2 Kings 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Peteĩ kuñakarai, proféta remimbo’e rembirekokue, omba’ejerure asy Eliséope, he’ívo: Ne rembiguái, che ména omanóma; ha nde reikuaa porã ha’e okyhyje hague Ñanderuetégui; ha ko’ág̃a og̃uahẽ pe omba’eporukava’ekue ichupe ojapyhy hag̃ua umi mokõi che memby, hembiguái ramo, pe mba’eporukakue repy rehe.

2Ha Eliséo he’i ichupe: Mba’épa ikatu che ajapo nderehe. Emombe’u chéve mba’épa reguereko nde rógape. Ha pe kuñakarai he’i: Ne rembiguái mba’evete ndoguerekovéi hógape, peteĩ acéite ryrumímante.

3Ha ha’e he’i ichupe: Tereho ha eiporu umi nde róga jerére oikóvagui (vecínogui) heta mba’yru.

4Upéi eike ne membykuéra ndive nde rógape ha emboty ne rokẽ; upéi eñohẽ nde acéite ne mba’yrúgui, remyenyhẽmba peve umi acéite ryru reiporuva’ekue, ha henyhẽvo peteĩ, emboyke nde koty ruguápe.

5Ko kuñakarai ojapopa Eliséo he’iva’ekue guive ichupe, upéi omboty hóga rokẽ ha omyenyhẽ umi mba’yru oiporuva’ekue imembykuéra ombohasáva ichupe.

6Ha umi mba’yru henyhẽmbáma ramo he’i peteĩ imembýpe: Eruvéke chéve mba’yrukuéra. Ha ha’e he’i ichupe: Ndaiporivéima mba’yru. Upevove opa avei pe acéite.

7Upéi ou omombe’u Eliséope, ha ha’e he’i ichupe: Tereho ha eñemu pe acéite rehe, ha ehepyme’ẽ umi mba’e porukaharépe; ha nde ha ne membykuéra peikóta hembyre reheve.

8Ojehu peteĩ árape, Eliséo ohasa ohóvo Sunem rupi; ha upépe oiko peteĩ kuñakarai ojererekóva ichupe mba’e ramo, ha opaite ára ohasa jevy ramo upérupi ha’e ohenói ichupe okaru hag̃ua; ha Eliséo oike ko kuñakarai rógape okaru hag̃ua hendive.

9Ha ha’e he’i iménape: Péina ág̃a, che aikuaa pe ohasáva jepi ñande róga rupi ha’eha peteĩ Ñanderuete rembiguái heko porãva.

10Che ajerure ndéve ñamopu’ã hag̃ua ichupe g̃uarã peteĩ kotymi, ha ñamoĩ ipype tupa, mesa, guapyha ha tataindyenda, ha’e ou jave ñane rendápe opytu’u hag̃ua ipype.

11Ha ojehu peteĩ árape ha’e ou jevývo opyta oke hag̃ua pe koty pévape.

12Upéramo Eliséo he’i hembiguái Gejazípe: Ehenói pe kuñakarai Sunemguápe. Gejazi ohenói ichupe, ha ha’e ou hendápe.

13Ha Eliséo he’i hembiguái Gejazípe, ere ichupe: Ma’ẽ, nde ningo reñeha’ãmbaite reñangareko porã hag̃ua orerehe, upévare ejerure peteĩ mba’e reipotáva ajapo hag̃ua nderehe. Reipotápa añe’ẽ nderehe tetã ruvichápe, térã soldádo ruvichápe. Ha pe kuñakarai he’i: Che aiko porã che pehẽnguekuéra apytépe.

14Ha ha’e he’i: Mba’éiko ikatu ajapo hese. Ha Gejazi he’i: Péina ápe, ha’e naimembýi, ha iména itujáma.

15Upémaramo he’i ichupe: Ehenói ichupe. Ha ha’e ohenói ichupe, ha pe kuñakarai ou oñembo’y ikoty rokẽme.

16Ha Eliséo he’i ichupe: Pe áño oúvape, ko’ã ára rupi, reñañuãtama ne membýpe. Ha pe kuñakarai he’i: Anína péicha, nde karaiguasu, nde ningo Ñanderuete rembiguái heko porãva, ani reñembohorýtei ne rembiguái rehe.

17Ha pe kuñakarai ou hyeguasu ha imemby peteĩ mitãkuimba’e pe áño ambuépe, Eliséo he’i haguéicha ichupe.

18Ha pe mitã okakuaa. Ha ojehu peteĩ árape, ou itúva rendápe, oĩvahína umi temitỹngue kytĩhára ndive.

19Ha he’i itúvape: Ái, che akã; ái, che akã. Ha itúva he’i peteĩ tembiguáipe: Eraha isýpe.

20Ha ogueru rire isýpe, oguapy isy renypy’ã ári asaje peve, ha upéi omano.

21Upémaramo ha’e ojupi ha omoĩ imemby retekue pe proféta rupápe, ha osẽvo omboty pe okẽ.

22Upéi ohenói iménape ha he’i ichupe: Ajerure ndéve, emondo chendive peteĩ tembiguái ha peteĩ búrro kuñáva, aha hag̃ua ñaniháme Ñanderuete rembiguái rendápe, ha pya’e aju jevy hag̃ua.

23Ha ha’e he’i ichupe: Mba’upéiko rehóta hendápe ko ára kóvape. Ndaha’éi ningo jasy ra’y, térã jepytu’uha ára. Ha pe kuñakarai he’i: Ani rejepy’apýtei.

24Upéi ombyapeuka pe búrro kuña, ha he’i hembiguáipe: Eisãmbyhýke ha jaha; ha aníke chemombyta tape rehe, che nda’éi ramo ndéve.

25Ha’ekuéra oho ha og̃uahẽ Ñanderuete rembiguái rendápe, Carmel cérrope. Ha Eliséo ohechávo ichupe mombyry guive, he’i hembiguái Gejazípe: Péina ápe ou pe kuñakarai Sunem pegua.

26Tereho ko’ág̃a ñaniháme hendápe, ha eporandu ichupe: Oho porãmba piko ndéve, ne ménape ha ne membýpe avei. Ha ha’e he’i: Oho porãmba.

27Ha og̃uahẽ rire Eliséo rendápe, pe cérrope, ha’e ojejapyhy ipy rehe. Ha oñembojágui hese, Gejazi oipe’ase ichupe; ha Eliséo he’i ichupe: Ehejána, hi’angapýpe oĩ ñembyasy iróva, Ñanderuete omo’ã chehegui umi mba’e ojehúva ichupe ha ndoikuaaukái chéve.

28Ha pe kuñakarai he’i: Che karaiguasu chépa ajeruréra’e chememby hag̃ua. Nda’éipara’e ndéve ani hag̃ua reñembohory cherehe.

29Upémaramo Eliséo he’i Gejazípe: Ejeku’a jokua, ejapyhy che yvyra po’i nde pópe, ha tereho; reñohuvaitĩ ramo nde rapicha ndive ani remomaitei ha oĩ ramo nemomaiteíva ani rembohováitei; ha reg̃uahẽvo emoĩ che yvyra po’i pe mitã rova ári.

30Ha pe mitã sy he’i: Ñanderuete rekovére ha ne ánga rekovére, upéicha che ndorohejamo’ãi.

31Upémaramo Eliséo opu’ã ha oho hapykuéri. Ha Gejazi ohóma henonderãme ha omoĩ pe yvyra po’i pe mitã rova ári; pe mitã noñe’ẽi ha noñandúi mba’eve, upévare ha’e ojevy Eliséo rendápe, ha omombe’u ichupe, he’ívo: Pe mitã ndopáyiri.

32Eliséo og̃uahẽvo pe kuña rógape, péina pe mitã re’õngue ojepysóma hupa ári.

33Ha Eliséo oike rire omboty porã pe okẽ, ha oñembo’e Ñanderuetépe.

34Upéi oñeno ha ojepyso pe mitã ári, ha omoĩ ijuru pe mitã juru ári, ipo ipokuéra ári, péicha ojepyso hi’ári, ha pe mitã rete haku jevy.

35Upéi Eliséo opu’ã ha oguata pe koty ryepýre, upéi ojepyso jevy hi’ári, ha pe mitã iñatĩa 7 jevy, ha upéi ojesape’a.

36Upéramo Eliséo ohenói Gejazípe, ha he’i ichupe: Ehenói pe kuñakaraípe. Ha ha’e ohenói ichupe. Ha oikévo pe kuñakarai, Eliséo he’i ichupe: Na’ápe ne memby.

37Ha’e oikévo ojeity Eliséo renondépe, oñesũpehẽ yvy peve; upéi ohupi imemby ha osẽ hikuái.

38Eliséo oho jevy Gilgálpe ñembyahýi guasu oĩ jave upe tetãpy rehe. Ha proféta remimbo’ekuéra oĩmba hendive, ha upévagui ha’e he’i hembiguáipe: Emoĩ peteĩ japepoguasu, ha ejapo hi’upyrã proféta remimbo’ekuérape g̃uarã.

39Ha peteĩ osẽ ñu rehe ohekávo ka’avo, ha ojohu peteĩ plánta ka’aguy ojoguáva pepínope, ha omyenyhẽ oguerúvo ijao ruguáipe; ha ou jevy ha omoĩ tembi’urãme, ndoikuaái katu mba’épa péva.

40Upéi omoĩ kuimba’ekuérape ho’u hag̃ua hikuái; ha ojehu ho’úvo hikuái pe tembi’u, osapukái hikuái ha he’i: Ñanderuete rembiguái, ko tembi’úpe oĩ pohã vai orejukátava. Ha ndaikatuvéi ho’u hikuái.

41Upémaramo Eliséo he’i ichupekuéra: Pegueru trígo ku’i ha pembojehe’a pene rembi’u rehe, ha he’i: He’uka katu nde rapichakuérape. Ko’ág̃a ndaiporivéima mba’evaíva pene rembi’úpe.

42Upéramo pete’ĩ kuimba’e oúva Baal-saliságui, ogueru Eliséope pan tenondevéva, 20 pan cebáda (ojoguáva trígope), ha trígo hára pyahu mbichypyréva. Ha ha’e he’i: Peme’ẽ ichupekuéra ho’u hag̃ua.

43Ha hembiguái he’i jevy: Mba’éicha piko amoĩta ko’ãvante 100 kuimba’épe g̃uarã. Eliséo katu ombohovái: Eme’ẽ ichupekuéra ho’u hag̃ua, péicha he’ígui Ñanderuete: Ho’úta hikuái ha hemby jevýta.

44Upémaramo omoĩ henondepekuéra, ha hyg̃uatãmba rire hemby gueteri, Ñanderuete he’i hagueichaite.

← Chapter 3 Jump to: Chapter 5 →