2 Kings 14

Guarani 2015 (Ñanderuete Ñe’ẽ Porã 2015)

← Chapter 13 Jump to: Chapter 15 →

1Joas, Joacaz ra’y, ombotývo mokõi áño Israel retã ruvicha ramo; Amasías, Joas ra’y, oñepyrũ oisãmbyhy Juda retã ruvicha ramo.

2Amasías oñepyrũvo oisãmbyhy oguerekókuri 25 áño, ha’e oisãmbyhy 29 áño Jerusalénpe; isy réra Joadan, peteĩ Jerusalengua voi.

3Ha ha’e ojapo iporãva Ñanderuete resa renondépe, ndaha’éi ramojepe itúva Davídicha; ha ojapo opaite mba’e itúva Joas ojapo haguéicha.

4Upeichavéramo jepe, umi yvy yvate nombyaíri, Israelguakuéra oikuave’ẽ ha ohapy gueteri mba’e hyakuã porã umi yvy yvateha rupi.

5Ha tetã ruvicha omoĩ porãmba rire ipoguýpe, ojukauka itúva jukaharépe.

6Ndojukái katu itúva jukahára ra’ykuérape, Moises kuatiañe’ẽ rembiapoukapýpe he’ígui: Nderejukaiva’erã túva ita’yrakuéra rehe, ni ta’yrakuéra ituvakuéra rehe, peteĩteĩ omanova’erã hi’angaipateévarente.

7Ha’e ojuka avei 10.000 Edomguápe pe Juky cerrokuéra pa’ũme (vállepe), ha ñorãirõpópe omoĩ ipoguýpe Sela, ha ombohéra Jocteel ko ára kóva peve.

8Upéramo Amasías omondo ñe’ẽ rerahahára Joas, Joacaz ra’y, Jehu ra’yre, Israel retã ruvichápe, ha he’iuka ichupe: Ejúna jajohecha hag̃ua.

9Ha Joas, Israel retã ruvicha, he’iuka jevy Amasías, Juda retã ruvichápe, ko ñe’ẽ kóva: Pe karaguata oĩva Líbano he’iuka pe cédro oĩva avei Líbanope: Eme’ẽ nde rajy che ra’y rembirekorã ramo. Ág̃a katu ohasávo umi mymba saite oĩva Líbanope, opyrũmba pe karaguata rehe.

10Añetehápe ndepu’aka Edom rehe ha upévare nde py’a oñembovu; ndéntena eñembotuicha, epyta nde rógape. Ma’erãiko reikese peteĩ mba’evairãme, re’a hag̃ua nde ha Judayguakuéra nendive.

11Amasías nohenduséi katu; ha upévagui Joas, Israel retã ruvicha, ojupi ojohecha hag̃ua Amasías, Juda retã ruvicha ndive, Bet-seméspe, péva Juda mba’éva.

12Ha Israel ombopoguy Judápe, ha peteĩteĩva ijapytégui okañy hógape.

13Ha Joas, Israel retã ruvicha, oapresa Amasías, Juda retã ruvichápe, Joas ra’y, Ocozías ra’yrépe, Bet-sémespe; ha ou Jerusalénpe, ha oity Jerusalen tápia yvate, Efrain rokẽ guive Hugua rokẽ meve, 180 métro pukukue.

14Ha ojapyhypaite pe óro ha pláta, ha opaite tembiporu ojejohúva guive Ñanderuete rógape, ha umi mba’erepy oñeñongatúva tetã ruvicha rógape, ha ojapyhy avei karai poguasukuérape pokuapýpe, ha oho jevy Samáriape.

15Ambue tembiapo Joas ojapova’ekue, hembiapo py’aguasu rehegua, ha mba’éichapa oñorãirõ Amasías, Juda retã ruvicha ndive, ojehaipa Israel retã ruvichakuéra rembiapokue kuatiañe’ẽme.

16Ha Joas omano rire; ita’ýra Jeroboam oisãmbyhy hendaguépe.

17Ha Amasías, Joas ra’y, Juda retã ruvicha, oikove gueteri 15 áño, Joas, Joacaz ra’y, Israel retã ruvicha omano rire.

18Ambue Amasías rembiapokue ojehaipa umi Juda retã ruvichakuéra rembiapokue kuatiañe’ẽme.

19Oñepu’ã hese Jerusalénpe, upévare ha’e okañy Laquíspe; ha umi ohóva hapykuéri ojuka ichupe Laquíspe.

20Upéi ogueru hikuái hetekue kavaju ári, ha oñotỹ ichupe Jerusalénpe ituvakuéra ndive, David távape.

21Upéramo opaite Judaygua oiporavo ita’ýra Azaríaspe, ha’e oguerekóvo 16 áño, ha omoĩ hikuái ichupe tetã ruvicha guapyhápe, itúva Amasías rendaguépe.

22Ha’e ombopoguy Elat ha omyatyrõ porã rire omoinge jevy Juda retãme, itúva, pe tetã ruvichakue, omano riréma.

23Amasías, Joas ra’y, oisãmbyhývo 15 áño Juda retã ruvicha ramo; Jeroboam, Joas ra’y, oñepyrũ oisãmbyhy Israel retã ruvicha ramo Samáriape, 41 áño pukukue.

24Ha ojapo ivaíva Ñanderuete resa renondépe, ha noñemboykéi umi Jeroboam, Nebat ra’yre angaipágui, omoangaipava’ekue Israelguakuérape.

25Ha’e omoĩ jevy Israel retã rembe’y hendateépe Hamat ojeikeha guive Araba yguasu, Mar Muérto peve, he’i haguéicha Israel Jára, hembiguái Jonas, Amitai ra’y rupi, péva peteĩ proféta Gat-hefergua.

26Ñanderuete oma’ẽgui Israel jepy’apy asy rehe; ndaiporiveiha tembiguái térã tembiguai’ỹ ikatúva oipytyvõ Israélpe.

27Ñanderuete ndoipe’aséigui Israel réra ko yvága guýgui; oipytyvõse Israélpe Jeroboam, Joas ra’y, po rupi.

28Ambue Jeroboam rembiapokue, opaite mba’e ojapova’ekue, ipy’aguasukue, umi ñorãirõ ojapova’ekue, ha mba’éichapa omoĩ jevy Israel poguýpe Damásco ha Hamat, ho’amava’ekue Juda pópe, opaite ko’ã mba’e ojehaipa umi Israel retã ruvichakuéra rembiapokue kuatiañe’ẽme.

29Ha Jeroboam omano rire oñeñoty ichupe, Israel retã ruvichakuéra ndive; ha ita’ýra Zacarías oisãmbyhy itúva rendaguépe.

← Chapter 13 Jump to: Chapter 15 →