Ezekiel 44

Dagbani Bible (Naawuni Kundi Kasi)

← Chapter 43 Jump to: Chapter 45 →

1Dimbɔŋɔ nyaaŋa ka o daa zaŋ ma labi Naawuni jɛmbu duu samban’ ni dunɔdali din daa be wulimpuhili polo la, ka di yomi.

2Ka Yawɛ daa yɛli ma, “Di simdi ni dunɔdali ŋɔ kul yo n-ʒiɛya, di bi simdi ni di yooi, ka so mi di doli li kpe. Dama Yawɛ ŋun nyɛ Izraɛlnim’ Naawuni ŋɔ daa doli li kpe, dinzuɣu di simdi ni di kul yomi ʒiɛya.

3Kulla naa kɔŋko m-mali soli ni o ʒini di puuni n-di bindirigu Yawɛ tooni. O ni dolila dunɔdali maa polo zɔntua kpe, ka lan doli nimaani yi.”

4Dimbɔŋɔ nyaaŋa ka o daa zaŋ ma doli nuzaa polo dunɔdal’ la n-chaŋ Naawuni jɛmbu duu maa tooni, ka n ti lihi n-nya ka Yawɛ jilima m-pal’ o jɛmbu duu maa ni. Ka n daa lu n-zaŋ n nini kpa tiŋa.

5Di saha ka Yawɛ daa yɛli ma, “Daadam, lihima, ka gbilisi tibili viɛnyɛliŋga wum, ka zaŋ a zaɣa niŋ n ni yɛn yɛl’ a shɛlikam zaa zaŋ chaŋ Yawɛ duu ŋɔ zalikpana zaa mini zaligu shɛŋa din pahi yɛla polo, ka baŋ ninvuɣ’ shɛb’ bɛn simdi ni bɛ kpe Yawɛ jɛmbu duu maa puuni mini ninvuɣ’ shɛb’ bɛn bi simdi ni bɛ kpe di puuni.

6Yɛlim’ Izraɛlnima bɛn nyɛ duŋtaariba maa, ‘Ti Duuma Yawɛ ni yɛli shɛm m-bɔŋɔ: Yinim’ Izraɛlnima, chɛliya yi ni tumdi tuun’ shɛŋa ka di nyɛ din chihiri la zaa,

7dina n-nyɛ yi ni chɛ ka tinzunnim’ bɛn bi guni bɛ suhuri ni mini bɛ niŋgbuna ni la kpɛri n jɛmbu duu puuni nti tari li daɣiri saha shɛli yi yi ti zaŋ m bindirigu din nyɛ biŋkpam mini binʒim mali sara ti ma la. Yi ni tumdi din chihiri shɛŋa zaa ka yi zaŋ saɣim n daalikauli maa.

8Yi bi lan yuuni n sara din be kasi la zuɣu. Amaa yi bola tinzunnima n-chɛ ka bɛ zani yi zaani n-yuuni di zuɣu n jɛmbu duu maa puuni.

9Ti Duuma Yawɛ ni yɛli shɛm m-bɔŋɔ: Tinzunnim’ bɛn zaa be Izraɛlnim’ sani, ka nyɛ bɛn bi guni bɛ suhuri ni mini bɛ niŋgbuna ni la bi simdi ni bɛ kpe n jɛmbu duu puuni.

10Amaa Lɛvinim’ bɛn daa birigi chaŋ katiŋ’ ti jɛmdi buɣa ka chɛ ma saha shɛli Izraɛlnim’ ni daa birigi la ni nya tibidarigibo.

11Bɛ ni ti nyɛla Naawuni jɛmbu duu tumtumdiba, ka guli Naawuni jɛmbu duu maa dunɔdaya. Bɛ ni ti kɔriti bɛ ni zaŋdi biŋkɔb’ shɛb’ nyɔri buɣim maani sara la mini niriba ni zaŋdi biŋkɔb’ shɛb’ na ni bɛ ti mali sara la. Bɛ ni ti tumdi tuma tiri niriba maa.

12Bɛ ni daa tumdi buɣijɛmbo tuma niriba maa sani, ka chɛ ka Izraɛlnim’ birigi n-tum alahichi la zuɣu. Dinzuɣu m poya zaŋ chaŋ bɛ polo ni bɛ ni nya tibidarigibo. Yawɛ ŋun nyɛ ti Duuma ŋɔ n-yɛli lala maa.

13Di bi simdi ni bɛ miri ma na nti tum tuma kaman maligumaaniba la bee m-miri sara maligu kasi shɛli mini binshɛli din be kasi. Amaa di simdi ka bɛ di vi, ka di wahala shɛlikam bɛ ni tum din chihiri shɛŋa maa zuɣu.

14Amaa n ni chɛ ka bɛ gbibi n jɛmbu duu maa, ka tumdi di puuni tuun’ shɛli zaa din simdi tumbu.

15Amaa Lɛvinim’ bɛn nyɛ maligumaaniba, ka nyɛ Zadok ŋun daa kul gbibi n jɛmbu duu ŋɔ saha shɛli Izraɛlnim’ ni daa birigi ka chɛ ma la zuliya la bɛn’ ni tooi ka n sanna nti tum n tuma. Bɛna n-ni ti ka n sanna nti zaŋ biŋkpam mini binʒim mali sara ti ma. Yawɛ ŋun nyɛ ti Duuma ŋɔ n-yɛli lala maa.

16Bɛna n-ni ti kpɛri n jɛmbu duu, bɛna n-ni ti kani n sara maligu bimbini gbini na nti tumdi n tuma, ka doli n zaligunima.

17Bɛ yi ti yɛn doli dundɔŋ ni polo dunɔdal’ la kpe, di simdi ni bɛ yɛla binyɛr’ piɛla. Bɛ di ti ye biŋkɔbiri kɔbiri binyɛra, bɛ yi ti be dundɔŋ ni dunoya ni bee di puuni n-tumdi tuma.

18Di simdi ka bɛ ti vili baŋtab’ piɛla, ka so jinjɛm piɛla. Di bi simdi ni bɛ zaŋ neen shɛŋa din ni chɛ ka woligu puhi ba lo bɛmaŋa.

19Bɛ yi ti yɛn yi samban’ ni niriba sani, di simdi ka bɛ yeei bɛ ni ye neen’ shɛŋa tum tuma maa sɔŋ du’ kasinim’ la ni, ka taɣi neen’ shɛŋa ye din ni chɛ ka bɛ ku ye bɛ nɛma maa n-zaŋ kasitali maa chaŋ niriba maa sani.

20Di bi simdi ka bɛ pini bɛ zuɣuri bee n-chɛ ka bɛ zabiri zibigi. Di simdi ka bɛ wahiri bɛ zabiri.

21Maligumaana yi yɛn kpe dundɔŋ maa ni, di bi simdi ka o nyu wain.

22Bɛ di ti kpuɣi pakoli bee n-kpuɣi paɣ’ so ŋun yi doo yili. Amaa di simdi ni bɛ ti kpuɣila paɣisara bɛn na ʒi dɔbba Izraɛlnim’ zuliya ni bee bɛ ni tooi kpuɣi maligumaana pakoli.

23Bɛ ni ti wuhiri n niriba maa binshɛŋa din be kasi mini binshɛŋa din nyɛ daɣiri.

24Naŋgbankpeeni yi ti lu, bɛn’ leemi sariakaritiba n-woligi li kaman n zaligunim’ ni wuhi shɛm. Di simdi ni bɛ ti doli n zalikpana la mini n zaligu shɛŋa din pahi zaŋ chaŋ n ni zali n chu’ shɛŋa puhibu la zaa polo, ka gbibi n vuhim dabisa la ka di be kasi.

25Di bi simdi ka bɛ ti shihi kum din ni chɛ ka bɛ kpe daɣiri ni, amaa di yi nyɛla bɛ ba bee bɛ ma bee bɛ bidibiga bee bɛ bipuɣiŋga bee bɛ mabia ŋun nyɛ doo bee bɛ tizɔpaɣa ŋun bi kuli doo, bɛ ni tooi kpe daɣiri ni.

26So yi niŋ lala, o yi ti yi daɣiri maa ni, bɛn’ zalim’ o daba ayopɔin.

27Dahin shɛli o yi ti yɛn kpe luɣ’ kasi shee dundɔŋ ni ti tum tuma, di simdi ka o mali o daalahichi sara luɣ’ kasi maa shee. Yawɛ ŋun nyɛ ti Duuma ŋɔ n-yɛli lala maa.

28Bɛ tarili ni nyɛ shɛli m-bɔŋɔ: Mani n-nyɛ bɛ tarili. Di bi simdi ni yi ti ba binshɛli Izraɛl tiŋgbɔŋ ni. Mani n-nyɛ bɛ tarili.

29Bɛ ni ti dirila bɛ ni zaŋ chi mini kawaan’ shɛŋa na ti mali sara shɛli ni alahichi sanyoo sara binyara ni taali sanyoo sara binyara. Ka bɛ ni zaŋ binshɛli zaa ti Yawɛ Izraɛl tiŋgbɔŋ ni nyɛla bɛ dini.

30Bindira balibu kam din daŋ niŋbu ka nyɛ din viɛla mini sara maligu balibu kam nyɛla maligumaaniba dini. Di lan simdi ka yi zaŋ yi ni tuui ŋɔri zim shɛli ti maligumaaniba maa din ni chɛ ka alibarika be yi yinsi.

31Di bi simdi ka maligumaana di biŋkɔb’ so bee noon’ so ŋun kpi o zuɣu bee biŋkɔbiri ni ku so.’ ”

← Chapter 43 Jump to: Chapter 45 →