2 Kings 6

Guarani 2015 (Ñanderuete Ñe’ẽ Porã 2015)

← Chapter 5 Jump to: Chapter 7 →

1Umi proféta remimbo’e he’i Eliséope: Péina ápe, ko tenda roikoha nendive michĩma oréve g̃uarã.

2Toroho ko’ág̃a Jordan ysyrýpe ha toroikytĩ upépe peteĩteĩva ore róga vigarã ha toromopu’ã upépe voi peteĩ óga roiko hag̃ua. Ha ha’e he’i: Tapeho.

3Ha peteĩ ijapytepekuéra he’i: Rojerure ndéve reju hag̃ua ne rembiguaikuéra ndive; ha ha’e he’i: Jaha katu.

4Ha og̃uahẽvo Jordánpe oikytĩ hikuái yvyrakuéra.

5Ha ojehu peteĩ proféta oity jave hína peteĩ yvyra, ýpe ho’a pe hácha ha’e oiporúva; ha osapukái he’ívo: Ái, ái che Jára, che Jára, péva ningo ojeporukava’ekue chéve.

6Ha Eliséo oporandu ichupe: Moõitépa ho’ára’e. Ha ha’e ohechauka ichupe ho’a haguépe. Upémaramo ha’e oikytĩ peteĩ yvyra, ha oity upépe; ha pe hácha ou y apére ha ovevúi.

7Ha he’i: Ejapyhy. Ha ha’e ipojái hese ha ojapyhy jevy.

8Síria retã ruvicha ojeityse Israel ári, ha ha’e omombe’u hembiguaikuérape mamópa pe tenda ha’e oiporavomava’ekue ojeity hag̃ua hi’arikuéra.

9Ha Eliséo he’iuka Israel retã ruvichápe: Ema’ẽke, ani rehasátei upérupi, umi Siriaygua nera’ãrõgui upépe.

10Upérõ Israel retã ruvicha omondo isoldadokuérape Eliséo he’i haguépe oho hag̃uáme, upéicha ndo’ái Siriaygua ñuhãme, ha péva heta jevy ojehu.

11Ha Síria retã ruvicha ojepy’apy ko’ã mba’e rehe; ha ohenói hembiguaikuérape ha he’i ichupekuéra: Napemombe’umo’ãi piko chéve mavaitépa ñande apytégui oĩ Israel retã ruvicha ndive.

12Upémaramo peteĩ hembiguái he’i: Ndaupéichai che retã ruvicha ha che jára, Israélpe ningo oĩ peteĩ proféta, hérava Eliséo, ha’e omombe’upa hetã ruvichápe pe ñe’ẽ nde eréva guive nde koty ñemiha meguágui jepe.

13Upémaramo he’i: Tapeho ha pehecha moõpa Eliséo oiko, ajapyhyuka hag̃ua ichupe. Ha oje’e ichupe: Eikuaa porãke ha’e oime Dotánpe.

14Upéramo tetã ruvicha omondo upépe ikavaju arigua aty, icarrokuéra rehevé, ha peteĩ soldádo aty tuicháva reheve, ha og̃uahẽvo pyharekuépe, omongorapaite pe táva Eliséo oĩháme.

15Ha pyharevete Eliséo rembiguái opu’ã ha péina umi soldádo omongorapaitéma pe táva, kavaju arigua ha carroita reheve. Upémaramo pe tembiguái he’i ijárape: Che jára, mba’éiko jajapóta ko’ág̃a.

16Ha Eliséo he’i ichupe: Ani rekyhyjétei, hetaiteve umi oĩva ñanendive, Siriayguakuéragui oĩva.

17Ha upérõ Eliséo oñembo’e ha he’i: Ajerure ndéve, ore Ruete, ehesape’a tohecha porã ha’e. Ha Ñanderuete ohesape’a hembiguáipe, ha oma’ẽvo ohecha pe cérrope henyhẽ tapicha kavaju ariguágui ha cárro tataguiguáva Eliséo jerekuévo.

18Ha umi Siriaygua oguejývo ipiári, Eliséo oñembo’e Ñanderuetépe, ha he’i: Ajerure ndéve emohesatũ ichupekuéra. Ha Ñanderuete omohesatũ ichupekuéra, Eliséo ojerure haguéicha.

19Upéi Eliséo he’i ichupekuéra: Ndaha’éi kóva pende rape, kóva ndaha’éi avei pe táva; peju che rapykuéri ha che pogueraháta pe kuimba’e pehekáva rendápe. Ha ogueraha ichupekuéra Samáriape.

20Ha og̃uahẽvo hikuái Samáriape Eliséo he’i: Ore Ruete, ehesape’ána ko’ãvape, tohecha jevy hikuái. Ha Ñanderuete ohesape’a ichupekuéra, ha oma’ẽvo hikuái ojejohu Samária mbytépe.

21Ha Israel retã ruvicha ohechávo ichupekuéra oporandu Eliséope: Ajukapátapa ichupekuéra, che ru.

22Ha ha’e he’i jevy: Ani rejukátei. Ndépa rejukase umi rejapyhy’ỹva’ekuépe nde kyse puku ha nde guyrapápe; emoĩ henondepekuéra pan ha y, okaru ha hoy’u hag̃ua hikuái, ha toho jevy imburuvichaguasu rendápe.

23Upéramo oñeme’ẽ ichupekuéra tembi’ueta; ha okaru ha hoy’upa rire, omondo ichupekuéra, ha ha’ekuéra oho jevy ijára rendápe. Ha araka’eve ndouvéi Síriagui umi soldádo aty michĩva oporomonda hag̃ua Israel retãgui.

24Uperire Benadad, Síria retã ruvicha, ombyaty mayma isoldadokuéra, ha ojupi omongora hag̃ua Samária.

25Ha tuicha ñembyahýi oĩ Samáriape, oñemongorapaite haguére; peteĩ búrro akãngue jepe oñeme’ẽ 893 grámo pláta (óro morotĩ) rehe, ha 250 grámo pykasu repoti 56 grámo pláta rehe.

26Ha tetã ruvicha ohasávo pe táva tápia yvate rupi, peteĩ kuña osapukái ichupe, ha he’i: Chepytyvõmína tetã ruvicha, che jára.

27Ha ha’e he’i: Ñanderuete nanepytyvõi ramo, mamóguipa che ikatúta roipytyvõ. Kóga ra’ỹi oñemono’õ hágui, térãpa parral’a oñeñami hágui ndaikatúi roipytyvõ.

28Ha tetã ruvicha oporandu ichupe: Mba’éiko ojehu ndéve. Ha pe kuña he’i ichupe: Ko kuña kóva he’íkuri chéve: Eme’ẽna ne memby ha ja’u ko ára kóvape ha ko’ẽramo ja’úta che memby.

29Rombojy che memby ha ro’u. Ha ambue árape che ha’e ichupe: Eme’ẽ ko’ág̃a ne memby ja’u hag̃ua. Ha’e katu oñomi imembýpe.

30Tetã ruvicha ohendúvo ko kuñakarai ñe’ẽ, omondoro ijao, ha péicha ohasa pe táva tápia yvate rupi; upérõ tetãyguakuéra ohecha pe ao vosakue ha’e omondéva hetã ruvicha ao guýpe.

31Ha ha’e he’i: Ñanderuete tachenupã ha tachehavirave Eliséo, Safat ra’y akã opyta ramo hete rehe ko ára kóvape.

32Ha Eliséo oguapyhína hógape, ha hendive oguapy umi karai anciáno ha tetã ruvicha omondo hendápe peteĩ hembijokuái. Ha pe hemimondo og̃uahẽ mboyve Eliséo rendápe, ha’e he’i umi ancianokuérape: Ndapehechái piko, mba’éichapa ko oporojukáva membykue ombou cheakã’o hag̃ua, peñangarekóke, ha ág̃a og̃uahẽvo hemimondo pemboty pe okẽ, ha ani pehejátei oike. Noñehendúinepa hapykuéri ijára py ryapu.

33Oñe’ẽ gueteri Eliséo hendivekuéra, ha péina pe tetã ruvicha voi oguejy oúvo hendápe, ha he’i: Añetehápe ko’ã mba’evai ou Ñanderuetégui. Mba’érehe piko aha’ãrõvéta Ñanderuete pytyvõ rehe.

← Chapter 5 Jump to: Chapter 7 →