Ezekiel 25

Dagbani Bible (Naawuni Kundi Kasi)

← Chapter 24 Jump to: Chapter 26 →

1Yawɛ daa yɛli ma,

2“Daadam, zaŋm’ a nini kpa Ammɔnnim’ polo tɔɣisi anabitali yɛtɔɣa jɛndi ba.

3Yɛlim’ Ammɔnnim’ maa, ‘Wummiya ti Duuma Yawɛ ni yɛli shɛm, Yawɛ ŋun nyɛ ti Duuma ŋɔ yɛliya: N jɛmbu duu ni daa saɣim ka yi mali suhupiɛlli la mini Izraɛl tiŋgbɔŋ ni kpalim dabari ni bɛ ni daa gbahi Judanim’ chaŋ ka yi mali suhupiɛlli la zuɣu,

4n yɛn zaŋ ya mi ti wulimpuhili polo nima ka bɛ sun ya. Ka bɛ ti ti bɛ suɣa yi sani n-ʒini yi sunsuuni. Bɛ ni ti di yi tiwala, ka nyu yi bihim.

5N ni zaŋ Raba leei laakuma mɔri ŋubbu shee, ka zaŋ Ammɔnnim’ fɔntinsi leei biŋkɔbbaligu gariche. Di saha ka yi baŋ ni mani n-nyɛ Yawɛ.

6Dama Yawɛ ŋun nyɛ ti Duuma ŋɔ ni yɛli shɛm m-bɔŋɔ: Yi ni daa kpahiri yi nuhi, ka mali yi naba tɔri tiŋa, ka yi suhuri paligi yi ni lo zaɣ’ biɛ’ shɛli zaŋ chaŋ Izraɛl tiŋgbɔŋ polo la zuɣu,

7n teei n nuu jɛndi ya, ka zaŋ ya ti zuliya shɛba kaman bɛ ni ŋme tɔbu di ninvuɣ’ shɛba, ka n ti kun ya niriba maa sani n-kpihim yi birili tiŋgbɔŋ maa ni. N ni ti kun ya, di saha ka yi baŋ ni mani n-nyɛ Yawɛ.”

8Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Mɔabnim’ yɛliya,‘ Judanim’ kul bemi kaman zuliya shɛb’ ni be shɛm,’

9dinzuɣu n ni chɛ ka soya niŋ Mɔab luɣili zuɣu tintariga tinsi din nyɛ Bɛtijɛshimɔt mini Baalimiɔn ni Kiriataim din nyɛ bɛ tiŋgbɔŋ maa jilima tinsi la ni.

10N ni zaŋ di mini Ammɔnnim’ niŋ wulimpuhili polo nim’ nuu ni, ka bɛ su ba, ka zuliya shɛb’ ku lan teei Ammɔnnim’ yɛla.

11Ka n ti darigi Mɔabnim’ tibili, ka bɛ baŋ ni mani n-nyɛ Yawɛ.”

12Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Ɛdomnim’ daa bɔhi Judanim’ biɛri ka dinzuɣu chɛ ka bɛ kpe taali ni bɛ ni bɔhi ba biɛri maa zuɣu.

13Dinzuɣu Yawɛ ŋun nyɛ ti Duuma ŋɔ ni yɛli shɛm m-bɔŋɔ: N ni yiɣisi n suhu bahi Ɛdomnim’ zuɣu n-ku ninsalinim’ mini biŋkɔbiri zaa, ka chɛ ka di kpalim zani dabari, bɛ ni zaŋ takɔbiri ku ba Tɛman hal ni Dɛdan.

14N ni chɛ ka n niriba Izraɛlnim’ bɔhi Ɛdomnim’ biɛri ti ma. Bɛ ni ti niŋ Ɛdomnim’ maa kaman n sujee mini n suhuyiɣisili ni nyɛ shɛm, ka bɛ baŋ m biɛri bɔhibu ni nyɛ shɛm. Yawɛ ŋun nyɛ ti Duuma ŋɔ n-yɛli lala maa.”

15Yawɛ ŋun nyɛ ti Duuma ŋɔ ni yɛli shɛm m-bɔŋɔ: “Filistianim’ ni doli dimdi din bi naara mini nia biɛri din be bɛ suhuri ni n-ku niriba la zuɣu,

16Dinzuɣu Yawɛ ŋun nyɛ ti Duuma ŋɔ yɛliya, ‘N ni yiɣisi n suhu bahi Filistianim’ zuɣu. N ni ku Chɛrɛtinima, ka ku bɛ ninvuɣ’ shɛb’ bɛn kpalim be teeku dul’ la.

17N ni bɔhi ba biɛri pam, ka darigi bɛ tibili ni suhuyiɣisili fiɛbiga. N yi bɔhi ba biɛri, di saha bɛ ni baŋ ni mani n-nyɛ Yawɛ.’ ”

← Chapter 24 Jump to: Chapter 26 →