2 Kings 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Naaman, Síria soldádo ruvicha guasu, ha’e ningo peteĩ kuimba’e oñemoherakuãguasúva Síria retã ruvicha renondépe, ha ijára ohayhu ichupe, ha’e rupi Ñanderuete osalva va’ekue Síria retãme. Ko kuimba’e kóva ipy’aguasuete, ko’ág̃a katu iléprapa.

2Ha Síriagui osẽra’e umi soldádo aty oporomondáva, upéicha oguerahava’ekue hikuái peteĩ mitãkuña Israel retãgui, ha péva opyta Naaman rembireko rembiguái ramo.

3Kóva he’i pe kuñakarai, ijárape: Che jára omba’ejerure ramo pe profétape oikóva Samáriape, ha’e katuete omongueráta ne ménape ilépragui.

4Ha Naaman oho imburuvichaguasu rendápe, ha omombe’u ichupe ko’ã mba’e: Péicha he’i peteĩ mitãkuña Israel pegua.

5Upérõ Síria retã ruvicha he’i Naamánpe: Eguata, tereho, ha che aguerahaukáta peteĩ kuatiañe’ẽ Israel retã ruvichápe. Ha osẽvo, ogueraha 335 kílo pláta, 6.000 óro akytã (pehẽngue) ha 10 ao hepyetéva.

6Ogueraha avei kuatiañe’ẽ Israel retã ruvichápe g̃uarã, he’íva péicha: Og̃uahẽvo ne rendápe ko kuatiañe’ẽ, eikuaa péva rupi che amondo ne rendápe che rembiguái Naamánpe, remonguera hag̃ua ichupe ilépragui.

7Israel retã ruvicha omoñe’ẽ rire pe kuatiañe’ẽ, omondoro ijaokuéra ha he’i: Chéiko yvága Jára mba’e, aporojuka ha aporomoingove hag̃ua, kóa ombou che rendápe peteĩ kuimba’e amonguera hag̃ua ichupe ilépragui. Pema’ẽ porã ha pehecha mba’éichapa ha’e oheka peteĩ tape chereity hag̃ua.

8Ha Eliséo, Ñanderuete rembiguái, ohendúvo pe Israel retã ruvicha omondoro hague ijao, he’iuka tetã ruvichápe: Mba’érehepa remondoróra’e nde ao. Tou ha’e che rendápe, ha’e oikuaa hag̃ua Israélpe oĩha Ñanderuete proféta.

9Ha Naaman ou ikavajukuéra ha iñorãirõhára cárro reheve, ha opyta Eliséo róga rokẽ rovái.

10Upéramo Eliséo omondo peteĩ hembiguái hendápe he’i hag̃ua: Tereho ha ejahu Jordan ysyrýpe 7 jevy, ha nde ro’o ipyahupáta ha nepotĩ jevýta.

11Ha Naaman oho pochypópe, ha he’i: Che ningo ha’e che py’apýpe: Ha’e osẽta ha oñembo’ýta che renondépe ohenói hag̃ua Ijára réra, upéi omopu’ãta ipo ha opokóta cherehe, chemonguera hag̃ua che lépragui.

12Damásco ysyrykuéra, Abana ha Farpar, naiporãvéi piko mayma Israel ýgui, ha añapymi ramo umívape, nachepotĩmo’ãi piko avei. Ha ojere oho pochypópe.

13Hembiguaikuéra katu oñemboja hese ha oñe’ẽ porã hendive he’ívo: Ore ru, pe proféta he’i ramo ndéve rejapo hag̃ua mba’e hasyvéva, nderejapoichénepa. Ko’yteve katu he’írõ ndéve: Eñapymi ha nepotĩ jevýta.

14Upéramo ha’e oguejy ha oñapymi 7 jevy Jordánpe, he’iuka haguéicha ichupe Ñanderuete proféta Eliséo, ha ho’o ipyahu jevy peteĩ mitã ro’óicha, ha opyta ipotĩete.

15Upéi oho jevy Eliséo rendápe, ha’e iñirũnguéra ndive, ha oñemoĩ henondépe ha he’i: Péina ápe ko’ág̃a aikuaáma ndaiporiha ambue Jára ko yvy apére, Israel Jára añónte oĩ. Ajerure ndéve rejapyhy hag̃ua jopoimi ne rembiguáigui.

16Ha Eliséo he’i ichupe: Israel Jára rekovére, ha ichupe g̃uarã che amba’apo’aína, ndajapyhymo’ãi mba’eve nde pógui. Heta oñeha’ã ojapyhy hag̃ua ichugui oimeraẽva mba’e, Eliséo katu ndoipotaiete.

17Upéramo Naaman he’i: Ajerure ndéve, ko yvy kóvagui noñeme’ẽichénepa ne rembiguáipe mokõi mburika ipu’aka háicha. Ko’águi tenonderã gotyove ne rembiguái noikuave’ẽmo’ãvéi kuave’ẽmby ojehapypáva ambue járape g̃uarã, Israel Járape añónte.

18Ha ko’ã mba’épente Israel Jára toperdona hembiguáipe: Che jára, che retã ruvicha, oikérõ itupãópe oñembo’e hag̃ua ijára Rimónpe ha péva jave ojejoko ramo che jyva rehe, ha che avei ajayvy ramo Rimon tupãópe; ajapóvo upéicha Israel Jára toperdona ko’ã mba’e ne rembiguáipe.

19Ha Eliséo he’i ichupe: Tereho py’aguapy reheve. Ha oho rire oiméne oguata peteĩ légua mbyte rupi.

20Upéramo Gejazi, pe proféta rembiguái, he’i ipy’apýpe: Che jára ningo ndohejái ko Siriaygua, Naaman, ome’ẽ ichupe mba’eve umi mba’eita ogueruva’ekuégui. Ñanderuete rekovére, che añaníta hapykuéri ha ajapyhýta ichugui oimeraẽva mba’e.

21Ha Gejazi oho Naaman rapykuéri; ha Naaman ohechávo oĩha oúva ñaniháme hapykuéri, oguejy icárrogui oho hag̃ua hendápe, ha he’i: Oho porãmba piko.

22Ha Gejazi he’i: Iporãmba. Che jára chembou ha’évo ndéve: Péina ag̃aite og̃uahẽ che rendápe Efrain cérrogui mokõi proféta remimbo’e: Ajerure ndéve eme’ẽmo ichupekuéra g̃uarã 33,5 kílo óro morotĩ ha mokõi ao hepyetéva.

23Naaman he’i: Ajerure ndéve ejapyhýna 67 kílo; ha ojerure jevy jey, ha mokõi vosápe omoinge 67 kílo pláta, ha mokõi ao pyahu, ha omoĩ mokõi hembiguái ape rehe ogueraha hag̃ua ichupe g̃uarã.

24Ha péicha oho, ha og̃uahẽvo peteĩ ógape ñemiha meguápe, Gejazi ojapyhy ipógui ha oñongatu pe ógape; upéi he’i umi kuimba’épe oho jevy hag̃ua.

25Upéi ha’e ou ha oñemoĩ ijára renondépe. Ha Eliséo he’i ichupe: Mamóguipa reju Gejazi. Ha’e katu he’i ichupe: Ne rembiguái ndohóikuri mamove.

26Upéramo Eliséo he’i ichupe: Che pytúpe aime avei upérupi, Naaman oguejy ramo icárrogui ohug̃uaitĩ hag̃ua nendive. Ko’ág̃a piko hi’ára jajapyhy hag̃ua pláta, ao, olivoty, parralty, ovechaita, gueieta, tembiguái kuimba’e ha kuñáva.

27Upévagui, Naaman leprakue ováta nderehe ha ne ñemoñarenguéra rehe opaite árape. Ha osẽ rire henondégui iléprapa, ha hete pire imorotĩmba heládaicha ára ro’ypeguáicha.

← Chapter 4 Jump to: Chapter 6 →