Revelation 17

Gaelic Scottish (Tiomnadh Nuadh (MacEachen) 1875)

← Chapter 16 Jump to: Chapter 18 →

1Agus thainig a h-aon de na seachd ainglean, aig an robh na seachd cupaichean, us labhair e rium, a g-radh: Thig, us fiachaidh mi dhut diteadh na striopaiche mòire, a tha ʼna suidhe air moran uisgeachan,

2Ris an dʼ rinn righrean an talmhuinn striopachas, us chuireadh iadsan, a tha tamh air an talamh, air mhisg le fion a siursachd.

3ʼS thug e mi anns an spiorad do ʼn fhasach. Agus chunnaic mi boirionnach ʼna suidhe air uilebheist air dhath sgarlaide, lan ainmeannan toibheum, air an robh seachd cinn ʼs deich adhaircean.

4ʼS bha am boirionnach sgeadaichte mun cuairt le purpur, agus le sgarlaid, agus dealtraichte le òr, ʼs le clachan priseil, ʼs le leugan, agus cupa òir aice ʼna laimh lan de thruailleachd ʼs de shalachar a striopachais;

5ʼS air a bathais bha ainm sgriobhte: Mistire: Babilon mhor, mathair striopachasan agus truailleachdan an talmhuinn.

6Agus chunnaic mi am boirionnach air mhisg le fuil nan naomh, ʼs le fuil martairean Iosa. Agus ghabh mi iongantas, air dhomh a faicinn, le mor ioghnadh.

7Us thuirt an t-aingeal rium: Car-son a tha iongantas ort? Innsidh mi dhut mistire a bhoirionnaich, ʼs na beiste a tha ga giulan, air a bheil na seachd cinn ʼs na deich adhaircean.

8An t-uilebheist a chunnaic thu, bha e, ʼs cha n-eil, us tha e gu eirigh a nuas as an t-sloc gun ghrunnd, agus theid e gu leir-sgrios; us gabhaidh luchd-comhnuidh an talmhuinn (aig nach eil an ainmeannan sgriobhte an leabhar na beatha bho chruthachadh an t-saoghail) iongantas ri faicinn an uilebheist a bha, ʼs nach eil ann.

9Agus se so an seagh anns a bheil gliocas. ʼSiad na seachd cinn seachd monaidhnean, air a bheil am boirionnach ʼna suidhe, agus is seachd righrean iad.

10Thuit coig, tha h-aon a lathair, ʼs am fear eile cha tainig fhathast; ʼs nuair a thig, cha n-fhaod e fuireach ach goirid.

11Agus an t-uilebheist a bha, ʼs nach eil ann, se an t-ochdamh, agus ʼsann de na seachd e, us theid e gu leir-sgrios.

12Agus na deich adhaircean a chunnaic thu, is deich righrean iad, nach dʼ fhuair fhathast rioghachd, ach gheobh iad cumhachd aon uair an deigh an uilebheist.

13Tha iad so a dhʼ aon aigne, us liubhraidh iad an neart ʼs an cumhachd seachad do ʼn uilebheist.

14Cogaidh iad so ris an Uan, us bheir an t-Uan buaidh orra: a chionn gur e Tighearna nan tighearnan, us Righ nan righrean, ʼs tha iadsan, a tha maille ris, air an gairm, ʼs air an taghadh, agus dileas.

15Us thuirt e rium: Na h-uisgeachan a chunnaic thu, air a bheil an striopach ʼna suidhe, is sluaghan, agus fineachan, agus teangannan iad.

16ʼS na deich adhaircean, a chunnaic thu air a bheist, bheir iad fuath do ʼn striopaich, us creachaidh iad i, us ruisgidh iad i, us ithidh iad a feoil, agus loisgidh iad i fhein le teine.

17Oir chuir Dia ʼnan cridhe, gun dian iad ni sa bith a thoilicheas e, gun toir iad an rioghachd do ʼn uilebheist gus an coimhlionar facail Dhe.

18Agus am boirionnach a chunnaic thu, si am baile mor i, aig a bheil rioghachd thairis air righrean an talmhuinn.

← Chapter 16 Jump to: Chapter 18 →