2 Kings 25

Guarani 2015 (Ñanderuete Ñe’ẽ Porã 2015)

← Chapter 24 Jump to:

1Ojehu Sedequías oisãmbyhývo pe áño 9-hápe, pe jasy 10-hápe ha pe ára 10-hápe, Nabucodonosor, Babilónia retã ruvicha, ou isoldádo atyguasu reheve ojeity hag̃ua Jerusalén ári, ha omongora pe táva, ha omopu’ã Jerusalén tápia renondépe escaléra isoldadokuéra ohasa hag̃ua pe táva tápia ári.

2Ha Jerusalén oñemongora, Sedequías oisãmbyhývo 11 áño.

3Pe ára 9-hápe, pe jasy irundyhápe, pe ñembyahýi ipu’aka itavayguakuérare, ndaiporivéigui tembi’u Jerusalenpýpe.

4Ha ojapo rire peteĩ kuára pe táva tápia yvate rehe, umi soldádo okañy péva rupi, pyharekuépe, pe okẽ oĩva mokõivéva táva tápia pa’ũ rupi, tetã ruvicha ka’avoty rembe’ýpe, ha umi Caldeaygua oĩ joa táva jerekue rehe; ha pe tetã ruvicha oho Jordan ñu rape rupi.

5Umi Caldeaygua soldadokuéra oho tetã ruvicha rapykuéri, ha oapresa ichupe Jerico ñúme, ha isoldádo aty oñemosarambipa.

6Ha oapresa rire tetã ruvichápe, ojegueru ichupe Babilónia retã ruvicha rendápe, Riblápe, ha’e he’i hag̃ua mba’épa ojejapóta hese.

7Hovake oakã’o ita’yrakuérape, ha upéi ohesa’o hikuái Sedequíaspe ha ogueraha ichupe Babilóniape jepokuapýpe mokõi cadéna brónce rehegua reheve.

8Pe jasy 5-hápe, pe ára 7-hápe, pe áño 19-hápe Nabucodonosor ojupi rire tetã ruvicha ramo, ha’e ombou Nebusaradan, Babilónia retã ruvicha rembiguaiguasúpe, Jerusalénpe.

9Ha Nebusaradan ohapy Ñanderuete rogaguasu, tetã ruvicha róga ha opaite óga tuicháva oĩva guive Jerusalénpe.

10Ha umi soldádo oĩva hendive oity pe Jerusalén tápia jere yvate.

11Ha umi Judaygua opytava’ekue Jerusalénpe, ha umi ohasava’ekue Babilónia retã ruvicha rendápe, Nebusaradan oguerahapa avei jepokuapýpe Babilóniape.

12Nebusaradan, Babilónia retã ruvicha rembiguaiguasu, ohejánte umi Judaygua imboriahuetéva omba’apo hag̃ua parralty ha kokuépe.

13Ha Caldeayguakuéra ojoka umi mokõi horcon guasu bronceguiguáva, umi tacho guasu oguapýva icarrokuérape ha pe yendaguasu oĩva Ñanderuete róga renondépe, ha oguerahapa Babilónia retãme.

14Ogueraha avei hikuái umi japepoguasukuéra (ólla), umi pála, umi tataindy rendy jetapa ha opaite ambue tembiporu bronceguigua ojeporúva guive Ñanderuete rogaguasu rembiapópe.

15Mba’e ryakuã porã myatatĩha, umi ña’ẽ pypuku ha opaite ambue mba’e ojejapova’ekue óro ha óro morotĩgui ojeguerahapa avei Babilónia retãme.

16Ndaikatúi oñeha’ã mboýpa ipohyikue ko’ã mba’e bronceguiguáva: Umi mokõi horcon, pe yendaguasuete ha umi tácho guasu icarrokuéra reheve.

17Peteĩ horcon ijyvatekue haimete ócho métro ha hi’ári oĩ peteĩ iñakã jeguaka bronceguiguáva, péva ijyvate 1,30 métro ha iñakã jerekuévo oĩ kuri peteĩ red ha granáda (yva) ra’ãngakuéra, ojejapova’ekue avei bróncegui. Ha mokõive horcon peteĩchaite.

18Nebusaradan oapresa avei pe pa’iguasu Seraíaspe, pa’i mokõiha Sefaníaspe ha mbohapy kuimba’e oñangarekóva hokẽnguéra rehe.

19Ha umi tavaygua apytégui oapresa avei pe soldádo aty ruvicha, ha 5 tetã ruvicha rekombo’ehára, pe kuatiahaihára ruvicha ohaiva’ekue soldádo rerakuéra ha 60 kuimba’e hembýva gueteri Jerusalénpe.

20Ko’ãvape Nebusaradan ojapyhy ha ogueraha Riblápe, Babilónia retã ruvicha oĩháme.

21Ha Babilónia retã ruvicha oinupã ichupekuéra ha upéi ojuka ichupekuéra Riblápe, Hamat retãme; péicha ojegueraha Judayguakuérape jepokuapýpe hetãgui.

22Ha umi tetãygua Nabucodonosor ohejava’ekue Juda retãme, omoĩ tetã sãmbyhyhára ramo Gedalías, Ahicam ra’y, Safan ra’yrépe.

23Ha umi soldádo ruvicha ha ipoguypegua ohendúvo, pe Babilónia retã ruvicha omoĩ hague Gedalíaspe tetã sãmbyhyhára ramo, ou hikuái hendápe Mizpápe: Ismael, Netanías ra’y; Johanan, Carea ra’y; Seraías, Tanhumet ra’y, peteĩ Netofatgua; ha Jaazanías, peteĩ Maacatgua ra’y; ha opaite ipoguy peguakuéra.

24Upéramo Gedalías oñe’ẽ porã hendivekuéra, ha he’i ichupekuéra: Ani pekyhyjétei peiko hag̃ua Caldeayguakuéra poguýpe, hembiguaikuéra ramo; pepyta katu ha peiko ko tetãme, pemba’apo Babilónia retã ruvichápe g̃uarã, ha oho porãmbáta peẽme.

25Ha pe jasy 7-hápe katu ou Ismael, Netanías ra’y, Elisama ra’yre, tetã ruvicha rogaygua peteĩva ha hendive 10 kuimba’e, ha ojuka hikuái Gedalíaspe, ha avei umi Judaygua ha Caldeayguápe oĩva guive hendive Mizpápe.

26Ha upéi opu’ã mayma tetãyguakuéra, imitãvéva guive itujavéva peve, umi soldádo ruvicha ndive okañy hag̃ua Egíptope, okyhyjégui Caldeayguakuéragui.

27Ojehu pe áño 37-hápe Joaquin, Juda retã ruvichakue, ojegueraha rire jepokuapýpe pe jasy 12-ha jave, Evil-merodac, Babilónia retã ruvicha, ojupi rire tetã ruvicha ramo peteĩ áño, opoi Joaquíngui, Juda retã ruvichakue, ha oguenohẽ ichupe cárcelgui.

28Ha oñe’ẽ rory ichupe ha ombotuichave ichupe opaite ambue tetã ruvichakue oĩva guive hendive Babilóniape.

29Ha oipe’a ichugui ao jepokuapy omondéva, okaru hag̃ua hendive opaite árape, oikove aja pukukue hendive.

30Ha ko’ẽ ko’ẽ rehe tetã ruvicha ome’ẽuka ichupe tembi’u, ha’e oikove aja pukukue hendive.

← Chapter 24 Jump to: