Ezekiel 9

Dagbani Bible (Naawuni Kundi Kasi)

← Chapter 8 Jump to: Chapter 10 →

1Dimbɔŋɔ nyaaŋa ka n daa wum ka o tahi pam yɛli, “Yinim’ bɛn yɛn darigi tiŋ’ ŋɔ tibili, vumiya mirina. Sokam zaŋm’ o bidibbini gbib’ o nuu ni.”

2Ka niriba ayɔbu daa yi dunɔdali din daa be zuɣusaa polo, ka kpa nuzaa polo la na. Ka bɛ ni yino kam daa gbib’ o bidibbini o nuu ni ni o ku niriba. Ka do’ so daa be bɛ ni n-ye binyɛr’ piɛlli, ka bɛ ni mali binshɛli sabira be o luɣili zuɣu. Ka bɛ daa kpe di puuni ti zani baɣili daanya sara maligu bimbini la.

3Di saha ka Izraɛlnim’ Naawuni jilima daa yi di ni be chɛrubi so zuɣu la n-chaŋ ti tam Naawuni jɛmbu duu dunɔbia zuɣu. Ka Yawɛ daa boli do’ so ŋun ye binyɛr’ piɛlli, ka binshɛli din sabira be o luɣili zuɣu la

4yɛl’ o, “Kpɛm’ Jɛrusalɛm tiŋ’ puuni nti zaŋ binshɛli dalim ninvuɣ’ shɛb’ bɛn zaa siɣinda ka ŋuhira bɛ ni tumdi din chihiri shɛŋa zaa di ni la gbɛri zuɣu.”

5Ka n daa wum ka o yɛri bɛn bala la mi, “Timmiya tiŋ’ puuni dol’ o nyaaŋa ku niriba. Di yuliya yaɣi so zuɣu bee n-zo so nambɔɣu.

6Kumiya dokura, ka ku nachimba mini paɣisara ni bihi ni paɣiba. Amaa miriya ka yi ti shihi bɛ ni zaŋ bini dalim ninvuɣ’ shɛb’ gbɛri zuɣu la. Pilimiya n jɛmbu duu la shee.” Di saha ka bɛ daa piligi zuɣulaannim’ bɛn daa be o jɛmbu duu samban’ ni la kubu.

7Di saha ka o daa yɛli ba, “Tamiya duu maa daɣiri, ka ku niriba sɔŋ dundɔna ni, chamiya!” Dinzuɣu ka bɛ daa chaŋ tiŋ’ puuni ti ku niriba.

8Bɛ ni daa kuri niriba maa, ka di daa ti kpalim n ko, ka n daa lu n-zaŋ n nina kpa tiŋ’ kuhi yɛli, “Mbaye, Yawɛ ŋun nyɛ n Duuma ŋɔ! A yɛn kula Izraɛl ninvuɣ’ shɛb’ bɛn kpalim ŋɔ, a suhu ni yiɣisi bahi Jɛrusalɛmnim’ zuɣu ŋɔ zuɣu?”

9Ka o daa yɛli ma, “Izraɛlnim’ mini Judanim’ taali maa galisiya pam. Bɛ kul kurila niriba tiŋgbɔŋ maa ni, ka bi lan doli yɛlimaŋli soli tiŋ’ maa ni. Dama bɛ yɛra, ‘Yawɛ chɛla tiŋgbani maa bahi. Yawɛ bi nyara.’

10Man’ kul ku lihi yaɣi bɛ so zuɣu bee n-zo so nambɔɣu. Amaa n ni zaŋ bɛ tuma maa ʒili ba.”

11Di nyaaŋa ka ŋun daa ye binyɛr’ piɛlli, ka bɛ ni mali binshɛli sabira be kolibil’ ni baɣi o luɣili la daa ti labina ti yɛli, “N tum a ni zali ma ni n tum shɛli maa.”

← Chapter 8 Jump to: Chapter 10 →