Revelation 11

Gaelic Scottish (Tiomnadh Nuadh (MacEachen) 1875)

← Chapter 10 Jump to: Chapter 12 →

1Us thugadh cuilc dhomh coltach ri slait, us thuirteadh rium: Eirich, us tomhais teampull De, ʼs an altair, agus iadsan a tha g-aoradh ann.

2Ach a chùirt, a tha air taobh-mach an teampuill, tilg a mach, ʼs na tomhais i: a chionn gun tugadh i do na cinnich, agus saltraidh iad air a bhaile naomh dàfhichead mios agus a dhà:

3Agus bheir mi ordugh dha mo dhà fhianuis, us ni iad faisneachd mìle dà chiad ʼs tri fichead latha, air an eideadh ann an sac-aodach.

4ʼSiad sin an dà chraoibh ola, ʼs an dà choinnleir, a tha ʼnan seasamh an lathair Tighearna an talmhuinn.

5Agus ma chiurras duine air bith iad, thig teine a mach as am bial, agus sgriosaidh e an naimhdean; ʼs ma dhochnas neach air bith iad, ʼs ann mar so dhʼ fheumar a mharbhadh.

6Aca so tha cumhachd an t-athar a dhunadh, gus nach sil e ri laithean am faisneachd; ʼs tha cumhachd aca thairis air na h-uisgeachan, gus an tionndadh gu fuil, agus an talamh a bhualadh le gach plaigh, cho tric agus a shanntuicheas iad.

7Agus nuair a chriochnaicheas iad an teisteanas, ni an t-uilebheist, a thig a nuas as an aibheis, cogadh ʼnan aghaidh, ʼs bheir e buaidh orra, agus marbhaidh e iad.

8Us laidhidh an cuirp air straidean a bhaile mhoir, ris an abrar gu spioradail Sodom agus an Eiphit, far na cheusadh an Tighearna aca cuideachd.

9Agus chi feadhainn de na treibhean, ʼs de na sluaghan ʼs de na teangannan, ʼs de na cinnich, an cuirp tri latha gu leth; ʼs cha n-fhuilig iad an cuirp a chur an uaighean.

10Us gabhaidh iadsan, a tha tamh air talamh, toil-inntinn thairis orra, us ni iad subhachas, agus cuiridh iad gibhtean gu cheile: a chionn gun do phian an dà fhaidh so luchd-comhnuidh an talmhuinn.

11ʼS an deigh thri latha gu leth, chaidh spiorad na beatha bho Dhia a stigh unnta. Agus sheas iad air an casan, us thuit eagal mor orrasan a chunnaic iad.

12Us chual iad guth mor bho neamh a cantuinn riu: Thigibh an aird an so. Us chaidh iad suas gu neamh ann an nial; agus chunnaic an naimhdean iad.

13Agus san uair sin fhein bha crith-thalmhuinn mhor ann, us thuit an deicheamh cuid de ʼn bhaile; agus anns a chrith-thalmhuinn mharbhadh de dhʼ ainmeannan dhaoine seachd mile: us bhuail eagal a chuid eile, agus thug iad gloir do Dhia fhlathanais.

14Chaidh an darna truaighe seachad; agus, seall, thig an treas truaighe gu h-aithghearr.

15Agus sheid an seachdamh aingeal an trombaid: ʼs bha guthan mor air neamh a g-radh: A nis dhʼ aisigeadh rioghachd an t-saoghail so dha ʼr Tighearna agus dha Chriost-san, agus righichidh e fad linntean nan linntean. Amen.

16Agus thuit na ceithir-thar-fhichead sheanairean, a tha ʼnan suidhe air an suidheachain an lathair Dhe, air an aghaidh, ʼs thug iad aoradh do Dhia, a g-radh:

17Tha sinn a toirt buidheachais dhut, a Thighearna Dhia uile-chumhachdaich, a tha, ʼsa bha, ʼsa tha ri tighinn; a chionn gun do ghabh thu h-ugad fhein do mhor chumhachd, ʼs gun do righich thu.

18Agus bha fearg air na cinnich, us thainig do chorruich, agus àm breth a thoirt air na mairbh, agus an duais a thoirt dha dʼ sheirbhisich na faidhean, ʼs na naoimh, us dhaibh-san air a bheil eagal t-ainme, beag us mor, agus iadsan a sgriosadh, a thruaill an talamh.

19Agus dhʼ fhosgladh teampull Dhe air neamh; us chunnacas àirc a thiomnaidh ʼna theampull, agus bha dealanaich ann, agus guthan, agus crith-thalmhuinn, agus clachan-meallain mora.

← Chapter 10 Jump to: Chapter 12 →