Ezekiel 41

Dagbani Bible (Naawuni Kundi Kasi)

← Chapter 40 Jump to: Chapter 42 →

1Di nyaaŋa ka o daa zaŋ ma kpe du’ titali puuni nti buɣisi di pilanima. Yaɣa maa zaa pilanim’ maa zaɣ’ yini kam yɛliŋ daa nyɛla mita ata.

2Di dunoli yɛliŋ daa nyɛla mita anu, ka goma din barilim nyɛ mita ayi ni pirigili daa be di luɣa zuɣu. Ka o daa buɣisi du’ titali maa puuni wɔɣilim, ka di nyɛ mita pisi, ka di yɛliŋ nyɛ mita pia.

3Di nyaaŋa ka o daa kpe du’ shɛli din daa be puuni ha la ni nti buɣisi di dunoya pilanima, ka di nyɛ mita yiniyini, ka dunɔdali maa yɛliŋ daa nyɛ mita ata. Ka goma din barilim nyɛ mita ata ni pirigili daa be di luɣa zuɣu.

4Ka o daa buɣisi duu maa wɔɣilim, ka di nyɛ mita pia, ka di yɛliŋ nyɛ mita pia, ka di be du’ titali maa tooni ha. Ka o daa yɛli ma, “Luɣ’ kasi zaa kasi shee m-bɔŋɔ.”

5Di nyaaŋa ka o daa buɣisi Naawuni jɛmbu duu maa dikili, ka di barilim nyɛ mita ata. Ka du’ shɛŋa din daa be Naawuni jɛmbu duu luɣa zuɣu gil’ la zaɣ’ yini kam yɛliŋ nyɛ mita ayi.

6Du’ shɛŋa din daa be di luɣa zuɣu maa daa nyɛla jirambisa tambu butata. Di daa tamtamla tab’ zuɣu. Tambu yini kam daa malila duri pihita. Bɛ daa mɛla goon’ ŋmahi gili Naawuni jɛmbu duu maa dukpini ni di taɣi duri maa din ni chɛ ka di yaa ku jɛndi Naawuni jɛmbu duu maa dukpini.

7Foliŋga din daa be luɣili zuɣu duri maa sunsuuni daa kul yɛligirimi pahira tambu kam shee. Dama bɛ daa mɛla dura gili hal ti tuui Naawuni jɛmbu duu maa. Ka di zuɣu daa chɛ ka foliŋga maa kul yɛligiri pahiri tambu kam shee. Ka dura shɛli daa zani tiŋ’ duu m-mali ti tim sunsuuni tambu la ni hal ni tambu din bahindi nyaaŋa la ni.

8N daa lan nya ka bɛ me bimbini gili Naawuni jɛmbu duu maa zaa. Luɣa ni duri maa tanzahi buɣisibu daa nyɛla mita atata.

9Di luɣa ni barilim daa nyɛla mita ayi ni pirigili, ka palo din daa do Naawuni jɛmbu duu maa mini luɣa zuɣu duri la sunsuuni

10mini dundɔŋ ni duri la sunsuuni yɛliŋ daa nyɛ mita pia n-gili Naawuni jɛmbu duu maa luɣilikam.

11Ka luɣa ni duri maa dunoya daa yoori bahiri pal’ shɛli din daa kpalim polo. Duno’ yini daa kpala nuzaa polo, ka duno’ din’ la mi kpa nudirigu polo. Ka pal’ shɛli din daa guui yɛliŋ daa nyɛ mita ayi ni pirigili.

12Du’ shɛli din dunoya daa kpa Naawuni jɛmbu duu sambani wulinluhili polo la yɛliŋ daa nyɛ mita pihitanaanu, ka di wɔɣilim nyɛla mita pihinahinaanu, ka di dikili barilim nyɛ mita ayi ni pirigili gili di zaa.

13Di nyaaŋa ka o daa buɣisi Naawuni jɛmbu duu maa, ka di wɔɣilim nyɛ mita pihinu. Ka di sambani mini di duu ni goma wɔɣilim nyɛ mita pihinu.

14Ka Naawuni jɛmbu duu maa tooni zaŋ labi wulimpuhili polo mini di sambani gba yɛliŋ daa nyɛ mita pihinu.

15Di nyaaŋa ka o daa buɣisi du’ shɛli din daa tuhi sambani wulinluhili polo la mini di yaɣa ayi varandanima, ka di wɔɣilim nyɛ mita pihinu. Naawuni jɛmbu duu maa sunsuuni mini di puuni duu ni di samban’ ni zɔŋ la,

16bɛ daa zaŋla dapaɣa tabili dukpina maa zaa gili, ka dur’ ata maa zaa daa mali takɔriti ti kpa. Di takɔriti maa firimnim’ daa nyɛla zaɣ’ muɣilinsi. Naawuni jɛmbu duu maa dunɔbia polo, bɛ daa zaŋla dapaɣa tabili di tiŋ’ polo gili hal ti taɣi di takɔriti. (Di daa limsila takɔriti maa)

17hal ti paai palo din be dunoli zuɣusaa hal ni puuni duu la ni ni di samban’ ni. Ka bɛ ŋme binyara pa puuni duu maa dukpina zaa zuɣu mini di sunsuuni zaa ti gili.

18Di daa nyɛla chɛrubinim’ mini abie tihi kɔtomsi, chɛrubinima ayi sunsuuni abie tia n-daa beni. Chɛrubi yino kam daa malila ninni diba ayi.

19Ninni zaɣ’ yini daa nyɛla ninsal’ ninni, ka di ŋmaligi kpa abie tia maa ni be shɛli polo. Ka ninni din’ la mi nyɛ gbuɣim’ polli ninni, ka ŋmaligi kpa abie tia din’ la polo. Bɛ daa ŋme ba pala Naawuni jɛmbu duu dukpina zuɣu zaa gili,

20zaŋ tiŋ’ hal ti yaɣi dunoya zuɣusaa, chɛrubinim’ mini abie tihi kɔtomsi ka bɛ daa ŋme m-pa di dukpina zuɣu.

21Sunsuuni dunɔpaɣira daa nyɛla zaɣ’ mɔɣiri. Luɣ’ kasi zaa kasi shee maa tooni, binshɛli daa beni ŋ-ŋmani

22dari sara maligu bimbini. Di dubu daa nyɛla mita yini ni pirigili, ka di wɔɣilim nyɛ mita yini, ka di yɛliŋ gba nyɛ mita yini. Di kɔnanim’ mini di ni tam binshɛŋa zuɣu ni di luɣa zuɣu daa nyɛla dari. Ka o daa yɛli ma, “Teebuli ŋɔ n-nyɛ din ʒe Yawɛ tooni.”

23Puuni duu maa daa malila duno’ jaba, ka luɣ’ kasi shee la gba mali duno’ jaba.

24Dunoli kam daa malila yoobu buyi, ka yoobu kam mali chɛulo diba ayi.

25Bɛ daa ŋmɛla binnɛma maa mini abie tihi pa sunsuuni duu maa dunoya zuɣu kaman bɛ ni daa ŋme li pa dukpina maa zuɣu shɛm la. Ka bɛ daa zaŋ dari mali varanda zɔntua maa tooni sambani polo.

26Ka takɔr’ kɔrikɔɣa mini abie tihi daa be zɔntua maa luɣa zuɣu dukpina zuɣu.

← Chapter 40 Jump to: Chapter 42 →