Ezekiel 8

Dagbani Bible (Naawuni Kundi Kasi)

← Chapter 7 Jump to: Chapter 9 →

1Yuun’ shɛli din pahir’ ayɔbu puuni gol’ so ŋun pahir’ ayɔbu daba anu dali ka n daa ʒi n yiŋa, ka Juda kpamba daa ʒi n tooni, ka Yawɛ ŋun nyɛ ti Duuma ŋɔ yiko daa siɣi n zuɣu na nimaani.

2Ka n daa lihi nya kɔtomsi shɛli ka di biɛhigu ŋmani daadam. Din daa be kaman o shee la tiŋli polo daa nyɛla buɣim, ka shee maa zaŋ du zuɣusaa polo mi daa kul piɛli paratɛte, ka be kaman daanya din nyaɣisiri la.

3Ka o daa zaŋ nuu kɔtomsi tirina n-gbaai n zabiri kpuɣi ma, ka shia daa kpuɣi ma zuɣusaa tiŋgbani min’ alizanda sunsuuni Naawuni nyabu ʒiinim’ puuni n-zaŋ ma chaŋ Jɛrusalɛm nti zaŋ ma chaŋ dundɔŋ nuzaa polo nti zaŋ ma chaŋ nyuli zabbu binnani din tahiri nyuli zabbu na la zaashee.

4Nyama, ka Izraɛl Naawuni jilima daa be nimaani ŋ-ŋmani n ni daa pun nya ʒii shɛli vinvamli ni la.

5Di saha ka Naawuni daa yɛli ma, “Daadam, pumpɔŋɔ kpuɣim’ a zuɣu zuɣusaa lihi nuzaa polo. Di saha ka n daa kpuɣi n zuɣu lihi nuzaa polo n-nya ka nyuli zabbu binnani la ʒe sara maligu bimbini nuzaa polo dunoli ni.”

6Ka o daa yɛli ma, “Daadam, a nya bɛ ni niŋdi shɛm? A nya Izraɛlnim’ ni tumdi din chihiri pam shɛm kpe ni bɛ kari ma bahi katiŋa ka chɛ n jɛmbu duu ŋɔ? Amaa a na ni nya din chihiri shɛŋa din galisi pam gari lala.”

7Ka o daa zaŋ ma chaŋ duno’ shɛli din kpɛri dundɔŋ maa puuni, ka n daa lihi nya ka voli be gooni ni.

8Di saha ka o daa yɛli ma, “Daadam, chibimi gooni maa voli.” N ni daa chibi gooni maa ka di niŋ voli,

9ka o daa yɛli ma, “Kpɛm’ di puuni nti nya bɛ ni niŋdi vi binshɛŋa din chihiri shɛm kpe.”

10Di saha ka n daa kpe di ni nti nya ka bɛ ŋmɛla biŋgbamda mini biŋkɔb’ shɛb’ bɛn bi be kasi zaa ni Izraɛl buɣa zaa kɔtomsi pa gooni maa zuɣu gili.

11Ka Izraɛl kpamba pisopɔin daa ʒe bɛ tooni, ka Jaazania ŋun daa nyɛ Shafan bidibiga la be bɛ ni. Bɛ zaɣ’ yino kam daa gbibila o tulaale zim tuɣilibu daaŋa o nuu ni, ka tulaale zim maa nyɔhi kpuɣi du zuɣusaa.

12Di saha ka o daa yɛli ma, “Daadam, a nya Izraɛl kpamba ni tumdi tuun’ shɛŋa zibisim ni bebɔ? Sokam bela o binnana duu. Dama bɛ yɛlimi, ‘Yawɛ bi nya ti, Yawɛ chɛla tiŋgbani maa bahi.’ ”

13Ka o daa lan yɛli ma yaha, “A na ni nya bɛ ni tumdi din chihiri shɛŋa pam gari lala.”

14Di nyaaŋa ka o daa lan zaŋ ma chaŋ Yawɛ jɛmbu duu duno’ shɛli din be nuzaa polo la gbini. Paɣiba n-daa ʒi nimaani n-kumdi Tammuz kuli.

15Di saha ka o daa yɛli ma, “Daadam, a nya dimbɔŋɔ? A na ni nya din chihiri pam gari dimbɔŋɔnima.”

16Ka o daa zaŋ ma kpe Yawɛ jɛmbu duu dundɔŋ din be puuni la, Yawɛ jɛmbu duu dunoli maa ni, sara maligu bimbini mini lunfa la sunsuuni ninvuɣ’ pisinaanu laasabu n-daa ʒiɛya. Bɛ daa lɛbigila bɛ yaansi kpa Yawɛ jɛmbu duu maa, ka zaŋ bɛ nina kpa wulimpuhili polo, ka teeri dooni n-jɛmdi wuntaŋa wulimpuhili polo maa.

17Di saha ka o daa yɛli ma, “Daadam, a nya dimbɔŋɔ? Juda zuliya niriba ŋɔ ni tum din chihiri shɛli kpe ŋɔ bi saɣi? Di di lan simdi ni bɛ zaŋ damli dambu pali bɛ tiŋgbɔŋ maa ni zaa ni bɛ lan ku ma suli pahi? Nyama, bɛ zaŋdila tiwulli niŋdi bɛ nyee ni.

18Dinzuɣu n ni yiɣisi n suhu darigi bɛ tibili, n ku chɛ ba bee n-zo ba nambɔɣu, hal bɛ yi kuhiri pampam niŋdi ma ni n wum, n ku wum.”

← Chapter 7 Jump to: Chapter 9 →