Ezekiel 14

Dagbani Bible (Naawuni Kundi Kasi)

← Chapter 13 Jump to: Chapter 15 →

1Izraɛl kpamba shɛba daa ti ka n sanna ti ʒini n tooni.

2Ka Yawɛ daa yɛli ma,

3“Daadam, niriba ŋɔ niŋla bɛ buɣa yɛda ka chɛ ka bɛ daalahichi leei bɛ kuɣituurili do bɛ tooni. N ni chɛ ka bɛ bɔhi ma baŋ shɛli?

4“Dinzuɣu yɛlim’ ba, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ: Izraɛl ninvuɣ’ shɛba yi niŋ bɛ buɣa yɛda, ka chɛ ka bɛ buɣa maa leei bɛ kuɣituurili do bɛ tooni, amaa ka bɛ ka anabi sanna, man’ Yawɛ ni garigi bɛn zaŋ bɛ buɣa pam kana,

5din ni chɛ ka n gbaai Izraɛlnim’ zaa bɛn zaɣisi ma bɛ buɣa zuɣu la suhuri.’

6“Dinzuɣu yɛlim’ Izraɛlnima, ‘Yawɛ ŋun nyɛ ti Duuma ŋɔ ni yɛli shɛm m-bɔŋɔ; Niŋmiya tuuba, ka chɛ yi buɣa ŋɔ jɛmbu, ka zo n-yi din chihiri la tumbu ni.’

7“Dama Izraɛl ninvuɣ’ shɛba bee saamba bɛn be Izraɛl tiŋgbɔŋ ni yi zaɣisi ma ka niŋ bɛ buɣa yɛda, amaa ka ka anabi maa sanna ni bɛ ti bɔh’ o baŋ binshɛli n sani, man’ Yawɛ maŋmaŋ’ ni garigi ba.

8N ni yiɣisi n suhu bahi bɛ zuɣu, ka zaŋ ba leei shihirili mini bɛ ni maani shɛba ansarisi, ka yihi ba n niriba sunsuuni, ka yi baŋ ni mani n-nyɛ Yawɛ.

9“Ka bɛ yi yɔhim anabi maa ka o yɛli shɛli, di wuhiya ni man’ Yawɛ n-yɔhim anabi maa, ka n ni teei n nuu n-jɛnd’ o n-ku o n niriba Izraɛlnim’ sunsuuni.

10Bɛ ni ti nya tibidarigibo, anabi maa mini ninvuɣ’ so ŋun bɔhi ni o baŋ maa tibidarigibo ni nyɛla yim.

11Dina n-ni chɛ ka Izraɛlnim’ ku lan kpe yɔɣu ka chɛ ma bee n-lan zaŋ bɛ daalahichi ŋɔ zaa ta bɛmaŋ’ daɣiri. Di saha bɛ ni ti leei n niriba, ka m mi leei bɛ Naawuni. Yawɛ ŋun nyɛ ti Duuma ŋɔ n-yɛli lala maa.”

12Ka Yawɛ daa yɛli ma,

13“Daadam, tin’ shɛli nim’ yi bi ʒe yim ni mani ka tum alahichi, ka n suhu yiɣisi bahi bɛ zuɣu ka m mɔŋ ba bindirigu, ka chɛ ka kum lu bɛ zuɣu n-kuri ninsalinim’ mini biŋkɔbiri bɛn be di ni,

14hal Nuhu mini Daniɛl ni Ayuba, bɛ niriba ata ŋɔ yi be tiŋ’ maa ni, bɛ ni tooi tiligila bɛmaŋmaŋ’ nyɛviya kɔŋko bɛ wuntitali zuɣu. Yawɛ ŋun nyɛ ti Duuma ŋɔ n-yɛli lala maa.

15“Ka n yi chɛ ka mɔɣu ni biŋkɔbiri yi bɛ tiŋgbɔŋ maa ni nti kuri ba, ka di leei dabari, ka so ku lan gari nimaani biŋkɔb’ biɛri ŋɔ zuɣu,

16hal niriba ata ŋɔ yi be nimaani, hal ka mani ŋun be ŋɔ zuɣu, bɛ naan ku tooi tiligi bɛ bidibisi bee bɛ bipuɣinsi, bɛmaŋmaŋ’ kɔŋko n-naan tiligi. Amaa tiŋgbani maa naan kpalim zani dabari. Yawɛ ŋun nyɛ ti Duuma ŋɔ n-yɛli lala maa.

17“Bee n yi di zaŋ takɔbi lu tiŋgbɔŋ maa zuɣu ka yɛli, ‘Takɔbi, lum’ tiŋgbɔŋ ŋɔ zuɣu n-ku ninsalinim’ mini bɛ biŋkɔbiri,’

18hal niriba ata maa yi di beni, hal ka mani ŋun be ŋɔ zuɣu, bɛ naan ku tooi tiligi bɛ bidibisi bee bipuɣinsi, amaa bɛmaŋmaŋ’ kɔŋko n-naan tiligi. Yawɛ ŋun nyɛ ti Duuma ŋɔ n-yɛli lala maa.

19“Bee n yi chɛ ka alɔbo lu di tiŋgbɔŋ maa ni, ka n suhu yiɣisi pam bahi bɛ zuɣu ni n ku ba, ka n kuri ninsalinim’ mini biŋkɔbiri bɛn be di ni,

20hal Nuhu mini Daniɛl ni Ayuba yi di be tiŋgbɔŋ maa ni, mani ŋun be ŋɔ zuɣu, bɛ naan ku tooi tiligi bɛ bidibiga bee bipuɣiŋga. Bɛmaŋmaŋ’ kɔŋko nyɛviya ka bɛ naan tiligi bɛ wuntitali zuɣu.”

21Yawɛ ŋun nyɛ ti Duuma ŋɔ ni yɛli shɛm m-bɔŋɔ: “N yi ti chɛ ka n sariakaribo yɛlibiɛri anahi lu Jɛrusalɛmnim’ zuɣu, di ku viɛla, dina n-nyɛ takɔbi mini fifali ni mɔɣu ni biŋkɔb’ biɛri ni alɔbo din yɛn kuri ninsalinima mini biŋkɔbiri bɛn be di ni la.

22Amaa di ni shɛba ni ti gali, bɛ ni ti yihi bɛ bidibisi mini bɛ bipuɣinsi ka bɛ ka n sanna, ka a yi ti nya bɛ biɛhigu mini bɛ tuma, a suhu ni maai zaŋ chaŋ n ni chɛ ka zaɣ’ biɛ’ shɛŋa zaa lu Jɛrusalɛmnim’ zuɣu maa polo.

23A yi ti nya bɛ biɛhigu mini bɛ tuma, a ni baŋ ni n ni daa niŋ shɛlikam maa, pa yoli ka n daa niŋ lala di ni maa, ka a suhu ni maai.” Yawɛ ŋun nyɛ ti Duuma ŋɔ n-yɛli lala maa.

← Chapter 13 Jump to: Chapter 15 →