2 Kings 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Acab ningo 70 ita’ýra Samáriape, upévare Jehu ohai peteĩ kuatiañe’ẽ ha oguerahauka Samáriape umi Jizreelgua ruvichakuérape, umi karai ancianokuérape, ha umi Acab ra’y rerekuakuérape, ha he’iuka ichupekuéra:

2Ko kuatiañe’ẽ og̃uahẽvo peẽme, peẽ peñangarekóva pende jára ra’ykuéra rehe, icarrokuéra ha ikavaju arigua rehe, ha táva tápia yvate ha ñorãirõ rembiporukuéra rehe;

3peiporavo pe iporãvéva ha heko potĩvéva pende jára ra’ykuéra apytégui, ha pemoĩ ichupe itúva mburuvicha guapyhauasúpe ha peñorãirõ pende jára rogaygua rehe.

4Ha’ekuéra katu okyhyjeiterei, ha he’i hikuái: Péina ápe mokõi tetã ruvicha ndaipu’akái Jehu rehe, mba’éicha piko ñande ñandepu’akáta hese.

5Ha pe mba’eita ñangarekohára, pe táva sãmbyhyhára, umi anciáno ha umi ijára ra’y rerekuakuéra he’iuka ichupe: Ore ningo ne rembiguái, ore rojapóta opaite mba’e nde eréva guive oréve, ndoroiporavomo’ãi avavépe tetã ruvicha ramo, ejapo katu ndéve iporãve háicha.

6Upéramo Jehu ohai jevy ambue kuatiañe’ẽ, he’ívo: Oime ramo peẽ che rembiguái, ha pejapose ramo che ñe’ẽ, pejapyhy pende jára ra’ykuéra akãngue, ha peju che rendápe Jizreélpe ko’ẽ ramo ko horaitépe. Ha ko’ã tetã ruvicha ra’ykuéra, 70 kuimba’e, oĩ umi táva karaiguasukuéra ndive omongakuaa hag̃ua ichupekuéra.

7Og̃uahẽvo ichupekuéra pe kuatiañe’ẽ, ojapyhy hikuái tetã ruvicha ra’ykuérape ha oakã’o hikuái umi 70 kuimba’épe, ha omoĩ hikuái iñakãnguekuéra ajakápe oguerahauka hag̃ua Jehúpe, Jizreélpe.

8Ha ou peteĩ tembiguái omba’emombe’u ichupe, he’ívo: Ogueru hikuái tetã ruvicha ra’ykuéra akãngue, ha Jehu he’i ichupe: Pemoĩ mokõi atýra pe táva rokẽ ojeikehápe, ha peheja upépe ko’ẽrõ peve.

9Og̃uahẽvo pe ko’ẽ, osẽ ha’e, ha ñembo’yha guive he’i mayma tetãyguakuérape: Peẽ pende reko potĩ; péina ápe che apu’ãkuri che jára rehe, ha ajuka ichupe, ha máva piko ojukara’e ko’ãvape.

10Peikuaákena ko’ág̃a pe ñe’ẽ Ñanderuete he’iva’ekue Acab róga rehe, mba’eve ndo’a reimo’ãi yvy rehe; ha ojehupava’erã Ñanderuete he’imava’ekue hembiguái Elías rupi.

11Jehu ojukapa mayma hembýva guive Acab rogayguávagui Jizreélpe ha ipa’ikuérape avei, ndopytavéi peve avave.

12Upéi osẽ upégui oho hag̃ua Samáriape; ha tape rehe og̃uahẽ peteĩ ógape, umi ovecha ñangarekohára oñapĩ jave ijovechakuérape,

13ha upépe Jehu ohug̃uaitĩ Ocozías, Juda retã ruvicha ryvykuérape, ha he’i ichupekuéra: Máva piko peẽ. Ha ha’ekuéra he’i: Ore, Ocozías ryvykuéra, ha rojúkuri romomaitei hag̃ua tetã ruvicha ra’ykuérape ha tetã ruvicha rembireko membykuérape.

14Upéramo Jehu he’i: Pejapyhy ichupekuéra hekove reheve. Ha ojapyhy rire ichupekuéra oakã’o pe ovecha apĩha róga ykua ypýpe, 42 kuimba’e, hemby’ỹ rehe peteĩnte jepe.

15Ohóvo upégui ojojohu hikuái Jonadab, Recab ra’y ndive, ha oñomomaitei rire, Jehu he’i ichupe: Nde py’a porãpa chendive, ku che py’a porã háicha nendive. Ha Jonadab he’i ichupe: Upeichaite. Upéicharamo embohasa chéve nde po, Jehu he’i ichupe. Ha Jonadab ombohasa ichupe ipo. Upéi ohupi ichupe icárrope,

16ha he’i ichupe: Eju chendive ha rehecháta pe takate’ỹ aguerekóva Ñanderuete rehe. Ha omohenda ichupe icárrope.

17Ha Jehu og̃uahẽ rire Samáriape, ojukapaite umi Acab rogaygua hembývape gueteri Samáriape; upéicha oiko opaite Ñanderuete ñe’ẽ Ha’e he’imava’ekue Elías juru rupi.

18Upéi Jehu ombyatyuka mayma tetãyguakuérape, ha he’i ichupekuéra: Acab nomomba’eguasuiete Baálpe, Jehu katu omomba’eguasuetéta ichupe.

19Pehenói chéve mayma Baal profetakuérape, ha mayma hembiguaikuérape, ha mayma ipa’ikuérape; oĩmbaite hag̃ua, aikuave’ẽségui kuave’ẽmby ndetuicháva Baálpe g̃uarã; oimeraẽva ou’ỹva ndoikovemo’ãi. Péicha ojapo Jehu ohundiete hag̃ua umi Baálpe ombotuichávape.

20Ha Jehu he’i: Peiporavo peteĩ ára pemomarangatu hag̃ua Baálpe. Ha ha’ekuéra oiporavo.

21Ha Jehu omondo hembiguaikuérape opaite Israel retã rupi, Baal rembiguaikuéra oupa hag̃ua; péicha, ndaipóri peteĩnte jepe ou’ỹva. Ha oike hikuái Baal tupãópe, ha Baal tupão henyhẽte peteĩ apýra guive ambue apýra peve.

22Upéramo umi pe aóre oñangarekóvape he’i: Eguenohẽ aokuéra opaite Baal rembiguaikuérape g̃uarã. Ha ha’ekuéra oguenohẽ ichupekuéra ao omondeva’erãva.

23Ha Jehu oike, Jonadab, Recab ra’y ndive, Baal tupãópe, ha he’i Baal rembiguaikuérape: Pema’ẽke ha pehecha ndaipóripa pende apytépe peteĩ Ñanderuete rembiguáiva, tove toĩ Baal rembiguaikuérante ko’ápe.

24Ha ha’ekuéra oikévo oikuaave’ẽ hag̃ua kuave’ẽmby ojehapypava’erãva, Jehu katu omoĩ okápe 80 kuimba’e, ha he’i ichupekuéra: Oimeraẽva ohejáva okañy peteĩva jepe ko’ã kuimba’e che amoĩva pende pópe, hekove opytáta pende rekove rehe.

25Ha ojapopa riréma hikuái ikuave’ẽmby ojehapypapyréva, Jehu he’i isoldádo ha huvichakuérape: Peike ha pejukapa; aníke avave okañy. Ha ojuka ichupekuéra kyse pukúpe, ha oheja upépe ojepyso joa, ha oike hikuái Baal tupão koty marangatúpe.

26Ha upégui oguenohẽ Baal rete ra’ãnga, ha ojoka hikuái.

27Ha ohapy hikuái Baal rete ra’ãnga, ha oitypa Baal tupão, ha ojapo ichugui letrína, oĩva gueteri ko ára kóva peve.

28Péicha Jehu ohundiete Baal rembiguaikuérape Israel retãme.

29Opaite ko’ã mba’e ojapo ramojepe Jehu ndojeíri umi Jeroboam, Nabat ra’y angaipakuéragui, omoangaipava’ekue Israélpe; ha oheja ñembo’yhápe umi tóro ra’y ra’ãnga oroguiguáva oĩva Betel ha Dánpe.

30Ha Ñanderuete he’i Jehúpe: Rejapógui iporãva che resa renondépe, ha rejapógui pe Acab róga rehe che py’apýpe aipota háicha, ne ñemoñarenguéra oguapýta Israel ruvicha guapyhaguasu ári nde ra’y ra’yre ñemoñare meve (4 generaciónes).

31Jehu katu noñeñangarekóiri ipy’aite guive oiko hag̃ua Israel Jára rembiapoukapy he’i háicha, ha ndopoíri avei Jeroboam angaipakuéragui, omoangaipava’ekue Israélpe.

32Umi ára umívape Ñanderuete oñepyrũ omomichĩve ohóvo Israel retãme, Hazael ipu’akágui hesekuéra opaite hetã rembe’y pukukue javeve,

33pe Jordan guive kuarahyresẽ gotýo ho’a hesekuéra ija’e’ỹva pópe, opaite Galaad retã, Gad, Ruben ha Manases yvy, Aroer yakã rembe’y guive Galaad ha Basan peve.

34Ambue Jehu rembiapokue ha opaite mba’e ojapova’ekue ha ipy’aguasu ojehaipa Israel retã ruvichakuéra rembiapokue kuatiañe’ẽme.

35Ha Jehu omano rire, oñeñotỹ ichupe hikuái Samáriape; ha Joacaz, ita’ýra, oisãmbyhy hendaguépe.

36Jehu oisãmbyhy Samáriape, Israel retã ruvicha ramo 28 áño pukukue.

← Chapter 9 Jump to: Chapter 11 →