Revelation 14

Gaelic Scottish (Tiomnadh Nuadh (MacEachen) 1875)

← Chapter 13 Jump to: Chapter 15 →

1Agus chunnacas leam: agus, seall, bha Uan ʼna sheasamh air beinn Shioin, us maille ris ciad ʼs dàfhichead ʼs ceithir mile, air an robh ainm fhein, ʼs ainm ʼAthar, sgriobhte air clar an aodainn.

2Agus chuala mi guth bho neamh, mar fhuaim moran uisgeachan, ʼs mar fhuaim tairneanaich mhoir; agus bha an guth a chuala mi mar ghuth chlarsairean ri clarsaireachd air an clarsaichean.

3Us sheinn iad mar gum bʼ e laoidh ùr air bialaobh na cathrach, ʼs nan ceithir beothaichean, ʼs nan seanairean; ʼs cha bʼ urrainn do dhuine air bith an laoidh a sheinn, ach an ciad, an dà fhichead, ʼs na ceithir mile sin, a cheannaicheadh bho ʼn talamh.

4ʼSiad sin iadsan nach do thruailleadh le boirionnaich: oir is oighean iad. Tha iad so a leantuinn an Uain, ge bʼ e taobh an teid e. Chaidh iad so a cheannach bho mheasg dhaoine ʼnan ciad thoradh do Dhia ʼs do ʼn Uan.

5ʼS ʼnam bial cha dʼ fhuaradh briag: oir tha iad gun smal air bialaobh righ-chathair Dhe.

6Agus chunnaic mi aingeal eile a falbh air iteig tromh mhiadhon neamh, aig an robh an soisgeul siorruidh gus a shearmonachadh dhaibh-san, a tha ʼnan suidhe air an talamh, ʼs thairis air gach cinneadh, agus fine, agus teangaidh, agus sluagh:

7A g-radh le guth ard: Biodh eagal an Tighearna oirbh, us thugaibh onair dha: a chionn gum beil uair a bhreitheanais air tighinn; agus thugaibh aoradh dhasan, a rinn neamh, agus talamh, a mhuir, agus na tobraichean uisge.

8ʼS lean aingeal eile, a g-radh: Thuit, thuit a Bhabilon mhor ud, a thug air na cinnich uile ol de dhʼ fhion fearg a striopachais.

9Agus lean an treas aingeal iad, a g-radh le guth ard: Ma bheir duine air bith aoradh do ʼn uilebheist, ʼs dha iomhaigh, ʼs ma ghabhas e a chomharradh air aodann, no air a laimh:

10Olaidh esan de dhʼ fhion fearg Dhe, a tha measgaichte le fior fhion ann an cupa fheirge, agus pianar e le teine ʼs le pronnastul an lathair nan aingeal naomh, agus an lathair an Uain;

11Agus eiridh toit an doruinn suas a chaoidh agus a chaoidh; agus fois cha n-eil a latha no dhʼoidhche aca-san, a thug aoradh do ʼn uilebheist ʼs dha iomhaigh, no aig aon a ghabhas comharradh ʼainme.

12So far a bheil faighidin nan naomh, a tha cumail faintean Dhe agus creideamh Iosa.

13Us chuala mi guth bho neamh a cantuinn rium: Sgriobh: Is beannaichte na mairbh a chaochlas san Tighearna. A so suas, os an Spiorad, gun gabh iad fois bho ʼn saothair: oir leanaidh an oibrichean iad.

14Agus chunnaic mi, us seall nial geal; us neach ʼna shuidhe air an nial coltach ri Mac an duine, agus air a cheann bha crùn òir, us speal ghiar ʼna laimh.

15Us thainig aingeal eile a mach as an teampull, a glaodhaich le guth ard ris-san a bha ʼna shuidhe air an nial: Sparr a stigh do speal, us buain, oir tha uair na buana air tighinn, ʼs gum beil faghar an talmhuinn abuich.

16Us sparr esan, a bha ʼna shuidhe air an nial, a speal san talamh, agus bhuaineadh an talamh.

17Us thainig aingeal eile mach as an teampull a tha air neamh, aige-san cuideachd bha speal ghiar.

18Us thainig aingeal eile mach as an altair, aig an robh cumhachd thairis air teine; us dhʼ eigh e le guth ard ris-san aig an robh an speal ghiar, a g-radh: Sparr a stigh do speal ghiar, agus buain bagaidean fionlios an talmhuinn; oir tha a dhearcan-fiona abuich.

19Agus sparr an t-aingeal a speal ghiar san talamh, us bhuain e fionlios an talmhuinn, us thilg e e ann am fion-amar mor fearg Dhe;

20Agus shaltradh am fion-amar taobh-mach a bhaile, agus thainig fuil a mach as an amar suas gu ruig strianan nan each, fad mile us sia ciad stàd.

← Chapter 13 Jump to: Chapter 15 →