Ezekiel 29

Dagbani Bible (Naawuni Kundi Kasi)

← Chapter 28 Jump to: Chapter 30 →

1Yuun’ shɛli din pahiri yuun’ pia puuni gol’ so ŋun pahiri pia biɛɣu pinaayi dali ka Yawɛ daa yɛli ma,

2“Daadam, zaŋm’ a nini kpa Firawuna ŋun nyɛ Ijipti naa ŋɔ polo, ka tɔɣisi anabitali yɛtɔɣa jɛnd’ o mini Ijiptinim’ zaa.

3Yɛlim’ o, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Nyin’ Firawuna ŋun nyɛ Ijipti naa ŋɔ, m bi ʒe a nyaaŋa. Nyin’ nyɛbiga ŋun bahibahi amaŋ’ be ko’ sunsuuni ka yɛra, ‘Nail nyɛla n ni su shɛli. Mani n-daa gbi li.’

4N yɛn zaŋla ziŋgoo kuhi a yɛno, ka chɛ ka a kɔsoya ni zahim kpe n-shɛbis’ a salichɛhi ni, ka n voog’ a yih’ a kɔsoya maa ni na n-tabil’ a kɔsoya maa ni zahim shɛb’ zaa bɛn be a salichɛhi maa ni zaa du duli.

5N ni zaŋ a min’ a kɔsoya ni zahim maa labi tiŋgban’ nɛli ni, ka a ti lu palɔni, ka bɛ ti ku nya a sɔɣi. N ni ti zaŋ a ti mɔɣu ni biŋkɔbiri mini juri ka bɛ di.

6Di saha ka Ijiptinim’ zaa ti baŋ ni mani n-nyɛ Yawɛ. A ni daa leei kariŋmaaŋa jaaŋgbee Izraɛlnim’ sani maa zuɣu.

7Bɛ daa yi zaŋ bɛ nuhi gbaag’ a, a bɔɣirimi ŋ-ŋmahi bɛ bɔɣusapima. Bɛ daa yi zaŋ bɛmaŋ’ jɛm’ a, a kabigirimi ka chɛ ka bɛ naba kɔŋ zanibu.

8Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni chɛ ka bɛ zaŋ takɔbiri lu a zuɣu n-ku ninsalinim’ mini biŋkɔbiri bɛn be a ni.

9Ka Ijipti tiŋgbɔŋ zani dabari, ka lan ka buchi shɛli. Di saha ka bɛ ti baŋ ni mani n-nyɛ Yawɛ. Dama a yɛliya, ‘Nail nyɛla n ni su shɛli, mani n-daa gbi li.’

10Dinzuɣu m bi ʒe a nyaaŋa, ka bi ʒe a kɔsoya maa nyaaŋa, n ni chɛ ka Ijipti tiŋgbɔŋ zaa bahi yoli n-leei dabari, zaŋ Migidol hal ni Sine n-zaŋ hal ti paai Itiɔpia tintariga.

11Daadam napɔŋ ti ku lan no di ni, ka biŋkɔbiri gba napɔna ti ku lan no di ni. Binvuhirigu ti ku lan be di ni hal ni yuun’ pihinahi.

12N ni ti chɛ ka Ijipti leei dabari dɔni tiŋgbɔn’ shɛŋa din pun nyɛ dabari sunsuuni, ka di fɔntinsi ti leei dabari n-dɔni yuun’ pihinahi m-pahi fɔntin’ shɛŋa din pun bahi yoli zuɣu. N ni ti wurim Ijiptinim’ kpɛhi zuliya shɛb’ ni, ka wurim ba kpɛhi tiŋgbɔn’ shɛŋa ni.’ ”

13Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Yuun’ pihinahi maa yi ti naai n ni yihi Ijiptinim’ maa bɛ ni daa wurim be ninvuɣ’ shɛb’ zaa ni na,

14n ni ti lan labisi Ijipti zali di zaashee, ka zaŋ ba labisi Patrɔs din nyɛ bɛ virili shee la. Ka bɛ nam ti ku mali yaa nimaani.

15Bɛ nam maa ni ti gbarigi gari nam kam, ka bɛ ti ku lan duhi bɛmaŋ’ gari zuliya shɛba, ka n ti chɛ ka bɛ kpalim biɛla din ni chɛ ka bɛ ku lan su zuliya shɛba yaha.

16Ka Izraɛlnim’ ku lan lihiri Ijiptinim’ ninni bɔri sɔŋsim. Bɛ yi ti teei din daa niŋ Ijiptinim’ maa yɛla, di saha bɛ ni baŋ bɛ ni daa bɔri sɔŋsim bɛ sani maa galimi ni nyɛ shɛli. Di saha ka bɛ ni baŋ ni man’ Yawɛ n-nyɛ bɛ Duuma.”

17Yuun’ pisinaayopɔin puuni gol’ so ŋun daŋ tooni dahin yini dali ka Yawɛ daa yɛli ma,

18“Daadam, Babilɔn naa Nɛbukadnɛza chɛmi ka o tɔbbihi mooi bɛ nini bahi Taai zuɣu. Bɛ ʒi ʒiya ka bɛ zuɣuri viɛhi, ka buɣi binyara ka bɛ bɔɣusapima liilii. Amaa omaŋmaŋ’ bee o niriba maa so bi nya binshɛli Taai din ni yo bɛ ni tum tuun’ shɛli di ni maa samli.

19Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni zaŋ Ijipti tiŋgbɔŋ ti Babilɔn naa Nɛbukadnɛza ka o ti ŋme n-di di nɛma, ka ʒe di nɛma n-zaŋ di daazichi chaŋ, ka di ti leeg’ o tɔbbihi yɔri.

20N zaŋ Ijipti tiŋgbɔŋ ti o ka di leeg’ o tuma yɔri, dama n tuma ka bɛ daa tum ti ma maa. Yawɛ ŋun nyɛ ti Duuma ŋɔ n-yɛli lala maa.

21Dindali maa n ni ti chɛ ka yilli bili Izraɛl, ka n chɛ ka a tɔɣisiri yɛtɔɣa bɛ sani. Di saha ka bɛ ni ti baŋ ni mani n-nyɛ Yawɛ.”

← Chapter 28 Jump to: Chapter 30 →