2 Kings 2

Guarani 2015 (Ñanderuete Ñe’ẽ Porã 2015)

← Chapter 1 Jump to: Chapter 3 →

1Ojehu ningo Ñanderuete ohupiséma ramo Elíaspe yvágape peteĩ yvytu atã reheve, Elías ouhína Eliséo ndive Gilgálgui.

2Ha Elías he’i Eliséope: Ko’ág̃a epyta ko’ápe, Ñanderuete chemondógui Betélpe. Ha Eliséo he’i ichupe: Ñanderuete rekove rehe ha ne ánga rekovére che ndorohejamo’ãi. Ha oguejy hikuái oñondive Betélpe.

3Ha umi proféta remimbo’e oĩva Betélpe osẽ ojejohu hag̃ua Eliséo ndive, ha he’i hikuái ichupe: Reikuaa piko Ñanderuete ko ára kóvape oipe’ataha nde járape ko yvy árigui. Ha Eliséo he’i: Upéicha, che aikuaa, pekirirĩ porã katu.

4Ha Elías he’i jevy ichupe: Eliséo ko’ág̃a epyta ko’ápe, Ñanderuete chemondógui Jericópe. Ha ha’e he’i: Ñanderuete rekove rehe ha ne ánga rekove rehe che ndorohejamo’ãi. Ha ou hikuái oñondive Jericópe.

5Ha oñemboja Eliséo rendápe umi proféta remimbo’e oĩva Jericópe ha he’i ichupe: Reikuaa piko Ñanderuete ko ára kóvape oipe’ataha nde járape yvy árigui; ha ha’e he’i jevy: Upéicha, che aikuaa voi, pekirirĩ katu.

6Ha Elías he’i Eliséope: Ajerure ndéve epytána ko’ápe, Ñanderuete chemondógui Jordánpe. Ha ha’e he’i: Ñanderuete rekovére ha ne ánga rekovére, che ndorohejamo’ãi, ha mokõivéva oho jey oñondive.

7Ha ou 50 proféta remimbo’e ha oñembo’y mombyryhápe hovaikuéra, Elías ha Eliséo oñembo’y jave Jordan rembe’ýpe.

8Upémaramo Elías ojapyhy ijahoja, ombyapakua ha ipype oinupã pe y, ha pe y oñemopa’ũ peteĩ yke ha ambue yke gotýo, ha mokõivéva ohasa pe pa’ũ ikãha rupi.

9Ohasapáma ramo hikuái, Elías he’i jevy Eliséope: Ejerure peteĩ mba’e reipotáva ajapo hag̃ua nderehehápe, ajereraha mboyve ndehegui. Ha Eliséo he’i: Ajerure ndéve mokõi pehẽngue nde pytu porãgui.

10Ha ha’e he’i: Mba’e hasyetéva rejerure. Nde cherecha ramo ajererahávo ndehegui, oñeme’ẽta ndéve pe mba’e rejeruréva; ha nde ndacherechái ramo katu, noñeme’ẽmo’ãi pe mba’e rejeruréva.

11Ha ojehu oñemongeta jave hikuái, péina ápe peteĩ cárro ha ikavajukuéra tata hendýva ou oipe’a Elíaspe, Eliséo resa renondégui; ha Elías ojehupi yvágape peteĩ yvytu jere atã reheve.

12Ha Eliséo ohechávo osapukái: Che ru, che ru, ndetuichave Israel cárro ha kavaju ariguágui. Ha upéi ndohechavéi ichupe; ha ohupi ijao omondoro hag̃ua mokõi hendápe.

13Uperire ha’e ohupi Elías ahoja ho’ava’ekue ichugui, ha ojevy ha ou oñembo’y Jordan rembe’ýpe.

14Ha ojapyhy Elías ahoja ho’ava’ekue, ha oinupãvo pe y, he’i: Moõpa oime Ñanderuete, Elías jára, ha oinupãvo pe y Elías oinupã hagueichaite, pe y oñemboyke peteĩ yke ha ambue yke gotýo, ha Eliséo ohasa imbyte ikãha rupi.

15Ha umi proféta remimbo’e oĩva Jericópe ohechávo ichupe ambue y rembe’ýpe, he’i: Elías pytu porã oguejy Eliséo ári, ha ou hikuái hendápe ha ojayvy hikuái henondépe.

16Ha he’i joa: Eikuaa porãke, ore ne rembiguaikuéra apytépe oĩ 50 kuimba’e imbaretéva; toho hikuái ko’ág̃a ha toheka nde járape; ikatu porãkuaa Ñanderuete Pytu Porãitéva omopu’ã ichupe, ha oity jevy umi cérro rupi térã cérro pa’ũ rupi. Ha ha’e he’i ichupekuéra: Ani pemondótei.

17Ha’ekuéra katu he’i jevy jey Eliséope, upévare ha’e oheja oho, he’ívo: Pemondo. Upéramo omondo hikuái 50 kuimba’e, ha ha’ekuéra oheka opa rupiete mbohapy ára pukukue ha ndojohúi avavépe.

18Ha ou jevývo hikuái Eliséo rendápe, ha’e opytágui Jericópe, ha’e he’i ichupekuéra: Chéiko nda’éi voi ra’e peẽme ani hag̃ua peho.

19Umi kuimba’e táva pegua he’i Eliséope: Péina ápe, ko táva renda kóva ningo iporã, nde che jára rehecha háicha; hi’ýnte ivai ha omomembykua kuñakuérape.

20Upéramo ha’e he’i: Pegueru chéve peteĩ ña’ẽ pyahu ha pemoĩ ipype juky. Ha ogueru ichupe hikuái.

21Ha Eliséo oho umi yvu rupi, ha oity ipype pe juky ha he’i: Péicha he’i Ñanderuete: Che aipohãno ko y kóva anive hag̃ua oporombohasy térã oporojuka.

22Ha ko ára kóva peve iporã umi y, Eliséo he’i haguéicha.

23Upéi ojupi Betélpe ha ohokuévo tape rehe, osẽ ichupe pe távagui mitã kuimba’ekuéra ha oñembohory hese, he’ívo: Nde, akã perõ, ejupi; nde, akã perõ, ejupi.

24Ha oma’ẽvo hapykue gotýo, ohecha ichupekuéra, ha ha’e omaldeci ichupekuéra Ñanderuete rérape. Upéi osẽ mokõi óso ka’aguýgui ha omondyryry umi 42 mitã kuimba’épe.

25Upégui oho Carmel cérrope, ha upégui oho jevy Samáriape.

← Chapter 1 Jump to: Chapter 3 →