2 Kings 17

Guarani 2015 (Ñanderuete Ñe’ẽ Porã 2015)

← Chapter 16 Jump to: Chapter 18 →

1Acaz ombotývo 12 áño Juda retã ruvicha ramo; Oséas, Ela ra’y, oñepyrũ oisãmbyhy Israel retã ruvicha ramo Samáriape, ha oisãmbyhy 9 áño.

2Ha ojapo ivaíva Ñanderuete resa renondépe, ndaha’éi ramojepe Israel retã ruvichakuéraicha oikomava’ekue ha’e mboyve.

3Salmanasar, Asíria retã ruvicha, ou Oséas rendápe ha kóva oñemomirĩ henondépe, ha oiko hembiguái ramo ome’ẽvo ichupe impuésto.

4Ha Asíria retã ruvicha oikuaávo Oséas opu’ãha hese, nome’ẽvéi impuésto ojapo haguéicha ambue añokuéra rupi; Oséas omondógui iñe’ẽ rerahahára So, Egípto retã ruvicha rendápe, upévagui Asíria retã ruvicha oapresa ichupe, ha omoinge ichupe cárcelpe,

5ha ojasuru hikuái Israel retã tuichakue rehe, ha omongora Samária mbohapy áño pukukue, ombopoguyete peve.

6Oséas ombotývo 9 áño tetã ruvicha ramo, Asíria retã ruvicha omoĩ ipoguýpe Samáriape, ha ogueraha Israelguakuéra hembiguái ramo Asíriape, ha omohenda ichupekuéra Haláhpe, opytáva Habórpe, Gozan ysyry rembe’ýpe, ha Média tavakuérape.

7Israel ñemoñarenguéra oñemoangaipágui Ijára ndive, omomba’eguasu haguére ambue jarakuérape, Ñanderuete oguenohẽ ramo jepe Israelguakuérape faraon, Egípto retã ruvicha poguýgui,

8ha oiko vai hikuái avei ambue tetãnguéraicha, Ñanderuete omosẽva’ekue Israelguakuéra renondégui ha omoangaipáma Israel retã ruvichakuérape.

9Ha Israel ñemoñarenguéra ojapo tembiapo ivaíva Ñanderuete renondépe, ñemiháme omopu’ã pe yvy yvate itavakuérape, umi óga yvate mañaha guive umi táva oñemongoraha peve,

10omomba’eguasu hag̃ua Asera rete ra’ãnga umi cérro yvateha rupi, ha yvyra ikuarahy’ã porãva guýpe.

11Ha opaite yvy yvateha rupi ohapy hikuái mba’e ryakuã porã, umi tetãnguéra ojapo haguéicha, Ñanderuete omosẽmava’ekue henonderãgui, ha upéicha ojapo hikuái mba’e ivaietereíva ombopochy hag̃ua Ñanderuetépe,

12ha oiko hikuái ijára gua’u ra’ãngakuéra rembiguái ramo, ko’ã mba’e rehe Ñanderuete he’i porãva’ekue ichupekuéra: Peẽ ndapejapoiva’erã ko’ã mba’e ko’ãva.

13Ñanderuete ningo he’iukava’ekue voi Israel ha Judayguakuérape opaite iproféta ha mayma techapahára rupi, he’ívo: Pejevýna pende rape vaígui, ha pejapo che ñe’ẽ, che rembipota ha umi tembiapoukapy Che ha’e haguéicha pende rukuérape, ha ha’eukava’ekue peẽme che rembiguái profetakuéra rupi.

14Ha’ekuéra katu ndojapói, ha oñembohova’atãnte hikuái ituvakueráicha, ndojeroviaséigui Ijaratee rehe.

15Ha omboyke hikuái avei iñe’ẽ ha iñe’ẽme’ẽ Ha’e ojapova’ekue ituvakuéra ndive, ha umi tembiapoukapy Ha’e ome’ẽva’ekue ichupekuéra; ha oiko mba’e rei rapykuéri ha imba’ekuaa hikuái umi tetã ijerekue rupi ojapo háicha, ha ojapo avei umi mba’e Ñanderuete he’imava’ekue ichupekuéra ani hag̃ua ojapo.

16Opoi hikuái Ñanderuete rembiapoukapýgui ha ojapo ijupekuéra g̃uarã mokõi tóro ra’y ra’ãnga bróncegui ha Asera ra’ãngakuéra ha omomba’eguasu hikuái avei pe ára pegua mbyjakuérape, ha oiko hikuái Baal rembiguái ramo.

17Ohapyuka ita’ýra ha itajyrakuéra kuave’ẽmby ramo; ha oguerovia hikuái ta’yvõ ha paje rembiapo; upéicha oiko mba’evai apópe Ñanderuete resa renondépe, ombopochývo ichupe.

18Ha Ñanderuete ipochy Israelguakuéra ndive, ha ojei ichuguikuéra, ha ndopytavéi ambue Israel tríbu ndive, Juda tríbu ndivémante.

19Ha Juda jepe ndojapopái Ñanderuete, Ijára ñe’ẽ, oñepyrũma avei oiko vai ambue Israel tribukuéraicha.

20Upévagui Ñanderuete oñemboyke opaite Israel ñemoñarenguéragui, ha ojopyuka ichupekuéra, ha omoĩ ichupekuéra mondahakuéra pópe, ojeiete peve ichuguikuéra.

21Diez Israel tríbu ojepoi David rógagui ha omoĩ hikuái tetã ruvicha ramo Jeroboam, Nebat ra’ýpe; ha Jeroboam omombia Israélpe Ñanderuete rapégui, ha oity ichupekuéra angaipa tuichaitévape.

22Upéicha Israel ñemoñarenguéra ojapo avei opaite Jeroboam angaipa, oñemboyke’ỹre ichuguikuéra,

23Ñanderuete ojei peve Israelguakuéragui, Ha’e voi he’i haguéicha opaite hembiguái profetakuéra rupi; ha upévagui Israelguakuéra ojegueraha jepokuapýpe Asíriape, ko ára kóva peve.

24Asíria retã ruvicha ogueru tetã ambueygua aty Babilónia, Cuta, Ava, Hamat ha Sefarvaímgui, ha omohenda ichupekuéra Samáriape ha opaite itavakuérape, Israelguakuéra oiko haguépe; ha oñemomba’e hikuái Samária rehe, ha oiko hikuái itavakuérape.

25Ha iñepyrũmbýpe ha’ekuéra nomomba’eguasúi Ñanderuetépe, upévare Ha’e ombou leõnguéra ojuka hag̃ua ichupekuéra.

26Ha oje’e Asíria retã ruvichápe: Umi tetãygua aty nde rerovava’ekue ha remoĩva’ekue Samária tavakuérape, ndoikuaái pe tetã jára rembiapoukapy, upévare Ha’e oñemoĩ hesekuéra ha umi leõ ojuka ichupekuéra, ndoikuaáigui hikuái Ñanderuete rembipota.

27Ha Asíria retã ruvicha he’i: Pegueraha jevy peteĩ Israel pa’i hendivekuéra, ombo’e hag̃ua ichupekuéra pe tetã Jára rembiapoukapýre.

28Ha ou peteĩ pa’i ojererahava’ekue jepokuapýpe Samáriagui ha oiko Bet-élpe, ha ombo’e ichupekuéra mba’éichapa omomba’eguasuva’erã Ñanderuetépe.

29Umi tetãygua ouramóva katu ojapo avei ojupe g̃uarã ijarateerã umi táva ha’ekuéra oikohápe.

30Umi Babiloniaygua ojapo peteĩ Sucot-benot ra’ãnga; umi Cutaygua, peteĩ Nergal ra’ãnga; ha umi Hamatgua ojapo peteĩ Asima ra’ãnga.

31Umi Avaygua ojapo peteĩ Nibhaz ra’ãnga ha Tartac ra’ãnga; ha umi Sefarvaimgua ohapy ita’yrakuéra tatápe omomba’eguasu hag̃ua Adramélec ha Anamélecpe, Sefarvaimgua jarakuéra.

32Ha’ekuéra okyhyje avei Ñanderuetégui, ha omoĩ pa’i ramo hetãygua apytégui umi yvy yvatépe g̃uarã, oikuave’ẽ hag̃ua ichupekuéra g̃uarã itupãópe, oñemopu’ãmava’ekue yvy yvateha rupi.

33Omomba’eguasu hikuái avei Ñanderuetépe, ha ombotuicha avei ijarakuérape, ojepokuaa háicha hetãme.

34Ko ára kóva peve ojapo hikuái ymaguaréicha: Ndojerovia porãi Ñanderuete rehe, ha ndojapói hekoitépe iñe’ẽ térã hembiapoukapy, Ñanderuete he’i haguéicha Jacóbo ra’ykuérape, upévare Ha’e ome’ẽva’ekue avei hetãme héra Israel.

35Ha Ñanderuete ome’ẽva’ekue ichupekuéra iñe’ẽ, he’ívo: Ndapekyhyjeiva’erã jára ambuekuéragui, ha napemomba’eguasuiva’erã ichupekuéra, ha ndapeikoiva’erã hembiguái ramo ni ndapeikuave’ẽiva’erã ichupekuéra g̃uarã.

36Che, pende Ruete, penerenohẽva’ekue Egípto retãgui, tuicha pu’aka ha pyapy mbaretepópe cheheguínte pekyhyjeva’erã, ha chemomba’eguasueteva’erã, ha chéve g̃uarãnte peikuave’ẽva’erã.

37Umi ñe’ẽ ha tembiapoukapy ame’ẽva’ekue peẽme kuatiañe’ẽme, peñeha’ãmbaite pejapopa hag̃ua hekoitépe, ha ndapekyhyjeiva’erã ambue járagui.

38Napenderesarairiva’erã pe ñe’ẽme’ẽgui ajapova’ekue penendive ha ndapekyhyjeiva’erã jára ambuégui.

39Pekyhyjénteke pende Ruetégui, Ha’émante pendesalvava’erã opaite penderehe ija’e’ỹvagui.

40Ha’ekuéra katu nohendúi, ojapo uvei ojepokuaa háicha ymaite guive.

41Upéicha ko’ã tapicha okyhyje Ñanderuetégui, ha oiko avei ijarakuéra rembiguái ramo; ha ita’ýra ha ita’ýra ra’yrekuéra ojapopa jevy hikuái ko ára kóva peve ituvakuéra ojapo haguéicha.

← Chapter 16 Jump to: Chapter 18 →