A ni kpi ŋun bi guni kum tinzunnim’ nuu ni. Dama Yawɛ ŋun nyɛ yi Duuma ŋɔ n-yɛli lala.’ ”

11Ka Yawɛ daa lan yɛli ma pahi,

12“Daadam, fabilim Taai naa zuɣu ka yɛl’ o, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Nyini n-daa nyɛ shihirili din wuhiri din ka galimi ka mali baŋsim pam, ka viɛl’ zaa.

13A daa bela Idɛn din daa nyɛ Naawuni puu la ni, ka kuɣ’ viɛla kam daa nyɛla a ni mali shɛli niŋdi amaŋa. Dina n-nyɛ kanɛlian mini kirisolait ni daimɔnd ni bɛril ni oniɣisi ni jasipa ni safaya ni tɛkɔisi ni ɛmɛrald. Salima ka bɛ zaŋ mali di ni taɣili binshɛŋa zuɣu. Bɛ ni daa nam a dahin’ shɛli ka bɛ daa mal’ li.

14N daa pii chɛrubi zali ka o gul’ a, ka a be Naawuni zoli din be kasi zuɣu. A daa bela buɣim kuɣa ni chana.

15A daa nyɛla ŋun ka galimi a biɛhigu ni a nambu dali hal ka bɛ ti nya alahichi a ni.

16A daabiligu maa ni daa ti yɛligi, a daa zaŋla gadama kpɛh’ a kɔbili ni, ka tum alahichi, dinzuɣu ka n kar’ a Naawuni zoli maa zuɣu bahi kaman daɣiri bini maa, ka chɛrubi ŋun daa gul’ a maa mi kar’ a yihi buɣim kuɣa maa ni.

17A jilima zuɣu daa chɛ ka karimbaani kpe a suhu ni. A jilima zuɣu daa chɛ ka a saɣim a yɛm. N daa daag’ a luhi tiŋa, n daa yih’ a palɔni nanim’ tooni ni bɛ lih’ a viɛnyɛliŋga.

18A ni daa bi doli wuntia soli n-niŋ daabiligu, ka tum alahichi pam zuɣu daa chɛ ka a saɣim a jɛmbu duri. Dinzuɣu ka buɣim yi a ni na n-di a zaa; ka n daa chɛ ka a leei tampiligim do tiŋa bɛn zaa daa nya a ninni.

19Ka di daa gari bɛnkam daa yi mi a. A bahigu maa nyɛla din bie pam, ka a ku lan beni yaha.’ ”

20Ka Yawɛ daa yɛli ma,

21“Daadam, zaŋm’ a nini kpa Sidɔn polo n-tɔɣisi anabitali yɛtɔɣa jɛndi li,

22ka yɛli, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Sidɔn, m bi ʒe a nyaaŋa. N ni nya jilima a ni. N yi kar’ a saria a ni, ka chɛ ka n kasitali yi zahira a ni, bɛ ni baŋ ni mani n-nyɛ Yawɛ.

23Dama n ni chɛ ka alɔbo lu a ni, n ni chɛ ka bɛ ku niriba a ni solɔri zuɣu. Bɛ ni ti zaŋ takɔbi din jɛnd’ a maa ku niriba luɣilikam, ka kpiimba ti do a ni, ka bɛ baŋ ni mani n-nyɛ Yawɛ.’ ”

24“Izraɛlnim’ ti ku lan nya suligunyinyaɣu bee goo bɛ ʒiʒiinitab’ bɛn daa maani ba ansarisi la zaa so sani, ka bɛ ti baŋ ni man’ Yawɛ n-nyɛ bɛ Duuma.”

25Yawɛ ŋun nyɛ ti Duuma ŋɔ ni yɛli shɛm m-bɔŋɔ: “N yi ti yihi Izraɛlnim’ bɛ ni wurim be zuliya shɛb’ zaa ni n-zaŋ ba laɣim luɣ’ yini, ka chɛ ka m biɛrikasitali yi zahira bɛ sani zuliyanim’ maa ninni, di saha bɛ ni ti ʒini bɛmaŋmaŋ’ tiŋgbɔn’ shɛli n ni daa zaŋ ti n dabili Yaakubu la ni.

26Bɛ ni ti be ni ni alaafee, ka me yiya, ka ko wain tihi puri. N yi ti kari bɛ ʒiʒiinitaba bɛn zaa lihi ʒiɛm ba la saria, bɛ ni baŋ ni man’ Yawɛ n-nyɛ bɛ Naawuni.”

← Chapter 27 Jump to: Chapter 29 →