Ezekiel 19

Dagbani Bible (Naawuni Kundi Kasi)

← Chapter 18 Jump to: Chapter 20 →

1“Nyini, yilimi fabila yilli ŋɔ niŋ Izraɛl nanima

2n-yɛli, ‘Yi ma daa ŋmanila gbuɣinnyaŋ’ gahindili gbuɣima sunsuuni. O daa dola gbuɣim’ pola sunsuuni n-wumisir’ o bihi.

3Ka o daa ti wumis’ o bi’ yino, ka o niŋ yaa, ka bɔhim binyara gbahibu, ka daa ŋubiri ninsalinima.

4Ka tiŋ’ maa nim’ daa ŋme tɔbuchiriga bah’ o zuɣu ka o daa lu bɛ ni gbi bɔɣ’ shɛli ni, ka bɛ daa zaŋ zoligɔnim’ yih’ o na n-vo o tahi Ijipti tiŋgbɔŋ ni.

5O ni daa baŋ ni tahima lan kani, o kɔŋla o bia maa, ka o daa lan piig’ o bi’ so wums’ o ka o niŋ yaa.

6Ka o mini gbuɣima daa doli, ka o niŋ yaa, ka bɔhim binyara gbahibu ka ŋubiri ninsalinima.

7O daa wurim bɛ ni zaani luɣ’ shɛŋa tuhiri tɔbu ka wurim bɛ fɔntinsi. O daa yi ŋum, dabiɛm gbaarila sokam zaa bɛn be tiŋgbɔŋ maa ni.

8Ka tiŋgbɔŋ maa nim’ zaa daa lu o zuɣu, ka bɛ daa yirigi zana pil’ o n-gbaag’ o bɛ ni daa gbi bɔɣ’ shɛli sɔŋ ni.

9Ka bɛ daa lo o zoligɔnima n-zaŋ o niŋ gampiliga ni n-zaŋ o tahi ti ti Babilɔn naa. Ka bɛ daa zaŋ o niŋ duu ni di chɛ ka bɛ ku lan wum o kukoli Izraɛl zoya zuɣu yaha.

10Yi ma daa ŋmanila wain tia m-be wain tihi puu ni, ka bɛ daa zaŋ o sa m-baɣili kom. Ka kom pam maa daa chɛ ka o teei wula n-wali wala pam.

11Ka di mundili din mali yaa daa leei nam jaaŋgbee, ka daa zooi zuɣusaa tibɔŋ ni, ka di daa niŋ wɔɣilim, ka mali wula pam.

12Amaa ka bɛ daa vuɣi li ni suhuyiɣisili n-daai li luhi tiŋa. Ka wulimpuhili polo pɔhim daa ʒe li ka di kuui. Ka di wala zaa daa suui, ka di mundili din mali yaa la daa kuui, ka buɣim di li.

13Di nyaaŋa ka bɛ daa lan zaŋ li ti sa tiŋgban’ nɛli ni, luɣ’ shɛli kom ni kani, ka di tiŋgbani kuui.

14Ka buɣim daa yi di mundili maa ni n-di di wula mini di wala. Ka di daa lan ka mundili din mali yaa din ni niŋ nam jaaŋgbee, ka bɛ zaŋ li su nam.’ Dimbɔŋɔ nyɛla fabila yilli, ka di simdi ni bɛ yiini li fabila saha.”

← Chapter 18 Jump to: Chapter 20 →